ភ្នំពេញ៖ កម្លាំងចម្រុះគណៈបញ្ជាការឯកភាពរដ្ឋបាលរាជធានីភ្នំពេញ នាថ្ងៃទី០៦ ខែមិថុនា ឆ្នាំ២០២៦ បានចុះត្រួតពិនិត្យរដ្ឋបាលទីតាំងខុនដូរ URBAN VILLAGE អគារ E-F-G-H ផ្លូវ៦០ម៉ែត្រ ខណ្ឌមានជ័យ រកឃើញជនបរទេសចំនួន ២០នាក់ និងមានជាប់ពាក់ព័ន្ធបទល្មើស Online Scams ចំនួន ៦នាក់។
ប្រតិបត្តិការនេះធ្វើឡើងក្រោមការបញ្ជាផ្ទាល់របស់លោក ឃួង ស្រេង អភិបាលរាជធានីភ្នំពេញ, លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ និងលោកឧត្តមសេនីយ៍ឯក រ័ត្ន ស្រ៊ាង មេបញ្ជាការរងអាវុធហត្ថលើផ្ទៃប្រទេស និងជាមេបញ្ជាការកងរាជអាវុធហត្ថរាជធានីភ្នំពេញ បានបន្តចុះធ្វើរដ្ឋបាល និងស្រាវជ្រាវ បង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scmas)។
កម្លាំងចម្រុះគណៈបញ្ជាការឯកភាពរដ្ឋបាលរាជធានីភ្នំពេញ និងគណៈបញ្ជាការឯកភាពរដ្ឋបាលខណ្ឌមានជ័យ ដឹកនាំដោយលោក ហួត ហៃ និងលោក សុខ ពេញវុធ អភិបាលរងរាជធានីភ្នំពេញ និងលោក សេង គន្ធ អភិបាលខណ្ឌ ឧត្តមសេនីយ៍ទោ ប៊ុន សុសិក្ខា, ឧត្តមសេនីយ៍ទោ ចាន់ គ្រឹស្នា និងលោកស្រី ឆេង សារ៉េត ស្នងការរង និងមេបញ្ជាការរងកងរាជអាវុធហត្ថរាជធានីភ្នំពេញ និងមានការសម្របសម្រួលនីតិវិធីពី តំណាងអយ្យការ អមសាលាដំបូងរាជធានីភ្នំពេញ បានចុះត្រួតពិនិត្យរដ្ឋបាលទីតាំងខុនដូរ URBAN VILLAGE អគារ E-F-G-H ផ្លូវ៦០ម៉ែត្រ ភូមិព្រែកតានូ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។
ក្នុងកិច្ចប្រតិបត្តិការខាងលើកម្លាំងចម្រុះរកឃើញមនុស្សចំនួន ២០នាក់ (ស្រី២) មាន ២សញ្ជាតិ, ជនជាតិចិន ១៩នាក់ (ក្នុងនោះមានជនជាតិតៃវ៉ាន់ ០១នាក់ស្រី), ជនជាតិវៀតណាម ០១នាក់ (ស្រី)។ ក្នុងនោះមានជាប់ពាក់ព័ន្ធ Online Scams ០៦ នាក់ (ចិន) និងជាប់ពាក់ព័ន្ធស្នាក់នៅខុសច្បាប់ចំនួន ១៤នាក់។
សម្ភារវត្ថុតាងរកឃើញក្នុង បន្ទប់លេខ H៥៥-០៦ រួមមាន៖ កុំព្យូទ័រយួរដៃ ០៦គ្រឿង និងទូរស័ព្ទដៃចំនួន ៣២គ្រឿង។ ចំពោះមនុស្ស និងសម្ភារវត្ថុតាងខាងលើ បញ្ជូនទៅស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធី។ ចំពោះបន្ទប់ខាងលើ សម្រេចបិទឃ្លុំជាបណ្តោះអាសន្ន៕
