នាព្រឹកថ្ងៃទី០៦ ខែឧសភា ឆ្នាំ២០២៦ លោកបណ្ឌិត ឃីម រដ្ឋា ចាងហ្វាងអង្គភាពព័ត៌មាន «រស្មីស្ទឹងត្រង់» រួមជាមួយលោក អុិន យឿន និងភរិយា ព្រមទាំងលោកជំទាវ ឆាយ សុខន ទីប្រឹក្សាអង្គការចីរភាពបរិស្ថាន បានដឹកនាំក្រុមការងារ ចុះសួរសុខទុក្ខ និងនាំយកអំណោយជាស្បៀងអាហារ ព្រមទាំងសម្ភារៈប្រើប្រាស់មួយចំនួន ជូនដល់ប្រជាពលរដ្ឋដែលមានជីវភាពខ្វះខាត ជួបការលំបាក និងជនពិការភាពពីកំណើត នៅស្រុកលើកដែក ខេត្តកណ្ដាល និងស្រុករមាសហែក ខេត្តស្វាយរៀង។
ក្នុងឱកាសនោះ ក្រុមការងារបានចុះដល់ខ្នងផ្ទះគ្រួសាររបស់ប្អូនប្រុស ប៊ិន ចាន់ អាយុ៤១ឆ្នាំ និងភរិយា អូនស្រី ស្រេង សុខេង អាយុ៤៧ឆ្នាំ ដែលមានពិការភាពពីកំណើត រស់នៅភូមិព្រែកតូច ឃុំព្រែកដាច់ ស្រុកលើកដែក ខេត្តកណ្ដាល។ គ្រួសារនេះទទួលបានអំណោយរួមមាន អង្ករ១បេ ទឹកសុទ្ធ១កេះ ទឹកត្រី២យួរ ទឹកស៊ីអ៊ីវ២យួរ សម្ភារៈប្រើប្រាស់មួយចំនួន និងថវិកាចំនួន១២ម៉ឺនរៀល។
ជាមួយគ្នានេះ ក្រុមការងារក៏បានបន្តចុះជួយគ្រួសារខ្វះខាតនៅខេត្តស្វាយរៀង រួមមាន៖ លោកយាយ នុត យ៉ន អាយុ៧៥ឆ្នាំ, ប្អូនស្រី អ៊ូក គ អាយុ៣៦ឆ្នាំ, លោកយាយ ហ៊ុន ស៊ាន អាយុ 92 ឆ្នាំ និងលោក ហ៊ុន ផុន អាយុ៦៤ឆ្នាំ ដែលរស់នៅភូមិព្រែកត្នោត ឃុំសំបូរ និងភូមិព្រៃតាមូរ ឃុំសម្បត្តិមានជ័យ ស្រុករមាសហែក ខេត្តស្វាយរៀង។ គ្រួសារនីមួយៗទទួលបានអង្ករ១បេ មី២កេះ ទឹកស៊ីអ៊ីវ២យួរ ទឹកត្រី២យួរ ចាន ស្លាបព្រា វែក ជ្រុញ កាធន់លាងចាន កន្ត្រកដាក់ខោអាវ សម្លៀកបំពាក់ ស្បែកជើង និងថវិកាមួយចំនួន។ ក្មេងៗចំនួន 50 នាក់ ម្នាក់ៗបានចំនួន 2000 រៀល។
សកម្មភាពមនុស្សធម៌នេះ ក៏ទទួលបានការចូលរួមឧបត្ថម្ភពីសប្បុរសជនជាច្រើនផងដែរ។ ក្នុងនោះ ព្រះគ្រូសិរីពោធិមុនី ថង សារិន ព្រះចៅអធិការវត្តពោធិព្រឹក្ស ស្ថិតនៅភូមិកណ្ដាលក្រោម ឃុំបន្ទាយដែក ស្រុកកៀនស្វាយ ខេត្តកណ្ដាល បានឧបត្ថម្ភអង្ករ១០០គីឡូក្រាម មី២កេះ ភេសជ្ជៈ២កេះ ទឹកសុទ្ធ២កេះ ទឹកស៊ីអ៊ីវ២យួរ ទឹកត្រី២យួរ និងថវិកា២០ម៉ឺនរៀល ដល់អង្គភាពព័ត៌មាន «រដ្ឋារស្មីស្ទឹងត្រង់»។
ដោយឡែក ព្រះភិក្ខុសង្ឃ ឆាយ សុភារៈ និងព្រះភិក្ខុសង្ឃ សុខ សុវណ្ណ តំណាងព្រះចៅអធិការវត្តអង្គក្ដី ក៏បានចូលរួមឧបត្ថម្ភអង្ករ២បាវ ភេសជ្ជៈ២កេះ ទឹកសុទ្ធ៣កេះ សម្ភារៈ និងបច្ច័យមួយចំនួនផងដែរ។
ទន្ទឹមនឹងនេះ លោកអធិការស្រុកលើកដែក បានឧបត្ថម្ភអង្ករ១បេ ខណៈលោក វុទ្ធ ប៊ុនលី អនុប្រធានអង្គភាពអន្តរាគមន៍ នៃអគ្គស្នងការនគរបាលជាតិ ក្រសួងមហាផ្ទៃ បានឧបត្ថម្ភថវិកា១៥ម៉ឺនរៀល ដល់អង្គភាពព័ត៌មាន «រដ្ឋារស្មីស្ទឹងត្រង់»។ ចំណែកលោកជំទាវ ឆាយ សុខន បានឧបត្ថម្ភរ៉ូបចំនួន១០០ និងសារុង៣០ សរុបជាទឹកប្រាក់ប្រមាណ៣០០ដុល្លារអាមេរិក។
សកម្មភាពខាងលើ បានបង្ហាញពីស្មារតីចែករំលែក ក្តីមេត្តា និងការយកចិត្តទុកដាក់ចំពោះប្រជាពលរដ្ឋក្រីក្រ និងជនងាយរងគ្រោះក្នុងសង្គម ដើម្បីរួមចំណែកលើកកម្ពស់សុខុមាលភាព និងជីវភាពរស់នៅរបស់ពួកគាត់ឱ្យកាន់តែប្រសើរឡើង៕
