នារសៀលថ្ងៃចន្ទ ១៥កើត ខែមាឃ ឆ្នាំម្សាញ់ សប្តស័ក ពុទ្ធសករាជ ២៥៦៩
ត្រូវនឹងថ្ងៃទី២ ខែកុម្ភៈ ឆ្នាំ២០២៦ ដោយមានការដាក់ទបបញ្ជាពី ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ និងជាគណៈបញ្ជាការឯកភាពរាជធានី ភ្នំពេញ ឱ្យអភិបាលខណ្ឌទាំងអស់ក្នុងទីក្រុងភ្នំពេញ ចុះរៀបចំសណ្ដាប់ធ្នាប់តាមផ្លូវសាធារណៈ ទូទាំងក្រុង ដើម្បីមានសោភណ្ឌ័ភាពល្អប្រសើរនោះ លោក សេង គន្ធ អភិបាលនៃគណៈអភិបាលខណ្ឌមានជ័យ បានចាត់ឱ្យ លោក ជា វង្សចិន្ដា នាយករដ្ឋបាលខណ្ឌមានជ័យ ដឹកនាំកម្លាំង សហការគណៈបញ្ជាការឯកភាព កម្លាំងសង្កាត់ស្ទឹងមានជ័យទី២ ដឹកនាំដោយលោក ទូច សំអុល ចុះរៀបចំសណ្ដាប់ធ្នាប់ និងចែកសេចក្ដីជូនដំណឹង ដល់អាជីវករលក់ដូរនៅនឹងរបងសាលាបឋមសិក្សា ស្ទឹងមានជ័យ ក្នុងសង្កាត់ស្ទឹងមានជ័យទី២ ដោយទុកអោយពេលវេលាចំនួន០៧ថ្ងៃ ឱ្យបងប្អូនអាជីវកលក់ដូរុះរើចេញ ដោយខ្លួនឯង។
សេចក្តីជូនដំណឹងមានខ្លឹមសារ៖
ព្រះរាជាណាចក្រកម្ពុជា ជាតិ សាសនា ព្រះមហាក្សត្រ
រាជធានីភ្នំពេញ ខណ្ឌមានជ័យ រដ្ឋបាលសង្កាត់ស្ទឹងមានជ័យទី២ លេខ:០០១/២៦ សជណ ថ្ងៃច័ន្ទ ១៥កើត ខែមាឃ ឆ្នាំម្សាញ់ សប្តស័ក ព.ស២៥៦៩ ស្ទឹងមានជ័យទី២,ថ្ងៃទី ០២ ខែ កុម្ភៈ ឆ្នាំ២០២៦។
សេចក្តីជូនដំណឹង រដ្ឋបាលសង្កាត់ស្ទឹងមានជ័យទី២ មានកិត្តិយសសូមជម្រាបជូនដំណឹង ដល់បងប្អូនប្រជា ពលរដ្ឋទាំងអស់ ជាពិសេសអាជីវករលក់ដូរមុខសាលាបឋមសិក្សាស្ទឹងមានជ័យ ដែលរំលោភលើដីចំណី ផ្លូវសាធារណៈឲ្យបានជ្រាបថាៈ ដើម្បីលុបបំបាត់ការលក់ដូររំលោភលើដីចំណីផ្លូវសាធារណៈ និងចូលរួម អនុវត្តរក្សាបាននូវសោភ័ណ្ឌភាព សណ្តាប់ធ្នាប់សាធារណៈរបស់ ទីក្រុងស្អាត អោយមានសោភ័ណ្ឌភាព ល្អ និងបង្ការបញ្ហាគ្រោះថ្នាក់ចរាចរណ៍ជាយថាហេតុ។ រដ្ឋបាលសង្កាត់ស្ទឹងមានជ័យទី២ សូមដាក់ចេញនូវ វិធានការដូចខាងក្រោម៖
១/ តាមបណ្តាផ្លូវមុន្នីរ៉េត និងមុខសាលាបឋមសិក្សាស្ទឹងមានជ័យ សូមបងប្អូនបញ្ឈប់ ការលក់ដូរ រំលោភដីចំណីផ្លូវសាធារណៈ ពិសេសម្ចាស់ទីតាំង, ម្ចាស់តូបហាមមិនឲ្យលក់ដូរ មិនអនុញ្ញាតិឲ្យដាក់តាំង លក់ប៉ះពាល់ផ្លូវសាធារណៈឡើយ។ ដូច្នេះសូមបងប្អូនធ្វើការរុះរើសំណង់ តូប ស្លាកប៉ាណូ សម្ភារៈ និង ទំនិញផ្សេងៗ ចេញដោយខ្លួនឯងលើដីចំណីផ្លូវសាធារណៈ ដោយទុករយ:ពេល០៧ថ្ងៃ ចាប់ពីថ្ងៃជូន ដំណឹងនេះតទៅ។
២/ក្នុងករណីមិនព្រមអនុវត្តទៅតាមខ្លឹមសារសេចក្តីជូនដំណឹងនេះទេ រដ្ឋបាលសង្កាត់ស្ទឹងមាន ជ័យទី២ នឹងចុះចាត់វិធានការរុះរើចេញឱ្យអស់ ដោយពុំទទួលខុសត្រូវរាល់ការខូចខាតបាត់បង់សម្ភារៈ ដែលមាននៅលើទីតាំងខាងលើនេះឡើយ។
ក្រោយពីបងប្អូនទទួលបាននូវសេចក្តីជូនដំណឹងនេះហើយ រដ្ឋបាលសង្កាត់ មានការសង្ឃឹមជឿ ជាក់យ៉ាងមុតមាំ លើស្មារតីភ្ញាក់រលឹក ចូលរួមសហការណ៍គោរពអនុវត្តតាមសេចក្តីជូនដំណឹងនេះ ដោយ ស្មារតីទទួលខុសត្រូវខ្ពស់ ។
ហត្ថលេខា នឹងត្រាចៅសង្កាត់ស្ទឹងមានជ័យទី២
ទូច-សំអុល៕
