ភ្នំពេញ៖ នៅព្រឹកថ្ងៃទី១៥ ខែតុលា ឆ្នាំ២០២៦ លោកជំទាវ សុខា គងពិសី គីម រិទ្ធី ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្តព្រះវិហារ បានអញ្ជើញចុះសួរសុខទុក្ខ និងនាំយកអំណោយជាថវិកាដ៏ថ្លៃថ្លារបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ទៅជូនដល់បងស្រី ធិន ជិត ដែលកំពុងសម្រាកព្យាបាលជំងឺនៅមន្ទីរពេទ្យមិត្តភាពខ្មែរ-សូវៀត។
បងស្រី ធិន ជិត គឺជាម្តាយបង្កើតរបស់កុមារា មុំ សុខហេង អាយុ ១១ឆ្នាំ ដែលបានស្លាប់បាត់បង់ជីវិតយ៉ាងអាណោចអាធ័ម ក្នុងហេតុការណ៍គ្រោះថ្នាក់ដ៏គួរឱ្យរន្ធត់ដោយសារដំរីព្រៃជាន់ជាមួយគ្នាថ្មីៗនេះ។ ចំណែកបងស្រី ធិន ជិត ផ្ទាល់ ក៏បានរងរបួសធ្ងន់ធ្ងរ និងកំពុងស្ថិតក្រោមការយកចិត្តទុកដាក់ព្យាបាលយ៉ាងដិតដល់ពីសំណាក់ក្រុមគ្រូពេទ្យ។
ក្នុងឱកាសចុះសួរសុខទុក្ខនោះ លោកជំទាវ សុខា គងពិសី គីម រិទ្ធី បាននាំយកថវិកាចំនួន ៤លានរៀល របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន មកប្រគល់ជូនគ្រួសាររងគ្រោះ ដើម្បីជួយសម្រាលបន្ទុកការខ្វះខាតក្នុងដំណាក់កាលដ៏លំបាកនេះ។
ឆ្លៀតក្នុងឱកាសនោះដែរ លោកជំទាវប្រធានកិត្តិយស បានសម្តែងនូវការសោកស្តាយ និងចូលរួមរំលែកទុក្ខយ៉ាងក្រៀមក្រំជាទីបំផុតជាមួយក្រុមគ្រួសារនៃសព ចំពោះការបាត់បង់កូនប្រុសដ៏ជាទីស្រឡាញ់ និងសូមបួងសួងឱ្យវិញ្ញាណក្ខន្ធកុមារា មុំ សុខហេង បានទៅកាន់សុគតិភព។ ព្រមសេចក្តីជាមួយគ្នានេះ លោកជំទាវក៏បានជូនពរឱ្យបងស្រី ធិន ជិត មានកម្លាំងចិត្តរឹងមាំ និងឆាប់បានជាសះស្បើយពីរបួសស្នាម ដើម្បីវិលត្រឡប់ទៅកាន់ក្រុមគ្រួសារវិញ៕រាយការណ៍ ដោយលោក ខៀវ ផល្លា ពីខេត្តព្រះវិហារ
