ខេត្តកណ្តាល៖ នាព្រឹកថ្ងៃទី១៣ ខែមេសា ឆ្នាំ២០២៦ ឯកឧត្តម នុត ពុធដារ៉ា អភិបាលរងខេត្តកណ្តាល បានអញ្ជើញជាអធិបតីក្នុងពិធីសំណេះសំណាលជាមួយនិវត្តជន សមាជិកសមាគមសង្គហៈមិត្ត បុគ្គលិក មន្ត្រីរាជការ នៃក្រសួងសេដ្ឋកិច្ច និងហិរញ្ញវត្ថុ ដោយមានការអញ្ជើញចូលរួមពី លោកស្រីប្រធានមន្ទីរសេដ្ឋកិច្ច និងហិរញ្ញវត្ថុខេត្ត ប្រធានសាខាពន្ធដារខេត្ត និងប្រធានរតនាគារខេត្ត ព្រមទាំង លោក លោកស្រីថ្នាក់ដឹកនាំមន្ត្រីរាជការនៃមន្ទីរសេដ្ឋកិច្ចនិងហិរញ្ញវត្ថុខេត្តផងដែរ។
ក្នុងឱកាសពិធីសំណេះសំណាលនេះ ឯកឧត្តម នុត ពុធដារ៉ា អភិបាលរងខេត្ត បានមានប្រសាសន៍ថា៖ ការជួបជុំនាពេលនេះបានរៀបចំឡើងក្នុងគោលបំណងដើម្បីរឹតចំណង “មិត្តភាព, សាមគ្គីភាព និង សង្គហៈធម៌» រវាងមន្ត្រីរាជការជំនាន់មុន និង មន្ត្រីរាជការបច្ចុប្បន្ន ប្រកបដោយសេចក្តីនឹករលឹក ភាពកក់ក្តៅ និងភាពស្និទ្ធស្នាល និងដើម្បីបង្ហាញពីការយកចិត្តទុកដាក់ចំពោះអតីតមន្ត្រីរាជការ ដែលធ្លាប់មានគុណបំណាច់យ៉ាងច្រើនឥតគណនា និងស្នាដៃសម្រាប់ពួកគាត់ធ្លាប់បានបម្រើ ការងារជូនអង្គភាពកន្លងមក។
ឯកឧត្តមបន្តទៀតថា៖ កម្មវិធីនេះ ក៏ជាឱកាសដ៏កម្រមួយ ដែលលោកពូ, អ្នកមីង និង បងប្អូន ជានិវត្តជនទាំងអស់ បានជួបប្រាស្រ័យទាក់ទងគ្នាដោយផ្ទាល់, បានសួរសុខទុក្ខគ្នាទៅ វិញទៅមក និងបានរំលឹកអំពីអនុស្សាវរីយ៍ល្អៗ ក្នុងការបំពេញបេសកកម្មបម្រើជាតិជាមួយគ្នាក្នុងរយៈកាលកន្លងទៅ ព្រមទាំងចូលរួមអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ, ឆ្នាំ មមី, អដ្ឋស័ក, ព.ស. ២៥៧០, ដែលនឹងចូលមកដល់ក្នុងពេលដ៏ខ្លីខាងមុខនេះ។
ក្នុងពិធីនេះក៏មានការឧបត្ថម្ភជូនចំពោះនិវត្តជន ម្នាក់ៗ មានក្រមា ចំនួន ១, ថវិកាចំនួន ២០ ម៉ឺនរៀល សរុបចំនួន ៧៨ រូប ក្នុងឱកាសនៃពិធីបុណ្យចូលឆ្នាំថ្មី, ប្រពៃណីជាតិខ្មែរ, ឆ្នាំមមី, អដ្ឋស័ក, ព.ស.៥៧០ ដែលនឹងចូលមកដល់ក្នុងពេលដ៏ខ្លីខាងមុខ។
ជាទីបញ្ចប់ ក្នុងឱកាសនៃពិធីបុណ្យចូលឆ្នាំថ្មី, ប្រពៃណីជាតិខ្មែរ, ឆ្នាំមមី, អដ្ឋស័ក, ព.ស ២៥៧០, ដែលនឹងចូលមកដល់ ក្នុងពេលដ៏ខ្លីខាងមុខ, ខ្ញុំសូមប្រសិទ្ធពរជ័យ ជូន លោក, លោកស្រី, ជាពិសេស លោកពូ អ្នកមីង និងបងៗ និវត្តជនទាំងអស់, បានសមប្រកបដោយ ពុទ្ធពរទាំង ៤ ប្រការ គឺ៖ អាយុ, វណ្ណៈ, សុខៈ និង ពលៈ កុំបីឃ្លៀងឃ្លាត ឡើយ ៕
