មណ្ឌលគិរី៖ យោងតាមរបាយការណ៍របស់លោក ស៊ាង សឿន ប្រធានមន្ទីរទេសចរណ៍ខេត្តមណ្ឌលគិរី បានឲ្យដឹងថា ក្នុងរយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៦ ភ្ញៀវទេសចរ ដែលបានមកទស្សនាកម្សាន្ត និងស្នាក់នៅក្នុងខេត្តមណ្ឌលគិរី មានចំនួនសរុប២៣,២៥៣នាក់។
ក្នុងចំណោមស្ថិតិសរុបនេះ ទេសចរជាតិ ចំនួន២២,៤១៤នាក់ និងទេសចរបរទេស ចំនួន៨៣៩នាក់។ ទោះបីជាចំនួនទេសចរជាតិមានការថយចុះបន្តិច ប៉ុន្តែអ្វីដែលជាសញ្ញាណវិជ្ជមាន គឺកំណើននៃភ្ញៀវទេសចរបរទេស ដែលបានកើនឡើងជាង៥% ឆ្លុះបញ្ចាំងពីការទាក់ទាញនៃតំបន់ភូមិភាគឦសាន ចំពោះភ្ញៀវអន្តរជាតិ។
ទិដ្ឋភាពនៅក្នុងក្រុងសែនមនោរម្យ មានភាពអ៊ូអរយ៉ាងខ្លាំង ដោយសារប្រជាពលរដ្ឋ និងអ្នកទេសចរភាគច្រើនបានមកជួបជុំគ្នាលេងល្បែងកម្សាន្តគ្រប់ប្រភេទ នៅទីតាំងសង្ក្រាន្តកណ្ដាលក្រុង ពោរពេញដោយស្នាមញញឹម។ ខេត្តមណ្ឌលគិរី សម្បូរទៅដោយរមណីយដ្ឋានធម្មជាតិ និងទឹកជ្រោះដ៏ស្រស់ស្អាត ប៉ុន្តែការជួបជុំនៅកណ្ដាលក្រុងសែនមនោរម្យឆ្នាំនេះ បានក្លាយជាចំណុចកណ្ដាល នៃក្ដីសប្បាយរីករាយបំផុត សម្រាប់អ្នកទេសចរគ្រប់វ័យ។
ព្រឹត្តិការណ៍ សង្ក្រាន្តសែនមនោរម្យ ឆ្នាំ២០២៦នេះ មិនត្រឹមតែផ្ដល់នូវភាពសប្បាយរីករាយជូនពលរដ្ឋប៉ុណ្ណោះទេ ប៉ុន្តែថែមទាំងបានបង្ហាញពីសមត្ថភាពរបស់អាជ្ញាធរខេត្ត ក្នុងការគ្រប់គ្រងសន្តិសុខ សណ្ដាប់ធ្នាប់ និងការសម្រួលចរាចរណ៍ជូនភ្ញៀវទេសចរ ឲ្យទទួលបាននូវភាពកក់ក្ដៅ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរនាឆ្នាំនេះ៕
