ភ្នំពេញ៖ នាយឧត្តមសេនីយ៍ សៅ សុខា អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានដាក់ចេញគោលការណ៍ថ្មីមួយទៀតគឺ «៥មិន ៥ត្រូវ» សម្រាប់ឱ្យយោធិននៃកងរាជអាវុធហត្ថគ្រប់រូបត្រូវយល់ដឹង។
គោលការណ៍ «៥មិន ៥ត្រូវ» រួមមាន៖
* សម្រាប់គោលការណ៍ «៥មិន» មានដូចខាងក្រោម៖
– ទី១៖ មិនមែនជាឈាបនដ្ឋានសម្រាប់បូជាសព អ្នកបង្កស្លាប់ដោយផឹកស៊ីស្រវឹង គ្រោះថ្នាក់ចរាចរណ៍ ឬឈ្លោះប្រកែកវាយដំទាត់ធាក់គ្នានោះទេ។
– ទី២៖ មិនមែនជាវត្តអារាម។
– ទី៣៖ មិនមែនជាមណ្ឌលអប់រំកែប្រែអ្នកប្រើប្រាស់គ្រឿងញៀន។
– ទី៤៖ មិនមែនជាមន្ទីរពេទ្យសម្រាប់ព្យាបាលជំងឺរ៉ាំរ៉ៃនោះទេ។
– ទី៥៖ មិនខ្ជះខ្ជាយ មិនមែនជាកន្លែងចាំតែទទួលប្រាក់បៀវត្សដែលប្រជាជនជាអ្នកបង់ពន្ធ ហើយដើរចោលអង្គភាពមិនធ្វើការនោះទេ។
* សម្រាប់គោលការណ៍ «៥ត្រូវ» មានដូចខាងក្រោម៖
– ទី១៖ ហ្វឹកហាត់លេងកីឡាជាប្រចាំដើម្បីពង្រឹងសុខភាពកាយសម្បទាឱ្យមាំមួន។
– ទី២៖ រៀនសូត្រឈ្វេងយល់បង្កើនចំណេះដឹង ពង្រឹងសមត្ថភាពទាំងច្បាប់ ក្រមសីលធម៌វិជ្ជាជីវៈ នីតិវិធី វិន័យបទបញ្ជា ឋានានុក្រមកងទ័ព និងភាសា បច្ចេកវិទ្យា វិទ្យាសាស្ត្រ។
– ទី៣៖ ហ្វឹកហ្វឺនយោធា និងវិជ្ជាជីវៈកងរាជអាវុធហត្ថឱ្យស្ទាត់រហ័សជាប្រចាំ និងធ្វើជាគំរូល្អក្នុងការរស់នៅ រៀនសូត្រ ធ្វើការ និងគោរពច្បាប់។
– ទី៤៖ ការពារជាតិ ការពារបូរណភាព និងអធិបតេយ្យជាតិ ការពារសន្តិសុខ សណ្តាប់ធ្នាប់របៀបរៀបរយសង្គម បង្ក្រាប និងស្រាវជ្រាវបង្ក្រាបបទល្មើស ដើម្បីពង្រឹងការអនុវត្តច្បាប់ កសាងព្រះរាជាណាចក្រកម្ពុជាជាប្រទេសនីតិរដ្ឋ និងជួយប្រជាជននៅពេលជួបការលំបាក។
– ទី៥៖ សន្សំសំចៃ ធ្វើអនាម័យ ដាំដើមឈើ ថែរក្សាបរិស្ថាន បង្កបង្កើនផលកែលម្អជីវភាពរស់នៅ និងកសាងអង្គភាព គ្រប់គ្រងថែរក្សាអាវុធ គ្រាប់ មធ្យោបាយ បរិក្ខារ គ្រឿងបំពាក់ទ្រព្យសម្បត្តិរបស់អង្គភាពឱ្យគង់វង់។
ជាមួយការដាក់ចេញគោលការណ៍ «៥មិន ៥ត្រូវ» ខាងលើនេះ នាយឧត្តមសេនីយ៍ សៅ សុខា បានផ្តល់នូវគំនិតបន្ថែមទៀតថា នាសម័យបច្ចុប្បន្ន ក្នុងពេលវេលាតែមួយរឿងតែមួយ មនុស្សទទួលបានព័ត៌មានច្រើន និងលឿនរហ័ស។ ក្នុងស្ថានភាពដែលមនុស្សរស់នៅក្នុងសង្គមបែបនេះ ការអប់រំតាមវិធីសង្ខេបខ្លឹមសារខ្លីៗ ងាយៗ ដែលពាក់ព័ន្ធនឹងតួនាទី បេសកកម្ម និងភាពអសកម្មនានានៃសង្គមផងនោះ ទើបបង្កើតជាគំនិតអប់រំនេះសាកល្បងឡើង។
នាយឧត្តមសេនីយ៍ សៅ សុខា បានចោទសួរថា៖ «ក្រោយការអប់រំ យើងជួបយើងសួរមើល តើពួកគេចងចាំឬអត់? ម៉្យាងវិញទៀត ចង់ឱ្យពួកគេប្រើប្រាស់ខួរក្បាលចេះគិតត្រិះរិះពិចារណា កុំឱ្យពួកគេរង់ចាំនិយាយតាម AI ឬជឿលើព័ត៌មានបោកប្រាស់»៕
