ភ្នំពេញ៖ថ្ងៃពុធ ៣រោច ខែជេស្ឋ ឆ្នាំមមី អដ្ឋស័ក ព.ស២៥៧០ ចាក់អង្រែលើ ថ្ងៃទី៣ ខែមិថុនា ឆ្នាំ២០២៦ លោក សេង គន្ធ អភិបាលនៃគណៈអភិបាលខណ្ឌមានជ័យ និងជាគណៈបញ្ជាការឯកភាពខណ្ឌមានជ័យ បានអញ្ជើញបើកការដ្ឋាន គម្រោងមូលនិធិអភិវឌ្ឍន៍សង្កាត់ឆ្នាំ២០២៦ ជួសជុលដាក់លូមូល រំដោះទឹកប្រវែង ៩៩៨ម៉ែត្រ អង្កត់ផ្ចិក ១ម៉ែត្រ និងស្លាកសញ្ញាគម្រោង ស្ថិតនៅភូមិព្រែកតាគង់១ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។ ក្នុងពិធីបើកការដ្ឋាននេះមានការចូលរួមពីថ្នាក់ដឹកនាំ មន្ត្រីរាជការ អាជ្ញាធរក្រុមការងារបច្ចេកទេស តំណាងក្រុមហ៊ុនអនុវត្តគម្រោង និងប្រជាពលរដ្ឋក្នុងមូលដ្ឋានជាច្រើនផងដែរ។
គម្រោងដាក់លូមូលរំដោះទឹកនេះ ត្រូវបានអនុវត្តឡើងក្នុងគោលបំណងពង្រឹងប្រព័ន្ធហេដ្ឋារចនាសម្ព័ន្ធរំដោះទឹកនៅក្នុងតំបន់ ស្របតាមផែនការអភិវឌ្ឍន៍មូលដ្ឋានរបស់រដ្ឋបាលសង្កាត់ និងរដ្ឋបាលខណ្ឌមានជ័យ។ គម្រោងនេះត្រូវបានរំពឹងថានឹងជួយបង្កើនប្រសិទ្ធភាពនៃការរំដោះទឹក កាត់បន្ថយការកកស្ទះ និងការជន់លិចទឹកក្នុងរដូវវស្សា ព្រមទាំងរួមចំណែកកែលម្អបរិស្ថាន និងសោភ័ណភាពនៅក្នុងសហគមន៍។
ក្នុងឱកាសនោះ លោក សេង គន្ធ អភិបាល នៃគណៈអភិបាលខណ្ឌមានជ័យ បានណែនាំដល់ក្រុមការងារបច្ចេកទេស និងក្រុមហ៊ុនទទួលម៉ៅការសាងសង់ ឱ្យអនុវត្តការងារតាមស្តង់ដារបច្ចេកទេស ធានាគុណភាព សុវត្ថិភាព និងតម្លាភាព ដើម្បីឱ្យគម្រោងសម្រេចបានតាមផែនការដែលបានកំណត់ និងអាចឆ្លើយតបទៅនឹងតម្រូវការរបស់ប្រជាពលរដ្ឋប្រកបដោយប្រសិទ្ធភាព។
គម្រោងមូលនិធិអភិវឌ្ឍន៍សង្កាត់ ឆ្នាំ២០២៦ នេះ គឺជាផ្នែកមួយនៃកិច្ចខិតខំប្រឹងប្រែងរបស់អាជ្ញាធរមូលដ្ឋានក្នុងការបន្តអភិវឌ្ឍហេដ្ឋារចនាសម្ព័ន្ធសាធារណៈ និងលើកកម្ពស់គុណភាពជីវភាពរស់នៅរបស់ប្រជាពលរដ្ឋនៅក្នុងខណ្ឌមានជ័យឱ្យកាន់តែប្រសើរឡើង៕
