មន្ទីរសាធារណការខេត្តបាត់ដំបង សម្រុកបញ្ចេញគ្រឿងចក្រកែសម្រួលផ្លូវ «សំបុកមាន់» ក្នុងក្រុងភ្លាមៗ ក្រោយមេឃអំណោយផល

បាត់ដំបង៖ ទឹកភ្លៀងដែលបានធ្លាក់ចុះជាបន្តបន្ទាប់ប៉ុន្មានថ្ងៃជាប់គ្នាកន្លងមកនេះ បានធ្វើឱ្យហេដ្ឋារចនាសម្ព័ន្ធផ្លូវថ្នល់មួយចំនួនក្នុងក្រុងបាត់ដំបង (ស្ថិតក្នុងគម្រោង ADB) រងការខូចខាតយ៉ាងដំណំ និងបង្កការលំបាកយ៉ាងខ្លាំងដល់ការធ្វើដំណើររបស់ប្រជាពលរដ្ឋ។

យ៉ាងណាមិញ នៅថ្ងៃទី២១ ខែឧសភា ឆ្នាំ២០២៦នេះ ស្របពេលអាកាសធាតុមានភាពស្រឡះល្អ ក្រុមបច្ចេកទេសនៃមន្ទីរសាធារណការ និងដឹកជញ្ជូនខេត្តបាត់ដំបង បានបញ្ចេញគ្រឿងចក្រធុនធ្ងន់ជាច្រើនគ្រឿង ដើម្បីសម្រុកឈូសឆាយ ចាក់ថ្មម៉ិច និងកៀរពង្រាបផ្លូវដែលរងការខូចខាតទាំងនោះ ក្នុងគោលបំណងសម្រួលដល់ការធ្វើដំណើរជាបណ្តោះអាសន្នជូនប្រជាពលរដ្ឋ។
លោក ព្រួញ រិទ្ធថា ប្រធានមន្ទីរសាធារណការ និងដឹកជញ្ជូនខេត្តបាត់ដំបង បានបញ្ជាក់ឱ្យដឹងថា ក្រោមការយកចិត្តទុកដាក់ខ្ពស់ពីឯកឧត្តម សុខ លូ អភិបាលនៃគណៈអភិបាលខេត្ត ថ្វីត្បិតតែខ្សែផ្លូវខូចខាតទាំងនេះ ស្ថិតក្នុងគម្រោងអភិវឌ្ឍន៍របស់ធនាគារអភិវឌ្ឍន៍អាស៊ី (ADB) ដែលមិនទាន់ឈានដល់ដំណាក់កាលដេញថ្លៃជួសជុលឡើងវិញក៏ដោយ ក៏ខាងមន្ទីរមិនអាចឱបដៃឈរមើលទុក្ខលំបាករបស់ពលរដ្ឋបានឡើយ ពោលគឺត្រូវចាត់វិធានការកែសម្រួលជាបន្តបន្ទាប់។

លោកប្រធានមន្ទីរបន្ថែមថា បន្ទាប់ពីការដ្ឋានត្រូវអាក់ខានជិតមួយសប្តាហ៍ដោយសារភ្លៀងធ្លាក់ខ្លាំង ពេលនេះមេឃទើបតែរាំងបានមួយថ្ងៃ ក្រុមបច្ចេកទេសបានចាប់ផ្តើមយុទ្ធនាការភ្លាម ដោយដោះស្រាយចាប់ពីផ្លូវម្តុំវត្តពោធិ៍វង្សមុនគេ និងបន្តទៅបណ្តាផ្លូវផ្សេងៗទៀតក្នុងក្រុងឱ្យតែអាកាសធាតុបន្តអំណោយផល។ លោកប្រធានមន្ទីរក៏បានបង្ហើបឱ្យដឹងផងដែរថា តាមព័ត៌មានដែលលោកទទួលបាន គម្រោង ADB នឹងធ្វើការដេញថ្លៃជួសជុលផ្លូវទាំងនេះជាផ្លូវការនៅចុងខែឧសភានេះហើយ៕