ខេត្តបាត់ដំបង៖ ផ្សាយចេញពីអង្គភាពហ៊ុន ពិសិដ្ឋធីវីញូស៍ អ្វីដែលធ្វើឲ្យអតីតសមាជិកសមាជិកាគណបក្សជំទាស់ចំនួន២៥០នាក់សម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជានាពេលនេះ ព្រោះតែបងប្អូនមើលឃើញថាមានតែគណបកសប្រជាជនកម្ពុជាប៉ុណ្ណោះដែលមានសមត្ថភាពដឹកនាំនាវាកម្ពុជាឆ្ពោះទៅរកការអភិវឌ្ឍរីកចម្រើន និងរក្សាបាននូវសុខសន្តិភាពយ៉ាងពិតប្រាកដ។
ពិធីប្រកាសទទួលស្គាល់សមាជិកសមាជិការថ្មូីនេះរៀបចំធ្វើឡើងនៅថ្ងៃពុធ១០រោជ ខែជេស្ឋ អដ្ឋស័ក្ដិ ព ស ២០៥៧០ ត្រូវនឹងថ្ងៃទី១០ ខែ មិថុនា ឆ្នាំ២០២៦ នៅស្នាក់ការគណបក្សប្រជាជនកម្ពុជាស្រុកសំពៅលូន ខេត្ត បាត់ដំបង។
ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ភឺន ផល្លា ជំនួយការផ្ទាល់សម្តេចអគ្គមហាសេនាបតីតេជោ ហ៊ុន សែន សមាជិកគណៈកម្មាធិការកណ្តាល និងជាអនុប្រធានក្រុមការងារចលនាកសាងសមាជិកគណបក្សប្រជាជនកម្ពុជានៅមូលដ្ឋានរាជធានី-ខេត្ត និងមានការចូលរួមពីឯកឧត្តម សួន សារុន ប្រធានមន្ទីរគណបក្សខេត្តបាត់ដំបង និង ឯកឧត្តម នី កន អនុប្រធានក្រុមការងារគណបក្សប្រជាជនកម្ពុជាចុះជួយស្រុកសំពៅលូន និងមានការចូលរួមពីសមាជិកសមាជិកាគណបក្សស្រុកសំពៅលូនជាច្រើននាក់ផងដែរ។
ថ្លែងក្នុងពិធីនោះដែរ ឯកឧត្តម ភឺន ផល្លា បានពាំនាំនូវការផ្តាំផ្ញើសាកសួរសុខទុក្ខពីសំណាក់ថ្នាក់ដឹកនាំគណបក្សប្រជាជនកម្ពុជាចំពោះសមាជិក សមាជិកាគណបក្សប្រជាជនកម្ពុជាទាំងអស់ ជាពិសេសបងប្អូនដែលទើបនឹងសម្រេចចិត្តចូលរួមជីវភាពនយោបាយជាមួយគណបក្សប្រជាជនកម្ពុជានាពេលនេះ។
ឯកឧត្តមក៏បានថ្លែងអំណរគុណយ៉ាងជ្រាលជ្រៅដល់បងប្អូនទាំងអស់ ដែលបានជឿជាក់លើគណបក្សប្រជាជនកម្ពុជា ដែលមានសម្ដេចអគ្គមហាសេនាបតីតេជោហ៊ុន សែនជាប្រមុខដឹកនាំដ៍ឈ្លាសវៃនិងបុិនប្រសប់ ដែលអស់លោក លោកស្រីបានផ្តល់នូវសេចក្តីទុកចិត្តចំពោះសម្តេចប្រមុខថ្នាក់ដឹកនាំ ក៏ដូចជាជឿជាក់លើគោលនយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា ។
ឯកឧត្តម បានបន្ថែមថា ការសម្រេចចិត្តចូលរួមរស់ក្នុងជីវភាពនយោបាយជាមួយគណបក្សប្រជាជនកម្ពុជារបស់បងប្អូននាឱកាសនេះ គឺជាការសម្រេចចិត្តដ៏ត្រឹមត្រូវបំផុត ហើយក៏ជាការចូលរួមចំណែកអភិវឌ្ឍន៍សេដ្ឋកិច្ច សង្គម ឱ្យកាន់តែមានភាពរីកចម្រើនរុងរឿង ប្រកបដោយសាមគ្គីភាព ឯកភាពជាតិ និងឯកភាពទឹកដី ក្រោមម្លប់នៃសន្តិភាព។
ឆ្លៀតក្នុងឱកាសនេះផងដែរ ឯកឧត្តម ភឺន ផល្លា ក៏បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំ ក៏ដូចជាក្រុមការងារនៃក្រុមចលនាកសាងសមាជិកគណបក្សប្រជាជនកម្ពុជានៅមូលដ្ឋានរាជធានី-ខេត្ត ដែលបានអនុវត្តយ៉ាងសកម្មក្នុងការកសាង និងពង្រីកសមាជិក-សមាជិកាថ្មី ព្រមទាំងយកចិត្តទុកដាក់ខ្ពស់ក្នុងការដោះស្រាយរាល់សំណូមពរ និងបម្រើផលប្រយោជន៍ជូនបងប្អូនប្រជាពលរដ្ឋនៅមូលដ្ឋាននាពេលកន្លងមក។
ឯកឧត្តមបន្ដថា មានតែគណបក្សប្រជាជនកម្ពុជាទេដែលមានសមត្ថភាពដឹកនាំនាវាកម្ពុជាឆ្ពោះទៅការអភិវឌ្ឍស្មើមុខស្មើមាត់លើឆាកអន្ដរជាតិ និងរក្សាបាននូវសុខសន្ដិភាពប្រកបដោយចីរភាពតរៀងទៅ៕
