នៅថ្ងៃទី២០ ខែធ្នូ ឆ្នាំ២០២៥ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញពិនិត្យស្ថានភាពជនភៀសសឹក និងសម្របសម្រួលចំពោះការប្រគល់អំណោយរបស់សម្តេចអគ្គមហាសេនាបតីតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត ជូនជនភៀសសឹក នៅមណ្ឌលសុវត្ថិភាព។
អំឡុងចុះពិនិត្យស្ថានភាពជនភៀសសឹកនៅមណ្ឌលសុវត្ថិភាព ឯកឧត្តម ទេសរដ្ឋមន្រ្តី គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ មានប្រសាសន៍ថា ក្នុងគ្រាដ៏លំបាកដោយសារការឈ្លានពានពីកងទ័ពនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ បានណែនាំដល់ក្រសួង-ស្ថាប័ន និងអាជ្ញាធរគ្រប់ជាន់ថ្នាក់ត្រូវមានការយកចិត្តទុកដាក់ពីសុខទុក្ខប្រជាជនភៀសសឹកដែលបន្តជម្លៀសមកពីព្រំដែន។
ឯកឧត្តម ទេសរដ្ឋមន្រ្តី បញ្ជាក់ថា ចាប់តាំងពីមានការវាយប្រហារតាមបណ្តោយព្រំដែនជាថ្មី សម្តេចតេជោ ហ៊ុន សែន, សម្តេចកិត្តិព្រឹទ្ធបណ្ឌិត ប៊ុន រ៉ានី, សម្តេចធិបតី ហ៊ុន ម៉ាណែត និងលោកជំទាវ ពេជ ចន្ទមុនី បានផ្តល់អំណោយ ស្បៀងជាគ្រឿងឧបភោគ បរិភោគ និងសម្ភារៈប្រើប្រាស់ជូនប្រជាពលរដ្ឋភៀសសឹកជាបន្តបន្ទាប់តាមបណ្តាមណ្ឌលសុវត្ថិភាព បូករួមសកម្មភាពរួមចំណែកសប្បុរសជន និងអង្គការដៃគូ។
ក្នុងថ្ងៃដដែល ឯកឧត្តម ទេសរដ្ឋមន្រ្តី បានចុះសួរសុខទុក្ខជនភៀសសឹកនៅមណ្ឌលសុវត្ថិភាពតាមបណ្តាខេត្តផ្សេងទៀត នៅជិតនឹងជម្រកចល័តដែលក្រុមការងារកំពុងមមាញឹករៀបចំជូនជនភៀសសឹកផងដែរ។
ឯកឧត្តម ទេសរដ្ឋមន្រ្តី ថ្លែងថា ការរៀបចំជម្រកចល័តនេះ នឹងអាចទទួលជនភៀសសឹកច្រើនគ្រួសារដែលអាចការពារពីអាកាសធាតុក្នុងពេលបច្ចុប្បន្ន ហើយអាចផ្តល់លទ្ធភាពដល់គ្រួសារភៀសសឹកដែលមានសមាជិកគ្រួសារផងដែរ។
ឯកឧត្តម ទេសរដ្ឋមន្រ្តី បន្ថែមថា សម្តេចធិបតី ហ៊ុន ម៉ាណែត ប្រមុខរាជរដ្ឋាភិបាល តែងតែដល់ផ្តល់អនុសាសន៍ និងរម្លឹកជាប់ជាប្រចាំពីសុខទុក្ខជនភៀសសឹក និងមណ្ឌលសុវត្ថិភាពដែលជាជម្រកសំខាន់ដោះស្រាយក្នុងគ្រាដែលប្រជាពលរដ្ឋស្លូតត្រង់តាមបណ្តោយព្រំដែនត្រូវបង្ខំចិត្តចាកចេញពីផ្ទះសម្បែងរបស់ខ្លួន៕
