ត្បូងឃ្មុំ៖ នៅព្រឹកថ្ងៃអាទិត្យ ទី២៦ ខែមេសា ឆ្នាំ២០២៦នេះ សម្តេចតេជោ ហ៊ុន សែន ប្រមុខរដ្ឋស្តីទី និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ អញ្ជើញជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានាជុំវិញខេត្តត្បូងឃ្មុំ។
ពិធីសំណេះសំណាលនេះ មានការអញ្ជើញចូលរួមពីសមាជិកព្រឹទ្ធសភា រដ្ឋសភា ប្រធាន អនុប្រធានក្រុមការងារថ្នាក់ជាតិចុះជួយខេត្តត្បូងឃ្មុំ សមាជិកក្រុមប្រឹក្សាខេត្ត ក្រុង ស្រុក ឃុំ សង្កាត់ ព្រមទាំងថ្នាក់ដឹកនាំមន្ទីរ អង្គភាពនានាជុំវិញខេត្តត្បូងឃ្មុំសរុបជិត ៩០០នាក់។
កម្មវិធីជួបសំណេះសំណាលនេះ គឺជាវេលាដ៏មានសារៈសំខាន់មួយសម្រាប់សម្តេចតេជោ ហ៊ុន សែន ក្នុងការក្រើនរំលឹក និងជំរុញដល់មន្ត្រីនៅមូលដ្ឋានឱ្យបង្កើនការយកចិត្តទុកដាក់ទៅលើកិច្ចការជាដែនសមត្ថកិច្ចរបស់ខ្លួន ជាពិសេសការផ្តល់សេវាទាំងឡាយជូនដល់ប្រជាពលរដ្ឋ ក៏ដូចជាការដោះស្រាយបញ្ហាទាំងឡាយដែលជាក្តីកង្វល់របស់ប្រជាពលរដ្ឋ។
ខេត្តត្បូងឃ្មុំ ត្រូវបានរាជរដ្ឋាភិបាលសម្រេចបង្កើតជាខេត្តថ្មី ដែលស្ថិតនៅភូមិភាគបូព៌ា នៃព្រះរាជាណាចក្រកម្ពុជា ដោយបំបែកចេញពីខេត្តកំពង់ចាម តាមព្រះរាជក្រឹត្យលេខ នស/រកត/ ១២១៣/១៤៤៥ ចុះថ្ងៃទី៣១ ខែធ្នូ ឆ្នាំ២០១៣ ត្រូវបានប្រកាសនៅថ្ងៃទី០២ ខែមិថុនា ឆ្នាំ២០១៤។ ខេត្តនេះ មានចម្ងាយ ១៦៩គីឡូម៉ែត្រ ពីរាជធានីភ្នំពេញ តាមផ្លូវជាតិលេខ៧ និងចម្ងាយ ១៧២គីឡូម៉ែត្រ តាមផ្លូវជាតិលេខ៨។
ខេត្តត្បូងឃ្មុំ មានផ្ទៃដីសរុប ៥.២៥០,៥១គីឡូម៉ែត្រក្រឡា មាន ១ក្រុង ៦ស្រុក ៦៤ឃុំ សង្កាត់ មាន ៨៧៥ភូមិ មានប្រជាជនសរុបប្រមាណ ៨៧០.០៨៧នាក់ ក្នុងនោះស្រី ៤៣៩.៩៧២នាក់ ស្មើនឹង ២០៦.២៤៧គ្រួសារ និងមានដង់ស៊ីតេប្រជាជន ១៦៦នាក់/គីឡូម៉ែត្រក្រឡា។
ខេត្តត្បូងឃ្មុំ មានព្រំប្រទល់ខាងជើងជាប់ខេត្តក្រចេះ ខាងត្បូងជាប់ខេត្តព្រៃវែង ខាងលិចជាប់ខេត្តកំពង់ចាម ខាងកើតជាប់ប្រទេសវៀតណាម ជាប់ខេត្តចំនួន២ គឺខេត្តតៃនិញ និងខេត្តដុងណាយ ជាប់ខេត្តត្បូងឃ្មុំ ចំនួន ២ស្រុក គឺស្រុកពញាក្រែក និងស្រុកមេមត់។
ខេត្តមានច្រកទ្វារព្រំដែនចំនួន ៧ច្រក គឺច្រកទ្វារ ព្រំដែនអន្តរជាតិ ១ច្រក ច្រកទ្វារព្រំដែនទ្វេភាគី ០២ច្រក និងច្រកទ្វារតំបន់ព្រំដែនចំនួន ៤ច្រក។
ក្នុងឱកាសនៃកិច្ចសំណាលសំណាលលោក ប៉ែន កុសល្យ អភិបាលខេត្តត្បូង ជួសមុខឱ្យថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធនៅទូទាំងខេត្ត បានសម្តែងនូវក្តីសប្បាយរីករាយ និងប្រកបដោយភាពកក់ក្តៅបានទទួលបដិសណ្ឋារកិច្ចវត្តមានដ៏ខ្ពង់ខ្ពស់របស់សម្តេចតេជោ ហ៊ុន សែន។
ក្នុងឱកាសនេះ លោក ប៉ែន កុសល្យ ក៏បានលើកបង្ហាញនូវសមិទ្ធផលមួយចំនួនដែលខេត្តសម្រេចបានផងដែរ ពាក់ព័ន្ធការងារសន្តិសុខ សណ្តាប់ធ្នាប់សាធារណៈ សុវត្ថិភាពសង្គម និងស្ថិរភាពនយោបាយ, សេដ្ឋកិច្ច, ការងារកំណែទម្រង់វិមជ្ឈការ វិសហមជ្ឈការ និងកម្មវិធីកំណែទម្រង់រដ្ឋបាលសាធារណៈ, វិស័យកសិកម្ម កសិ-ឧស្សាហកម្ម និងសមិទ្ធផលហេដ្ឋារចនាសម្ព័ន្ធ។
ពាក់ព័ន្ធសមិទ្ធផលហេដ្ឋារចនាសម្ព័ន្ធ លោកអភិបាលខេត្ត បានឱ្យដឹងថា ហេដ្ឋារចនាសម្ព័ន្ធក្នុងខេត្តត្ប្ងូងឃ្មុំរួមមាន៖ ផ្លូវ ស្ពាន ប្រព័ន្ធធារាសាស្រ្ត បណ្តាញអគ្គិសនី បណ្តាញទឹកស្អាត មន្ទីរពេទ្យ សាលារៀន វត្តអារាម បាននឹងកំពុងស្ថាបនាស្តារពង្រីកបន្ថែមជាបន្តបន្ទាប់នៅក្នុងភូមិសាស្ត្រខេត្តត្បូងឃ្មុំ។ តួយ៉ាងខេត្តត្បូងឃ្មុំ មានផ្លូវជាតិសំខាន់ៗ រួមមានផ្លូវជាតិលេខ៧ លេខ៨ លេខ១១ លេខ៧៣ ជាពិសេសសម្តេចតេជោ បានផ្តល់នូវផ្លូវជាតិ៧១សេ រួមជាមួយស្ពានមិត្តភាពកម្ពុជា-ចិន ស្ទឹងត្រង់-ក្រូចឆ្មារ ដែលបានសម្ពោធដាក់ឱ្យប្រើប្រាស់កាលពីឆ្នាំ២០២៥ និងបានកំពុងនឹងដំណើរការចរាចរណ៍យ៉ាងសកម្ម ការធ្វើដំណើរទៅមក ការដឹកជញ្ជូនកសិកផល និងទំនិញគ្រប់ប្រភេទរបស់បងប្អូនប្រជាពលរដ្ឋ។
ម្យ៉ាងវិញទៀត ចំពោះការពង្រីកវិសាលភាពគ្របដណ្តប់ នៃសេវាសុខាភិបាល ខេត្តត្បូងឃ្មុំ ទទួលបានមន្ទីរពេទ្យខ្នាតធំប្រចាំតំបន់ គឺមន្ទីរពេទ្យមិត្តភាពកម្ពុជា-ចិន ត្បូងឃ្មុំ និងមន្ទីរពេទ្យបង្អែកស្រុកក្រូចឆ្មារ ដែលជាមរតកដ៏មានតម្លៃរបស់សម្តេចតេជោ បានក្លាយជា «បង្អែកសុខភាព» មិនត្រឹមតែសម្រាប់អ្នកត្បូងឃ្មុំប៉ុណ្ណោះទេ ប៉ុន្តែសម្រាប់ខេត្តជុំវិញផងដែរ។
ចំណែកឯ ការអភិវឌ្ឍវិស័យអប់រំ គឺមានមត្តេយ្យសិក្សារដ្ឋចំនួន ២៦០កន្លែង បឋមសិក្សារដ្ឋ ចំនួន ៤០៧កន្លែង អនុវិទ្យាល័យរដ្ឋ ៥២កន្លែង និងវិទ្យាល័យរដ្ឋ ២៨កន្លែង និងសាកលវិទ្យាល័យរដ្ឋ ០១កន្លែងផងដែរ។ ចំពោះវិស័យសាសនា មានវត្តសរុបចំនួន ២៤៩កន្លែង (ក្នុងនោះ គណៈមហានិកាយចំនួន ២៤០កន្លែង គណៈធម្មយុត្តិកនិកាយ ៩វត្ត និងអាស្រម ៦កន្លែង) ឥស្លាមសាសនាចំនួន ៤១៦កន្លែង គ្រឹស្ទសាសនាចំនួន ៣៦កន្លែង និងពុទ្ធសាសនាមហាយាន ចំនួន ១កន្លែង៕
