ខេត្តកណ្តាល៖ ក្នុងគោលបំណងធ្វើការផ្សព្វផ្សាយ ក៏ដូចជាការក្រើនរំឭកបំផុសស្មារតីស្រឡាញ់វប្បធម៌ និងមនសិការ ស្នេហាជាតិ ដល់ប្រជាជន មហាជន ជាពិសេសក្នុងស្រទាប់យុវជនឱ្យមានការចូលរួមដោយស្មារតីទទួលខុសត្រូវ ក្នុងកិច្ចអភិរក្ស និងលើកស្ទួយតម្លៃនៃវប្បធម៌ជាតិ ដែលជាកាតព្វកិច្ចរបស់យើងទាំងអស់គ្នា នាព្រឹកថ្ងៃទី១៧ ខែកក្កដា ឆ្នាំ២០២៦ មន្ទីរវប្បធម៌ និងវិចិត្រសិល្បៈខេត្តកណ្ដាល បានរៀបចំកម្មវិធីផ្សព្វផ្សាយច្បាប់ស្តី អំពីកិច្ចការពារសម្បត្តិបេតិកភណ្ឌជាតិ ក្រោមប្រធានបទ “យុវជនដើម្បីបេតិកភណ្ឌជាតិ” ជូនដល់លោកគ្រូ-អ្នកគ្រូ សិស្សានុសិស្ស នៅវិទ្យាល័យ ហ៊ុន សែន ស្អាង ស្ថិតនៅឃុំព្រែកគយ ស្រុកស្អាង ខេត្តកណ្ដាល។
លោក ធឹម សំអុល អនុប្រធានមន្ទីរវប្បធម៌ខេត្តកណ្ដាល បានអោយដឹងថា៖ ខេត្តកណ្តាល សម្បូរទៅដោយសម្បត្តិបេតិកភណ្ឌវប្បធម៌យ៉ាងសម្បូរបែបទាំងរូបី និងអរូបី គឺសំដៅលើកកម្ពស់ការយល់ដឹងក្នុងកិច្ចការពារសម្បត្តិបេតិកភណ្ឌវប្បធម៌ជាតិ រួមចំណែកអភិរក្ស ថែរក្សាឱ្យបានគង់វង្សនូវកេរដំណែលវប្បធម៌របស់បុព្វបុរសយើង ដែលបានកសាងទុកជាតឹកតាងប្រវត្តិសាស្ត្រ អំពីការកកើត ជីវភាពរស់នៅ ការវិវឌ្ឍន៍ពីសម័យកាលមួយទៅសម័យកាលមួយនៃដូនតាខ្មែរយើង។ ។
លោក អនុប្រធានមន្ទីរវប្បធម៌ខេត្ត បានបន្តទៀតថា៖ ជាការពិតណាស់ ការថែរក្សា ការពារ ស្ថានីយបុរាណ វត្ថុបុរាណ និងសម្បត្តិបេតិកភណ្ឌវប្បធម៌ដទៃទៀត មិនមែនត្រឹមតែជាភារកិច្ចរបស់ក្រសួងវប្បធម៌ ឬអាជ្ញាធរខេត្ត ស្រុក ឃុំ តែម្ខាងនោះទេ គឺទាមទារមានការចូលរួមចំណែកយ៉ាងសកម្មពីសំណាក់ ប្រជាពលរដ្ឋ និងយុវជនជំនាន់ក្រោយ ក្នុងមូលដ្ឋាន ហើយការថែរក្សា ការពារសម្បត្តិបេតិកភណ្ឌទាំងនោះ ក៏មិនមែនជាប្រយោជន៍របស់បុគ្គលណាម្នាក់នោះដែរ គឺដើម្បីប្រជាពលរដ្ឋក្នុងមូលដ្ឋាន និងដើម្បីជាតិយើងទាំងមូល ដែលរក្សាបាននូវតឹកតាងប្រវត្តិសាស្ត្រ បង្ហាញអំពីអត្តសញ្ញាណរបស់ជាតិ ដែលបានកកើតតាំងពីយូរលង់ណាស់មកហើយ ដែលមិនអាចឱ្យជាតិសាសន៍ណាមកបំភ្លៃបានឡើយ ព្រោះយើងមានភស្តុតាងជាក់ស្តែងនៅទីនេះ ហើយកូនចៅជំនាន់នេះ និងជំនាន់ក្រោយៗ បន្តសិក្សា ស្រាវជ្រាវឱ្យបានកាន់តែស៊ីជម្រៅនូវប្រវត្តិសាស្ត្ររបស់ជាតិយើង៕
