ភ្នំពេញ៖ នារសៀលថ្ងៃទី ៧ ខែកុម្ភៈ ឆ្នាំ២០២៦ ឯកឧត្ដម ឃួង ស្រេង អភិបាលរាជធានីភ្នំពេញ បានដាក់ផែនការយ៉ាងម៉ឹងម៉ាត់ ដោយបញ្ជាឱ្យកងកម្លាំងមានសមត្ថកិច្ចគ្រប់ប្រភេទ និងអាជ្ញាធរខណ្ឌទាំង១៤ សហការគ្នាធ្វើយុទ្ធនាការបោសសម្អាត និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) ឲ្យអស់ពីមូលដ្ឋានដែលស្ថិតក្រោមការគ្រប់គ្រង សំដៅធានាសន្តិសុខ សណ្តាប់ធ្នាប់សង្គម និងការពារទ្រព្យសម្បត្តិរបស់ប្រជាពលរដ្ឋ។
ឯកឧត្ដមអភិបាលរាជធានី បានសង្កត់ធ្ងន់ឲ្យអាជ្ញាធរ និងកងកម្លាំងមានសមត្ថកិច្ច បង្កើនការត្រួតពិនិត្យ ស៊ើបអង្កេត និងប្រមូលព័ត៌មានលើសកម្មភាពឆបោកតាមប្រព័ន្ធអនឡាញ ដែលកំពុងកើតមានយ៉ាងស្មុគស្មាញ និងបង្កផលប៉ះពាល់យ៉ាងធ្ងន់ធ្ងរដល់សង្គម។
ក្នុងនោះ ការអនុវត្តវិធានការបង្ក្រាប ត្រូវផ្តោតលើការស៊ើបអង្កេត និងប្រមូលភស្តុតាងឌីជីថល ដូចជា ការតាមដានគណនីបណ្តាញសង្គម Facebook, Telegram, TikTok គេហទំព័រ និងកម្មវិធី (App) ដែលសង្ស័យថាពាក់ព័ន្ធនឹងបទល្មើសឆបោក ព្រមទាំងប្រមូលព័ត៌មានអំពីការទំនាក់ទំនង និងប្រតិបត្តិការផ្ទេរប្រាក់ ដោយសហការជិតស្និទ្ធជាមួយក្រុមហ៊ុនទូរស័ព្ទ និងស្ថាប័នធនាគារ។
ជាមួយគ្នានេះ កងកម្លាំងមានសមត្ថកិច្ច ត្រូវចុះត្រួតពិនិត្យទីតាំងសង្ស័យ ដូចជា ផ្ទះជួល អគារការិយាល័យ ឬមជ្ឈមណ្ឌល Call Center ធ្វើការឃាត់ខ្លួនជនសង្ស័យ ដកហូតឧបករណ៍បច្ចេកវិទ្យាពាក់ព័ន្ធ និងបិទគណនី ឬគេហទំព័រអនឡាញ ដែលប្រើប្រាស់សម្រាប់សកម្មភាពឆបោក។
ឯកឧត្ដម ឃួង ស្រេង ក៏បានណែនាំឲ្យអនុវត្តច្បាប់យ៉ាងតឹងរឹង ដោយបញ្ជូនសំណុំរឿងទៅតុលាការ ទប់ស្កាត់ការផ្ទេរប្រាក់ និងដកហូតទ្រព្យសម្បត្តិដែលពាក់ព័ន្ធនឹងបទល្មើស ដោយមិនមានការលើកលែងចំពោះជនល្មើសណាមួយឡើយ។
លើសពីនេះ ឯកឧត្ដមអភិបាលរាជធានី បានលើកទឹកចិត្តឲ្យបង្កើនការពារ និងទប់ស្កាត់ជាមុន តាមរយៈការផ្សព្វផ្សាយអប់រំប្រជាពលរដ្ឋ អំពីល្បិចឆបោកតាមប្រព័ន្ធអនឡាញ ការបណ្តុះបណ្តាលមន្ត្រីអាជ្ញាធរ និងកងកម្លាំងមានសមត្ថកិច្ច ព្រមទាំងការបង្កើតប្រព័ន្ធទទួលពាក្យបណ្តឹងអនឡាញឲ្យមានប្រសិទ្ធភាព។
ទន្ទឹមនឹងនេះ ក៏ត្រូវពង្រឹងការសហការជាតិ និងអន្តរជាតិ ជាមួយអង្គភាពជំនាញផ្នែក Cyber Crime និងអង្គការពាក់ព័ន្ធ ដើម្បីប្តូរព័ត៌មាន និងទប់ស្កាត់បទល្មើសឆបោកតាមប្រព័ន្ធបច្ចេកវិទ្យា ឲ្យមានប្រសិទ្ធភាពខ្ពស់បំផុត៕
