ខេត្តព្រះវិហារ៖ ជម្លោះដីធ្លីទំហំ ៤៥ ហិកតា ស្ថិតនៅចំណុចភ្នំជៀស ឃុំរមណី ស្រុករវាង ដែលបានអូសបន្លាយជាច្រើនឆ្នាំក្នុងជម្លោះលក្ខណៈគ្រួសារ រវាងឪពុកម្តាយ និងកូនបង្កើត កូនប្រសារ ត្រូវបានបិទបញ្ចប់ជាស្ថាពរ នៅថ្ងៃទី ១១ ខែកុម្ភៈ ឆ្នាំ ២០២៦ ក្រោមយន្តការសម្របសម្រួលប្រកបដោយតម្លាភាពពីរដ្ឋបាលខេត្តព្រះវិហារ។
ករណីនេះធ្លាប់ក្លាយជាប្រធានបទចាប់អារម្មណ៍លើបណ្តាញសង្គម ដោយមានការចោទប្រកាន់ពីមតិមហាជនមួយចំនួនថា អាជ្ញាធរមូលដ្ឋានឃុបឃិតជាមួយភាគីកូនបង្កើត និងកូនប្រសារ ដើម្បីរំលោភយកដីធ្លីពីឪពុកម្តាយ គឺលោក ហៀប ហឿង និងលោកស្រី លឹង ហួរ។ ស្ថានការណ៍នេះបានបង្កឱ្យមានការរិះគន់ និងភាពតានតឹងក្នុងសង្គម ខណៈកូនប្រុសម្នាក់ទៀតរបស់គ្រួសារនេះ កំពុងបម្រើភារកិច្ចការពារបូរណភាពទឹកដីនៅសមរភូមិមុខ។
ដើម្បីដោះស្រាយបញ្ហាដោយផ្អែកលើគោលការណ៍ច្បាប់ និងទិន្នន័យបច្ចេកទេស កិច្ចប្រជុំសម្របសម្រួលត្រូវបានរៀបចំក្រោមអធិបតីភាពលោក មិន ស៊ីថា អភិបាលរងខេត្តព្រះវិហារ ដោយមានការចូលរួមពីមន្ទីរវិស័យជំនាញពាក់ព័ន្ធ រួមមាន៖
មន្ទីររៀបចំដែនដី នគរូបនីយកម្ម សំណង់ និងសូរិយោដី
មន្ទីរបរិស្ថានខេត្ត
អាជ្ញាធរស្រុក និងក្រុមប្រឹក្សាឃុំ
មេភូមិ អង្គភាពនគរបាលពាក់ព័ន្ធ
ប្រជាពលរដ្ឋ និងអ្នកសារព័ត៌មាន
ក្នុងអង្គប្រជុំ អាជ្ញាធរបានបង្ហាញរបាយការណ៍បច្ចេកទេសយ៉ាងច្បាស់លាស់ ដែលកំណត់ស្ថានភាពដីជាក់ស្តែង និងជាចំណុចរបត់នាំទៅរកការបញ្ចប់ជម្លោះ ដូចខាងក្រោម៖
ដីទំហំ ២៧.៥១ ហិកតា ស្ថិតក្នុងគម្រោងដីសម្បទានសេដ្ឋកិច្ចរបស់ក្រុមហ៊ុន គ្រិនឆយ Cambodia ត្រូវរក្សាទុកជាដីរដ្ឋ។
ដីទំហំ ៥.២០ ហិកតា ជាដីព្រៃសាធារណៈរបស់រដ្ឋក្នុងតំបន់ភ្នំ ដែលត្រូវការពារយ៉ាងតឹងរ៉ឹង។
ដីទំហំ ១២.៩៧ ហិកតា ក្នុងនោះ៖
ទំហំ ៤ ហិកតា ផ្នែកខាងជើង ស្ថិតក្នុងយន្តការតុលាការ ដើម្បីបន្តនីតិវិធីតាមច្បាប់។
ទំហំ ៨.៩៧ ហិកតា ផ្នែកខាងត្បូង ត្រូវបានផ្តល់ជូនលោក ហៀប ហឿង និងលោកស្រី លឹង ហួរ គ្រប់គ្រងជាកម្មសិទ្ធិស្របច្បាប់។
លទ្ធផលនេះត្រូវបានបង្ហាញជាសាធារណៈ ដើម្បីធានាភាពត្រឹមត្រូវ តម្លាភាព និងបន្ថយការយល់ច្រឡំដែលកើតមានកន្លងមក។ អាជ្ញាធរខេត្តបានអំពាវនាវឱ្យគ្រប់ភាគីគោរពតាមសេចក្តីសម្រេច និងរក្សាសាមគ្គីភាពគ្រួសារ ព្រមទាំងជឿជាក់លើយន្តការច្បាប់របស់រដ្ឋ។
ករណីនេះត្រូវបានចាត់ទុកថា ជាគំរូមួយនៃការដោះស្រាយវិវាទដីធ្លីដោយផ្អែកលើភស្តុតាងបច្ចេកទេស និងការចូលរួមពីគ្រប់ភាគីពាក់ព័ន្ធ ក្នុងគោលបំណងថែរក្សាស្ថិរភាពសង្គម និងផលប្រយោជន៍សាធារណៈជាអាទិភាព៕ដោយ លោក ខៀវ ផល្លា
