នៅព្រឹកថ្ងៃទី៤ ខែកក្កដា ឆ្នាំ២០២៦ ឯកឧត្ដម ង៉ូវ បូរីណា រដ្ឋលេខាធិការក្រសួងបរិស្ថាន និងជាអនុប្រធានទី២ ក្រុមការងារគណបក្សចុះមូលដ្ឋានស្រុក បានអញ្ជើញចុះបំពេញបេសកកម្មពិនិត្យ និងតាមដានវឌ្ឍនភាពការងារបរិស្ថាន ក្នុងមូលដ្ឋានស្រុកអូររាំងឪ ខេត្តត្បូងឃ្មុំ។
ក្នុងឱកាសនោះ ឯកឧត្ដមបានអញ្ជើញចុះពិនិត្យស្ថានភាពកូនឈើដែលបានដាំកាលពីខែកក្កដា ឆ្នាំ២០២៥ ស្ថិតនៅភូមិទួលតាហោ ឃុំគងជ័យ ស្រុកអូររាំងឪ ដោយបានពិនិត្យពីការលូតលាស់ និងស្ថានភាពថែរក្សា ដើម្បីធានាថាការដាំដើមឈើទទួលបានប្រសិទ្ធភាព និងចីរភាព។
បន្ថែមពីនេះ ឯកឧត្ដមក៏បានអញ្ជើញចុះពិនិត្យការងារថ្នាលបណ្តុះកូនឈើថ្នាក់តំបន់ខេត្តត្បូងឃ្មុំ និងបានសំណេះសំណាលជាមួយបងប្អូនបុគ្គលិកដែលកំពុងបំពេញភារកិច្ចថែទាំ និងគ្រប់គ្រងស្ថានីយ៍កូនឈើ។ ក្នុងជំនួបនោះ ឯកឧត្ដមបានលើកទឹកចិត្ត និងណែនាំឲ្យបន្តយកចិត្តទុកដាក់ខ្ពស់ក្នុងការថែរក្សា និងអភិវឌ្ឍធនធានព្រៃឈើ ដើម្បីចូលរួមចំណែកការពារបរិស្ថាន និងលើកកម្ពស់ជីវភាពសហគមន៍។
សកម្មភាពនេះបង្ហាញពីការយកចិត្តទុកដាក់ និងការខិតខំប្រឹងប្រែងរបស់ថ្នាក់ដឹកនាំ ក្នុងការជំរុញការដាំដើមឈើ ការអភិរក្សធនធានធម្មជាតិ និងការអភិវឌ្ឍបរិស្ថានឲ្យកាន់តែប្រសើរឡើង៕
