បាត់ដំបង៖ បន្ទាប់ពីមានការបង្ហោះរូបភាពតាមបណ្តាញសង្គមហ្វេសប៊ុកពាក់ព័ន្ធទៅនឹងកំណាត់ផ្លូវមួយចំនួនក្នុងក្រុងបាត់ដំបងដែលរងការខូចខាត ក្រុមមន្ត្រីជំនាញនៃមន្ទីរសាធារណការនិងដឹកជញ្ជូនខេត្តបាត់ដំបង ដែលមានឯកឧត្ដម ព្រួញ រិទ្ធថា ទីប្រឹក្សាឯកឧត្ដមអភិសន្តិបណ្ឌិត ស សុខា និងជាប្រធានមន្ទីរសាធារណការនិងដឹកជញ្ជូនខេត្តបាត់ដំបង បាននាំយកគ្រឿងចក្រចុះធ្វើការជួសជុលកែលម្អ ដើម្បីសម្រួលដល់ការធ្វើដំណើររបស់បងប្អូនប្រជាពលរដ្ឋជាបណ្តោះអាសន្ន ។
ជាមួយគ្នានេះឯកឧត្ដម ព្រួញ រិទ្ធថា បានអំពាវនាវស្នើរសូមអោយមានការយោគយល់ពីសំណាក់បងប្អូនប្រជាពលរដ្ឋ ជាពិសេសអ្នកបាត់ដំបងតែម្តង ដោយគម្រោងផ្លូវទាំង ២១ខ្សែគឺដោយសារវាមានបញ្ហារឿងសង្រ្គាមសកលពិភពលោកធ្វើអោយមានបញ្ហាប្រេង គម្រោងក៏ត្រូវដឺឡេ ហើយអាចដើមខែ០៦នេះនឹងចាប់ផ្តើមនីតិវិធីដេញថ្លៃ។
ឯកឧត្តមបានបញ្ជាក់បន្ថែមថា ក្នុងនាមជាសេនាធិការអោយខេត្ត មន្ទីរបានត្រឹមជួយគៀសម្រួលបើទោះបីផ្លូវទាំងនោះមិនមែនជាដែនសមត្ថកិច្ចរបស់មន្ទីរ តែយើងជួយគៀសម្រួល ហើយបើក្រឡុកណាធំៗយើងចាក់ថ្មម៉ិច ដូច្នេះសូមមានការយោគយល់អធ្យាស្រ័យ ព្រោះបើយើងធ្វើជាលក្ខណៈទ្រង់ទ្រាយធំដូចយើងយកថវិកាទៅចោលទទេ ឧបមាថាបើយើងចាក់កៅស៊ូមួយជាន់បើសិនគម្រោងវាមកគេនឹងភ្ជួរចោលទាំងអស់ នេះហើយជាផលវិបាកហើយដោយឃើញខែវស្សាភ្លៀងក៏ចាប់ផ្តើមធ្លាក់ជាអន្លើៗអញ្ចឹងក្នុងនាមមន្ទីរជំនាញក៏ដូចជាសេនាធិការរបស់ខេត្តយើងត្រូវតែជួយសម្រួលដល់បងប្អូនប្រជាពលរដ្ឋក្នុងខេត្តដើម្បីអោយគាត់បានធ្វើដំណើរស្រួល ហើយមន្ទីរក៏នឹងជំរុញអោយខាងនាយកគម្រោងADB ជាពិសេសអោយនាយកគម្រោងគាត់ពិនិត្យតាមដាននីតិវិធីដេញថ្លៃអោយឆាប់រហ័សបំផុតដែលអាចធ្វើទៅបាន៕
