បើទីតាំងល្បែងស៊ីសងមាន់ជល់ នឹងអាប៉ោងមួយកន្លែង ស្ថិតនៅក្នុងចំការកៅស៊ូ ទឹកដីភូមិរោងគោ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំនៅតែបន្តលេង យ៉ាងនេះតើភូមិឃុំមានសុវត្ថិភាពនៅឯណា..?

ដោយមានអង្គភាពសារព័ត៌មានក្នុងស្រុកមួយចំនួនបានធ្វើការចេញផ្សាយដូចនេះថា៖
ទីតាំងល្បែងស៊ីសងជល់មាន់ នឹងអាប៉ោងខុសច្បាប់មួយកន្លែងស្ថិតនៅ ភូមិរោងគោ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ កំពុងរងការរិះគន់យ៉ាងខ្លាំងពីមហាជន បន្ទាប់ពីសមត្ថកិច្ចនគរបាលថ្នាក់ស្រុក និងស្នងការខេត្ត បានបង្ហាញភាពអសកម្មមិនព្រមចុះអន្តរាគមន៍បង្ក្រាប និងគេចវេសមិនទទួលខុសត្រូវតាមការរាយការណ៍របស់ក្រុមអ្នកសារព័ត៌មាន។

កាលពីថ្ងៃទី១៨ ខែតុលា ឆ្នាំ២០២៦ អ្នកសារព័ត៌មានយើងបានចុះស្រាវជ្រាវដល់ទីតាំងផ្ទាល់បានឱ្យដឹងថា ពួកគេបានទាក់ទងរាយការណ៍ផ្ទាល់ទៅលោកវរសេនីយ៍ឯក សាំ ហេង អធិការនគរបាលស្រុកត្បូងឃ្មុំ អំពីសកម្មភាពល្បែងស៊ីសងខាងលើលោកអធិការបានឆ្លើយតបថា នឹងចុះមកពិនិត្យទីតាំងកើតហេតុ ប៉ុន្តែបន្ទាប់ពីអ្នកសារព័ត៌មាន រង់ចាំអស់រយៈពេលប្រហែល២ ទៅ ៣ម៉ោង នៅតែគ្មានវត្តមានសមត្ថកិច្ចណាម្នាក់ចុះមកបង្ក្រាបឡើយ លុះអ្នកសារព័ត៌មានព្យាយាមទូរស័ព្ទសួរនាំបន្ថែម លោកអធិការ សាំ ហេង លែងលើកទូរស័ព្ទ និងមិនព្រមបើកមើលសារតាមប្រព័ន្ធតេឡេក្រាម (Telegram) ផងដែរ។

ចំណែកឯលោកឧត្តមសេនីយ៍ទោ ចិន នី ស្នងការនគរបាលខេត្តត្បូងឃ្មុំបាននិយាយឆ្លើយតបបានតែ ២ ទៅ ៣ ម៉ាត់ ប៉ុណ្ណោះ ក៏ប្រញាប់ចុចផ្តាច់ទូរស័ព្ទចោល ហើយនៅពេលក្រុមអ្នកសារព័ត៌មាន ព្យាយាមទាក់ទងជាបន្តបន្ទាប់ លោកលែងទទួលការហៅចូលដូចគ្នា នេះសបញ្ជាក់ឱ្យឃើញយ៉ាងច្បាស់ពីការគេចវេស មិនព្រមចាត់កម្លាំងចុះអន្តរាគមន៍ឬយ៉ាងណា?

ដោយឃើញពីភាពមិនប្រក្រតី និងការមិនសហការពីសំណាក់ថ្នាក់ដឹកនាំកងកម្លាំងទាំងពីររូប ក្រុមអ្នកសារព័ត៌មានបានរាយការណ៍ផ្ទាល់ជូន ឯកឧត្តម ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ ក្រោយពីទទួលបានព័ត៌មាន ឯកឧត្តមអភិបាលខេត្តបានចេញបទបញ្ជាជាបន្ទាន់ទៅកាន់ស្នងការដ្ឋាននគរបាលខេត្ត ដើម្បីឱ្យចាត់វិធានការចុះបង្ក្រាបទីតាំងល្បែងស៊ីសងនោះភ្លាមៗផងដែរ ព្រមទាំងបានថ្លែងអំណរគុណដល់អ្នកសារព័ត៌មានដែលបានជួយធ្វើជាកញ្ចក់ឆ្លុះបញ្ចាំងពីបញ្ហាក្នុងមូលដ្ឋានដែលមន្ត្រីមួយចំនួនអសកម្មក្នុងការបង្ក្រាបការបើកឱ្យលេងល្បែងស៊ីសងខុសច្បាប់ទាំងនេះ។

ក្នុងករណីនេះផងដែរ មហាជនគ្រប់មជ្ឈដ្ឋានកំពុងរង់ចាំតាមដានមើលថា តើបទបញ្ជារបស់ឯកឧត្តមអភិបាលខេត្តដែលបានប្រើកណ្ដាប់ដីដែកនឹងបញ្ជាមន្ត្រីក្រោមឱវាទ រួមទាំងសមត្ថកិច្ចនគរបាលខេត្តត្បូងឃ្មុំឱ្យចុះបង្ក្រាបជាក់ស្តែងភ្លាមៗនោះ តើមានប្រសិទ្ធភាពបានរយៈពេលប៉ុន្មានថ្ងៃ ខែទៅ? ហើយក៏បានថ្លែងអំណរគុណទៅដល់ឯកឧត្តមអភិបាលខេត្ត និងសុំសំណូមពរឱ្យឯកឧត្តមបន្តប្រើកណ្តាប់ដៃដែកចុះបង្ក្រាបទីតាំងល្បែងស៊ីសងខុសច្បាប់ជាបន្តទៅទៀត ដើម្បីរក្សាបាននូវភូមិឃុំមានសុវត្ថិភាព ឱ្យស្របទៅតាមប្រសាសន៍របស់ប្រមុខរាជរដ្ឋាភិបាលដែលបានដាក់ចុះឱ្យថ្នាក់ក្រោមអនុវត្តផងដែរ។

ជុំវិញការចុះផ្សាយខាងលើ អង្គភាពយើងខ្ញុំ នឹងរង់ចាំទទួលការបកស្រាយបំភ្លឺ បន្ថែមពីគ្រប់ភាគី ដែលពាក់ព័ន្ធគ្រប់ពេលរៀងរាល់ម៉ោងធ្វើការ៕សូមអរគុណ!