ភ្នំពេញ៖នាព្រឹកថ្ងៃសៅរ៍ ១១កើត ខែទុតិយាសាឍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២៥ ខែកក្កដា ឆ្នាំ២០២៦ លោក សេង គន្ធ អញ្ញើញជាអធិបតីភាព ក្នុងពិធី សំណេះសំណាល និងប្រកាសបញ្ចូលសមាជិក សមាជីការថ្មីចំនួន៤០០នាក់ ដែលបានសុំចូលរួមរស់នយោបាយជាមួយបក្ស ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ។
ពិធីសំណេះសំណាល និងប្រកាសបញ្ចូលសមាជិកបក្សថ្មីរបស់គណៈបក្ស ក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ ជាព្រឹត្តិការណ៍នយោបាយផ្ទៃក្នុងសំខាន់មួយរបស់គណបក្សប្រជាជនកម្ពុជា (CPP) នៅថ្នាក់មូលដ្ឋាន ដើម្បីពង្រឹងរចនាសម្ព័ន្ធ និងបង្កើនកម្លាំងសាមគ្គីភាព។
តំណាងសមាជិកបក្សថ្មី បានឡើងប្តេជ្ញាចិត្តថា៖
១. ស្មោះត្រង់ជាមួយគណបក្ស និងប្រជាជន ដោយខិតខំប្រឹងប្រែងឱ្យអស់ពីកម្លាំងកាយចិត្ត ចំណេះដឹង និងសមត្ថភាព ដើម្បីបំពេញគ្រប់ភារកិច្ចដែលគណបក្សប្រគល់ជូន។
២. គោរព និងអនុវត្តយ៉ាងម៉ឺងម៉ាត់នូវលក្ខន្តិកៈ កម្មវិធីនយោបាយ និងបទបញ្ជាផ្ទៃក្នុងរបស់គណបក្ស ព្រមទាំងរដ្ឋធម្មនុញ្ញ និងច្បាប់របស់រដ្ឋ។
៣.ខិតខំកសាង និងថែរក្សាសាមគ្គីភាព ឯកភាពផ្ទៃក្នុងបក្សឱ្យបានរឹងមាំ និងភ្ជាប់ទំនាក់ទំនងជិតស្និទ្ធជាមួយមហាជន ប្រជាជន។
៤. បន្តរៀនសូត្រ និងពង្រឹងគុណធម៌ សីលធម៌ រស់នៅស្អាតស្អំ ដើម្បីធ្វើជាគំរូល្អនៅក្នុងសហគមន៍ និងការងារ។
នាឱកាសនេះដែរ លោក សេង គន្ធ សម្តែងនូវសេចក្តីសប្បាយរីករាយ និងវាយតម្លៃខ្ពស់ចំពោះវត្តមានរបស់ថ្នាក់ដឹកនាំ សមាជិក-សមាជិកា និងពិសេសសមាជិកថ្មីទាំងអស់ដែលបានស្ម័គ្រចិត្តចូលរួមរស់ជាមួយគណបក្សប្រជាជនកម្ពុជា និងអបអរសាទរយ៉ាងកក់ក្តៅចំពោះសមាជិកថ្មី ដែលត្រូវបានប្រកាសបញ្ចូលជារចនាសម្ព័ន្ធផ្លូវការរបស់គណបក្ស និងចាត់ទុកថាជាកម្លាំងបន្ថែមយ៉ាងសំខាន់សម្រាប់ការងារមូលដ្ឋាន។
លោក សេង គន្ធ រំលឹកពីការតស៊ូ និងសមិទ្ធផលធំៗរបស់គណបក្សក្នុងការរំដោះប្រទេសជាតិ ការសង្គ្រោះជីវិតប្រជាជន ការពារសន្តិភាព និងការអភិវឌ្ឍប្រទេសមកទល់បច្ចុប្បន្ន។លោក សេង គន្ធ បញ្ជាក់យ៉ាងច្បាស់ថា “សន្តិភាព” គឺជាមូលដ្ឋានគ្រឹះនៃអ្វីៗគ្រប់យ៉ាង ដូច្នេះសមាជិកបក្សគ្រប់រូបមានកាតព្វកិច្ចរួមគ្នា ការពារ និងថែរក្សាសន្តិភាពឱ្យបានគង់វង្ស។
ចុងបញ្ចប់ លោក សេង គន្ធ បានជូនពរបងប្អូន សមាជិកបក្សថ្មី ទាំងអស់ ទទួលបាននូវសេក្ដីសុខ រកទទួលទានមានបាន និងសមប្រកប ទៅដោយ ពុទ្ធិពរទាំង៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕សូមអរគុណ!
