ព្រះវិហារ៖ លោក គីម រិទ្ធី អភិបាលខេត្តព្រះវិហារ អមដំណើរដោយលោក យុង គឹមហ៊ាន អភិបាលរងខេត្ត លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ និងលោក ហោ ប៊ុនហួរ អភិបាលស្រុករវៀង នៅព្រលប់ថ្ងៃទី២២ ខែកក្កដា ឆ្នាំ២០២៦ បានដឹកនាំមន្ត្រីពាក់ព័ន្ធជាច្រើនរូប ចុះសួរសុខទុក្ខអ្នកជំងឺ ដែលកំពុងសម្រាកព្យាបាលនៅមណ្ឌលសុខភាពភ្នំដែក ស្រុករវៀង ដែលសង្ស័យកើតជំងឺគ្រុនឈាម និងដើម្បីលើកទឹកចិត្ត និងពិនិត្យមើលស្ថានភាពនៃការផ្តល់សេវាព្យាបាល។
ក្នុងឱកាសនោះលោកអភិបាលខេត្តព្រះវិហារ បាននាំយកអំណោយជា ឃីតដំណេក របស់សាខាកាកបាទក្រហមកម្ពុជាខេត្តព្រះវិហារ និងថវិការបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ប្រគល់ជូនអ្នកជំងឺ ដើម្បីជួយសម្រាលការលំបាក និងជាកម្លាំងចិត្តក្នុងអំឡុងពេលសម្រាកព្យាបាល។
ជាមួយគ្នានេះលោក គីម រិទ្ធី បានថ្លែងកោតសរសើរ និងវាយតម្លៃខ្ពស់ចំពោះក្រុមគ្រូពេទ្យ និងបុគ្គលិកសុខាភិបាល ដែលបានខិតខំបំពេញភារកិច្ចដោយការទទួលខុសត្រូវខ្ពស់ ក្នុងការពិនិត្យ ថែទាំ និងព្យាបាលអ្នកជំងឺទាន់ពេលវេលា។
លោកអភិបាលខេត្តព្រះវិហារ ក៏បានថ្លែងអំពាវនាវដល់ប្រជាពលរដ្ឋទាំងអស់ ឱ្យបង្កើនការប្រុងប្រយ័ត្ន និងចូលរួមអនុវត្តវិធានការបង្ការជំងឺគ្រុនឈាម ដោយលុបបំបាត់រាល់វត្ថុដក់ទឹកនៅជុំវិញផ្ទះ បិទគម្របធុងទឹកឱ្យបានជិត សម្អាតបរិស្ថានឱ្យបានស្អាត និងបើសិនជាមានអាការក្តៅខ្លួនខ្លាំង ឬសង្ស័យជំងឺគ្រុនឈាម ត្រូវប្រញាប់ទៅពិនិត្យ និងព្យាបាលនៅមណ្ឌលសុខភាព ឬមន្ទីរពេទ្យដែលនៅជិតបំផុត ដោយមិនត្រូវពន្យារពេល ឬព្យាបាលដោយខ្លួនឯងឡើយ។
ដោយឡែកលោកវេជ្ជបណ្ឌិត គួង ឡូ បានថ្លែងបញ្ជាក់ថា មន្ទីរសុខាភិបាលខេត្តព្រះវិហារ បានត្រៀមកម្លាំងមន្ត្រីសុខាភិបាល ឱសថ សម្ភារៈបរិក្ខារពេទ្យ និងបង្កើនការតាមដានស្ថានភាពជំងឺគ្រុនឈាមជាប្រចាំ ដើម្បីធានាថាប្រជាពលរដ្ឋទទួលបានសេវាសុខាភិបាលប្រកបដោយគុណភាព និងទាន់ពេលវេលា។
ការចុះសួរសុខទុក្ខរបស់ថ្នាកលដឹកនាំខេត្តព្រះវិហារទាំងព្រលប់បែបនេះ បានឆ្លុះបញ្ចាំងពីការយកចិត្តទុកដាក់ និងវិស័យសុខាភិបាល ចំពោះសុខុមាលភាពរបស់ប្រជាពលរដ្ឋ ព្រមទាំងជាការលើកទឹកចិត្តដល់អ្នកជំងឺ និងក្រុមគ្រួសារ ឱ្យមានទំនុកចិត្តលើការព្យាបាល និងចូលរួមសហការក្នុងការទប់ស្កាត់ការរីករាលដាលនៃជំងឺគ្រុនឈាមនៅក្នុងសហគមន៍៕
