ស្ទឹងត្រែង៖ ព្រឹត្តិការណ៍មហាសង្ក្រាន្តខេត្តស្ទឹងត្រែង ឆ្នាំ២០២៦ បានបញ្ចប់ទៅដោយជោគជ័យ និងមោទនភាពជាទីបំផុត ដោយបានទាក់ទាញភ្ញៀវទេសចរជាតិ និងអន្តរជាតិជិត៣០ម៉ឺននាក់ ឱ្យមកកម្សាន្តសប្បាយយ៉ាងកុះករ។ ព្រឹត្តិការណ៍នេះ មិនត្រឹមតែជាការអបអរសាទរពិធីបុណ្យចូលឆ្នាំថ្មី ប្រពៃណីជាតិប៉ុណ្ណោះទេ ប៉ុន្តែថែមទាំងបានបង្កប់នូវខ្លឹមសារអប់រំ និងស្មារតីដឹងគុណយ៉ាងជ្រាលជ្រៅចំពោះវីរកងទ័ព ដែលកំពុងឈរជើងការពារទឹកដីនៅខ្សែត្រៀមជួរមុខ។
ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៦ រដ្ឋបាលខេត្តស្ទឹងត្រែង បានប្រែក្លាយតំបន់ទីលាននាគជ័យ និងសួនតេជោសន្តិភាព ឱ្យទៅជាមជ្ឈមណ្ឌលកម្សាន្តដ៏រស់រវើក។
ប្រធានមន្ទីរទេសចរណ៍ខេត្តស្ទឹងត្រែង លោក អ៊ន់ ប៉ោសឿន បានបញ្ជាក់ថា ឆ្នាំនេះការរៀបចំមានលក្ខណៈពិសេស និងធំដំជាងឆ្នាំមុនៗ ដោយមានការបង្កើតនូវតំបន់កម្សាន្តជាច្រើនដូចជា៖ ក្បួនដង្ហែកងទ័ពមហានគរដ៏អស្ចារ្យ តាមដងវិថីសំខាន់ៗក្នុងក្រុង, ភូមិល្បែងប្រជាប្រិយ, ភូមិសំនៀងឯក, ភូមិនំខ្មែរ វិថីម្ហូបអាហារ, វិថីចម្រុះពណ៌ និងវិថីជលសា (តំបន់បាញ់ទឹក) ដែលទាក់ទាញយុវវ័យយ៉ាងខ្លាំង។
លោក អ៊ន់ ប៉ោសឿន បានបញ្ជាក់ទៀតថា ភ្ញៀវទេសចរជាតិ អន្តរជាតិ និងប្រជាពលរដ្ឋធ្វើដំណើរកម្សាន្តក្នុងព្រឹត្តិការណ៍ស្ទឹងត្រែងសង្ក្រាន្ត និងតាមគោលដៅទេសចរណ៍នានាក្នុងខេត្ត នាឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ រយ:ពេល៣ថ្ងៃ ចាប់ពីថ្ងៃទី១៤-១៦ ខែមេសា ឆ្នាំ២០២៦ ខេត្តទទួលបានភ្ញៀវទេសចរ ២៨ម៉ឺន ៩ពាន់ ៥៧០នាក់ ធៀបនិងឆ្នាំ២០២៥ កើនឡើងចំនួន ២ម៉ឺន ៧ពាន់ ៨២៥នាក់ ស្មើនឹង១១ ភាគរយ ក្នុងនោះ ភ្ញៀវទេសចរជាតិ ២៨ម៉ឺន ៩ពាន់ ៤៥០នាក់ កើនឡើង ២ម៉ឺន ៧ពាន់ ១១ នាក់ ស្មើនឹង ១១ភាគរយ និងភ្ញៀវទេសចរបរទេស ១២០នាក់ កើនឡើង ១៤នាក់ ស្មើនឹង ១៣ភាគរយ។
ក្នុងឱកាសអញ្ជើញចូលរួមផ្ទាល់ អភិបាលខេត្តស្ទឹងត្រែង លោក សរ សុពុត្រា បានថ្លែងថា ភាពសប្បាយរីករាយដែលប្រជាពលរដ្ឋកំពុងក្រេបជញ្ជក់នៅពេលនេះ គឺមិនអាចកាត់ផ្ដាច់បានពី ដំបូលនៃសន្តិភាព និងការដឹកនាំដ៏ឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជានោះឡើយ។
លោកអភិបាលខេត្ត បានសង្កត់ធ្ងន់ថា «សង្ក្រាន្តឆ្នាំនេះ យើងបានផ្សាភ្ជាប់នូវការដឹងគុណយ៉ាងជ្រាលជ្រៅ ទៅកាន់វីរកងទ័ពការពារទឹកដី និងបងប្អូនភៀសសឹក ក្នុងស្មារតីសាមគ្គីភាពខ្មែរតែមួយ។ អ្វីដែលជាមោទនភាពបំផុត គឺទោះបីជាមានមនុស្សមកចូលរួមយ៉ាងច្រើនកុះករ ប៉ុន្តែមិនមានបង្កជម្លោះ ឬបាតុភូតអសកម្មណាមួយកើតឡើងឡើយ»។
ប្រជាពលរដ្ឋដែលបានចូលរួមក្នុងសង្ក្រាន្តឆ្នាំថ្មី បានសម្ដែងនូវសេចក្តីរីករាយយ៉ាងក្រៃលែង ខណៈដែលឃើញពលរដ្ឋឯទៀតយ៉ាងច្រើនកុះករ បានមកចូលរួមលេងល្បែងប្រជាប្រិយខ្មែរជាច្រើន ដូចជា ល្បែងទាញព្រ័ត្រ, លាក់កន្សែង, បោះអង្គុញ និងទស្សនាការវាយប្រដាល់ធ្លាក់ទឹកជាដើម ដែលញ៉ាំងឲ្យបរិយាកាសឆ្នាំនេះមានភាពស្និទ្ធស្នាល និងសប្បាយរីករាយខុសប្លែកពីឆ្នាំមុនៗ។ ដោយឡែក គណៈកម្មការរៀបចំ ភូមិសំនៀងឯក ក៏បានសង្កេតឃើញថា តាមរយៈការជួបជុំគ្នានេះ ប្រជាពលរដ្ឋកាន់តែយល់ច្បាស់ពីតម្លៃនៃទំនាក់ទំនង និងសាមគ្គីភាពក្នុងសហគមន៍។
ជាជោគជ័យដ៏ធំធេង ព្រឹត្តិការណ៍សង្ក្រាន្តស្ទឹងត្រែងរយៈពេល ៣ថ្ងៃនេះ មិនត្រឹមតែបានថែរក្សា និងអភិរក្សប្រពៃណី វប្បធម៌ខ្មែរ ប៉ុណ្ណោះទេ ប៉ុន្តែថែមទាំងបានក្លាយជាក្បាលម៉ាស៊ីនរុញច្រានសេដ្ឋកិច្ចគ្រួសារ របស់ប្រជាពលរដ្ឋក្នុងខេត្ត តាមរយៈការលក់ដូរចំណីអាហារ សេវាកម្មស្នាក់នៅ និងការដឹកជញ្ជូន ដែលនាំមកនូវចំណូលយ៉ាងច្រើនសន្ធឹកសន្ធាប់ ដល់មូលដ្ឋានផងដែរ៕
