នារសៀល ថ្ងៃសុក្រ ទី២៣ ខែតុលា ឆ្នាំ២០២៦ នៅសាលប្រជុំអគារសេនាធិការដ្ឋាន លោកឧត្តមសេនីយ៍ទោ នាង សុជីវី ស្នងការ ស្នងការដ្ឋានកសាងកម្លាំង កងរាជអាវុធហត្ថលើផ្ទៃប្រទេស និងជាប្រធានក្រុមការងារទី១ នៃអនុគណៈកម្មការជ្រើសរើសយោធិននៃកងរាជអាវុធហត្ថ រួមជាមួយ លោកឧត្តមសេនីយ៍ត្រី សៀ ទីន មេបញ្ជាការ កងរាជអាវុធហត្ថខេត្តសៀមរាប បានអញ្ជើញដឹកនាំ សមាជិកក្រុមការងារជ្រើសរើសយោធិននៃកងរាជអាវុធហត្ថ ចូលរួមកិច្ចប្រជុំបិទបញ្ចប់ ស្ដីពីការប្រឡងធ្វើតេស្តសមត្ថភាពជាក់ស្តែង ដល់បេក្ខជនដែលបានដាក់ពាក្យស្ម័គ្រចិត្តចូលបម្រើការងារក្នុងក្របខណ្ឌកងរាជអាវុធហត្ថ ក្រោយពីបានដំណើរការត្រួតពិនិត្យ និងប្រឡងធ្វើតេស្តសមត្ថភាពបេក្ខជន អស់រយៈពេល ៣ថ្ងៃកន្លងមក។
ក្នុងរយៈពេល ៣ថ្ងៃនេះ ក្រុមការងារបានអនុវត្តយ៉ាងសកម្ម ប្រកបដោយស្មារតីទទួលខុសត្រូវខ្ពស់ លើការផ្សព្វផ្សាយ ណែនាំពីនីតិវិធី នៃការជ្រើសរើស ការត្រួតពិនិត្យលក្ខណៈសម្បត្តិ និងឯកសាររដ្ឋបាលផ្សេងៗ ការពិនិត្យកាយសម្បទា ការរៀបចំការប្រឡងធ្វើតេស្តសមត្ថភាពជាក់ស្តែងដល់បេក្ខជន ប្រកបដោយភាពតឹងរ៉ឹង តម្លាភាព និងយុត្តិធម៌។
កិច្ចប្រជុំបិទនេះ ត្រូវបានរៀបចំឡើងដើម្បីបូកសរុបលទ្ធផលការងារ វាយតម្លៃចំណុចខ្លាំង និងចំណុចខ្វះខាត ព្រមទាំងប្រមូលផ្តុំឯកសារទាំងអស់ជូនអនុគណៈកម្មការជ្រើសរើសយោធិន នៃកងរាជអាវុធហត្ថដើម្បីបន្តនីតិវិធីបូកសរុប និងប្រកាសលទ្ធផលជាផ្លូវការនាពេលខាងមុខ៕
