ខេត្តមណ្ឌលគិរី៖នៅថ្ងៃទី២៥ ខែមករា ឆ្នាំ២០២៦ មន្ត្រីឧទ្យានុរក្ស នៃដែនជម្រកសត្វព្រៃស្រែពក បានចុះល្បាត ត្រង់ចំណុចអូរតេ បានជួបប្រទះសត្វទន្សោងញីចំនួន០១ក្បាល ដាច់ជើងស្តាំខាងក្រោយ ដោយសារជាប់អន្ទាក់ មាន សភាពហូរឈាមធ្ងន់ធ្ងរ និងខ្សោយខ្លាំង ពុំអាចបម្លាស់ទីទៅកន្លែងផ្សេងបាន ដូចនេះក្រុមការងារព្យាយាមស្វះស្វែងរក មធ្យោបាយដើម្បីជួយសង្គ្រោះ។
នៅថ្ងៃទី ២៧ ខែ មករា ឆ្នាំ២០២៦ ក្រុមការងារបានយករថយន្តទៅដឹកសត្វទន្សោងនោះ ប៉ុន្តែជាអកុសលសត្វ ទន្សោងនោះបានស្លាប់បាត់បង់ជីវិតទៅហើយ នៅវេលាម៉ោង១០ និង៣៥នាទីព្រឹក មុនក្រុមការងារសង្គ្រោះទៅដល់។ ដើម្បីចៀសវាងការឆ្លងរោគទៅសត្វទន្សោង និងសត្វផ្សេងទៀតដែលកំពុងរស់នៅក្នុងព្រៃ ក្រុមការងារសម្រេច ដឹកសាកសពសត្វទន្សោង មកកប់នៅក្បែរស្នាក់ការបរិស្ថាន ណាមរ៉ាម វិញ ដែលនៅពេលអនាគត វាបានបន្សល់ទុកនូវ សំណាកគ្រោងឆ្អឹង ដើម្បីជាប្រយោជន៍សម្រាប់ការសិក្សាស្រាវជ្រាវជីវៈចម្រុះ។
យោងតាមក្រមបរិស្ថាន និងធនធានធម្មជាតិ បានចែងថាការចាប់ដោយដាក់អន្ទាក់ ខ្នារ អង្គប់ បន្តឹង លប់ បង្ក ឬដោយប្រមាញ់ដែលធ្វើឱ្យរបួស បំពុល សម្លាប់ ឬប្រមូលពង និងកូនសត្វព្រៃគ្រប់ប្រភេទ ត្រូវផ្តន្ទាទោសដាក់ពន្ធនាគារ ពី១ឆ្នាំ (មួយឆ្នាំ) ទៅ៥ឆ្នាំ(ប្រាំឆ្នាំ) និងពិន័យជាប្រាក់ពី ១០០ ០០០ ០០០៛ (មួយរយលាន) រៀល ទៅ៥០០ ០០០ ០០០៛ (ប្រាំរយលាន) រៀល។
មន្ទីរបរិស្ថានខេត្តមណ្ឌលគិរី សូមអំពាវនាវដល់ប្រជាពលរដ្ឋ សហគមន៍ ដែលរស់នៅក្នុងនិងក្បែរតំបន់ការពារ ធម្មជាតិ និងសាធារណជនទាំងអស់រួមគ្នាជួយថែរក្សាការពារសម្បត្តិធនធានធម្មជាតិ ព្រៃឈើ និងសត្វព្រៃ ដើម្បីជា កេរ្តិ៍ដំណែលសម្រាប់កូនចៅជំនាន់ក្រោយ។
ទន្ទឹមនឹងនេះ មន្ទីរបរិស្ថានខេត្តមណ្ឌលគិរី មានការសោកស្តាយជាខ្លាំងចំពោះការបាត់បង់សត្វទន្សោងមេមួយ ក្បាលនេះ និងសូមថ្កោលទោសយ៉ាងដាច់អហង្ការចំពោះជនប្រព្រឹត្តសកម្មភាពល្មើសច្បាប់ មន្ទីរបរិស្ថាននឹងធ្វើការស៊ើប អង្កេត ស្រាវជ្រាវ ស្វែងរក ជនប្រព្រឹត្តបទល្មើស ដើម្បីកសាងសំណុំរឿងបញ្ជូនទៅតុលាការ ចាត់ការតាមនីតិវិធីច្បាប់។
អាស្រ័យដូចបានជម្រាបជូនខាងលើ សូមសាធារណជន បណ្តាញសារព័ត៌មានជាតិ និងអន្តរជាតិ មេត្តាជ្រាបជា ព័ត៌មាន។
នេះបើតាមសេចក្តីប្រកាសព័ត៌មានស្តីពី ករណីសត្វទន្សោងដែលជាប់អន្ទាក់របស់ព្រានព្រៃ បានស្លាប់បាត់បង់ជីវិតនៅក្នុងព្រៃ នៃដែនជម្រកសត្វព្រៃស្រែពក ខេត្តមណ្ឌលគិរី នាថ្ងៃពុធ ១០កើត ខែមាឃ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៨ ខែមករា ឆ្នាំ២០២៦ របស់មន្ទីរបរិស្ថានខេត្តមណ្ឌលគិរី៕
