រាជធានីភ្នំពេញ៖ នាព្រឹកថ្ងៃចន្ទ ៨កើត ខែអស្សុជ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី១៩ ខែតុលា ឆ្នាំ២០២៦ នេះ រដ្ឋបាលខណ្ឌមានជ័យ បានរៀបចំ «សិក្ខាសាលាសមាហរណកម្មផែនការសង្កាត់នៅថ្នាក់ខណ្ឌ និងកម្មវិធីវិនិយោគបីឆ្នាំរំកិល (២០២៧-២០២៩)» យ៉ាងសមអធិក នៅបរិវេណសាលាខណ្ឌមានជ័យ។
ពិធីនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តម ពេញ ភារម្យ អភិបាលរងនៃគណៈអភិបាលរាជធានីភ្នំពេញ ដែលជាតំណាងដ៏ខ្ពង់ខ្ពស់ ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ។
នៅក្នុងឱកាសនោះ លោក សេង គន្ធ អភិបាលនៃគណៈអភិបាលខណ្ឌមានជ័យ បានឡើងថ្លែងសន្ទរកថាស្វាគមន៍យ៉ាងកក់ក្តៅជូនចំពោះ គណៈអធិបតី ព្រមទាំងប្រភពពាក់ព័ន្ធទាំងអស់ដែលបានចូលរួម។ លោកបានគូសបញ្ជាក់ពីសារៈសំខាន់នៃសិក្ខាសាលានេះ ក្នុងការបង្រួបបង្រួមតម្រូវការជាក់ស្តែងរបស់ប្រជាពលរដ្ឋនៅតាមសង្កាត់ ឱ្យក្លាយជាផែនការសកម្មភាព និងកម្មវិធីវិនិយោគជាក់ស្តែង ដើម្បីឆ្លើយតបឱ្យទាន់ពេលវេលាទៅនឹងការអភិវឌ្ឍក្នុងមូលដ្ឋាន។
អង្គសិក្ខាសាលានេះ មានការអញ្ជើញចូលរួមយ៉ាងច្រើនកុះករពី៖
សមាជិក សមាជិកាក្រុមប្រឹក្សាខណ្ឌ
លោក-លោកស្រី អភិបាលរង និងនាយករដ្ឋបាលខណ្ឌ
តំណាងមន្ទីរ-អង្គភាពជំនាញជុំវិញរាជធានី និងខណ្ឌ
លោក-លោកស្រី ចៅសង្កាត់ទាំងអស់ក្នុងខណ្ឌមានជ័យ ព្រមទាំងមន្ត្រីពាក់ព័ន្ធជាច្រើនរូបទៀត។
សិក្ខាសាលាសមាហរណកម្មនេះ គឺជាជំហានយុទ្ធសាស្ត្រដ៏សំខាន់មួយក្នុងការប្រមូលផ្តុំមតិយោបល់ ធនធាន និងកិច្ចសហការរវាងអាជ្ញាធរមូលដ្ឋាន ថ្នាក់ដឹកនាំរាជធានី និងមន្ត្រីជំនាញ ដើម្បីរួមគ្នាដោះស្រាយបញ្ហាប្រឈម ព្រមទាំងលើកកម្ពស់ហេដ្ឋារចនាសម្ព័ន្ធ សេវាសាធារណៈ និងគុណភាពជីវិតរបស់ប្រជាពលរដ្ឋក្នុងខណ្ឌមានជ័យឱ្យកាន់តែប្រសើរឡើងសម្រាប់ឆ្នាំ២០២៧ ដល់ ២០២៩ ខាងមុខ៕
