ពិតជាមិនធម្មតាមែនលោក អោម ដឺលុច បានគៀងគរមនុស្សមួយក្រុមទៅធ្វើសកម្មភាពខួងរុករករ៉ែមាសបំផ្លិចបំផ្លាញធនធានធម្មជាតិនៅក្នុងដែនជំរកសត្វព្រៃព្រៃឡង់ “គឺមិនមានច្បាប់អនុញ្ញាត” នៅត្រង់ចំណុចថ្មពួយជើងភ្នំជីជាប់ព្រំប្រទល់ខេត្តក្រចេះ នឹងខេត្តកំពង់ធំ…វគ្គ១

ខេត្តក្រចេះ÷បើយោងតាមអង្គភាពសារព័ត៌មានក្នុងស្រុកមួយចំនួនបានចុះផ្សាយកាលពីថ្ងៃទី១៥ ខែកក្កដា ឆ្នាំ២០២៦ថាមានមនុស្សមួយក្រុមបានធ្វើសកម្មភាពខួងរុករករ៉ែមាសបំផ្លិចបំផ្លាញធនធានធម្មជាតិនៅក្នុងដែនជំរកសត្វព្រៃព្រៃឡង់ត្រង់ចំណុចថ្មពួយជើងភ្នំជី ស្ថិតនៅភូមិយាវ ឃុំកំពង់ចាម ស្រុកសំបូរ  ខេត្តក្រចេះ ជាប់នឹងព្រំប្រទល់នឹងខេត្តកំពង់ធំ នៅត្រង់ចំណុចយាមការ.៤៨P ៥៧២៨៩៩ ១៤២៩៨៨០ ក្នុងនោះគេស្គាល់មេខ្លោងឈ្មោះ អោម ដឺលុច ដែលមានអាស័យដ្ធានរស់នៅផ្ទះលេខ 26 J ផ្លូវលេខ ១៨១ ភូមិក្ដីតាកុយ សង្កាត់វាលស្បូវ  ខណ្ឌច្បារអំពៅ រាជធានីភ្នំពេញ ។
ប្រសិនបើអាជ្ញាធរមានសមត្ថកិច្ច និងមន្ត្រីជំនាញក្នុងមូលដ្ឋានមិនបានយកចិត្តទុកដាក់ការពារទប់ស្កាតហាមឃាត់បង្ក្រាបបទល្មើសទាំងនេះទេ សកម្មភាពខួងរុករករ៉ែមាស និងបន្តរីករាលដាលក្លាយទៅជាភាពអាណាធិបតេយ្យគ្មានច្បាប់ទម្លាប់ ប៉ុន្តែបើអាជ្ញាធរមានសមត្ថកិច្ចជំនាញក្នុងមូលដ្ឋានដឹងដែរ តែយោគយល់មិនបង្ក្រាបមានន័យថានេះជាអំពើឃុបឃិតគ្នាជាមួយក្រុមឈ្ងួញដោយខុសច្បាប់ ឬជាអំពើពុករលួយក៏ថាបានដែរ។

ប្រភពដដែលបានបន្តទៀតថាឈ្មោះ អោម ដីលុច មានតួនាទីជាប៉េអឹមបម្រើការងារនៅក្នុងខេត្តកំពង់ធំ។ និងជាមេខ្លោងបាននាំបក្សពួកទៅខួងរុករករ៉ែមាសបំផ្លិចបំផ្លាញធនធានធម្មជាតិនៅក្នុងដែនជំរកសត្វព្រៃ “គឺមិនមានច្បាប់អនុញ្ញាតរុករករ៉ែ និងមិនមានច្បាប់អាជីវកម្មរ៉ែនោះទេ”។

ប្រភពបានបន្តទៀតថាការខួងរុករករ៉ែមាសនេះលោក អោម ដឺលុច បានប្រើរំសេវបំផ្ទុះបំបែកយកអាចម៍រ៉ែយកមកកិនចេញជារ៉ែមាស ធ្វើឲ្យរំខាន និងប៉ះពាល់ដល់បងប្អូនប្រជាពលរដ្ឋនៅទីនោះ ខណៈសកម្មភាពខួងរុករករ៉ែខាងលើនេះជាងកន្លះខែមកហើយ.តែអាជ្ញាធរមានសមត្ថកិច្ច និងមន្ត្រីជំនាញក្នុងមូលដ្ឋានកំពុងរក្សាភាពស្ងៀមស្ងាត់ .សង្ស័យត្រូវមន្តអាគមបន្ទន់ឆ្អឹងអស់ហើយទេដឹង?​។

ពាក់ព័ន្ធករណីនេះដែរអង្គភាពសារព័ត៌មានយើងមិនអាចរកប្រភពណាមួយសុំការបកស្រាយបំភ្លឺពីលោក អោម ដឺលុច បានទេរហូតមកដល់ម៉ោងចេញផ្សាយនេះ ។

ដោយឡែកប្រធានមន្ទីរបរិស្ថានខេត្តក្រចេះលោក គា ប៊ូ អង្គភាពសារព័ត៌មានយើងព្យាយាមទំនាក់ទំនងទៅលោកតែទូរសព្ទបិទមិនអាចទាក់ទងបាន។ និងបន្តផ្ញើសារតាមប្រព័ន្ធ តេឡេក្រាម ទៅលោកបន្ថែម តែមិនទាន់ឃើញលោកចូលមើល រហូតមកដល់ម៉ោងចេញផ្សាយនេះ។

គួររំលឹកផងដែរថាកាលពីកំឡុងឆ្នាំ២០២៤ពាក់ព័ន្ធនឹងទីតាំងខួងរុកររករ៉ែមាសខាងលើនេះដែរ ត្រូវបានអយ្យការអមសាលាដំបូងខេត្តក្រចេះ ចេញដីកាកោះហៅអ្នកពាក់ព័ន្ធឱ្យចូលទៅបំភ្លឺ រឿងធ្វើអាជីវកម្មរ៉ែមាសដោយគ្មានការអនុញ្ញាត. និងឲ្យផ្អាកដំណើរការខួងរុករករ៉ែមាស  តែក្រុមឈ្មួញខាងលើនេះនៅតែបន្តលួច ធ្វើសកម្មភាពខួងរុករករ៉ែមាសយ៉ាងអាណាធិបតេយ្យ ដោយ​ឥតខ្លាចញញើតច្បាប់នោះឡើយ។

យោងតាមមន្ត្រីជំនាញម្នាក់សុំលក្ខខណ្ឌមិនបញ្ចេញឈ្មោះ បានលើកឡើងថាករណីខួងរុករុករ៉ែមាសនេះលុះត្រាតែមានច្បាប់អនុញ្ញាតគឺច្បាប់អនុញ្ញាតស្វែងរករ៉ែពីក្រសួងរ៉ែ និងថាមពលទើបអាចដំណើរការបាន មិនមែនដើរធ្វើសកម្មភាពខួងយ៉ាងអនាធិបតេយ្យបែបនេះ គឺខុសច្បាប់ហើយ។

គួររំលឹកថាបើអាជ្ញាធរសមត្ថកិច្ចជំនាញក្នុងមូលដ្ឋានមិនយកចិត្តទុកទប់ស្កាត់បង្ក្រាបលើក្រុមឈ្មួញទាំងនេះទេគឺស្មើរនឹង”កន្ទេលធំបន្លំដេក”ដែលជាឱកាសសម្រាប់ក្រុមឈ្មួញធ្វើសកម្មភាពទាំងនេះដោយអាណាធិបតេយ្យ។

ដូច្នេះស្នើសុំសមត្ថកិច្ចថ្នាក់លើសូមមេត្តាស្រាវជ្រាវតាមជំនាញរបស់ខ្លួនដើម្បីការពារទ្រព្យសម្បត្តិធនធានធម្មជាតិរបស់ជាតិយើង។

អង្គភាព​សារព័ត៌មាន​យយេីង ចុះផ្សាយខាងលើនេះដោយយោងទៅតាមប្រភព. និងស្របតាមក្រមសីលធម៌​ វិជ្ជាជីវៈ និងធម្មនុញ្ញ វិជ្ជាជីវៈ​សារព័ត៌មាន​ ពុំបាន​មូលបង្កាច់​បង្ខូច​កេរ្ដិ៍ឈ្មោះ​ និង​សេចក្ដី​ថ្លៃថ្នូរ​ អាជ្ញាធរ និងអ្នកពាក់ព័ន្ធណាមួយនោះឡើយ. អង្គភាពសារព័ត៌មានយើង នឹងរងចាំទទួលការបកស្រាយបំភ្លឺពីស្ថាប័ន ពាក់ពន្ធ័ នៅរៀងរាល់ម៉ោងធ្វើការ តាមច្បាប់ស្តីពីរបបអ្នកសារព័ត៌មាននៅកម្ពុជា៕(នៅមានត)សូមអរគុណ!​