ប្រជាពលរដ្ឋនៅច្រកទ្វារបឹងត្រកួន ស្ថិតក្នុងភូមិបន្ទាយមានរិទ្ធ ឃុំគោករមៀត ស្រុកថ្មពួក ខេត្តបន្ទាយមានជ័យ នាំគ្នាមកបោះតង់ ដើម្បីរង់ចាំរារាំងកម្លាំងយោធាថៃ ដែលបំណងរាយបន្លាលួសរំលោភលើទឹកដីកម្ពុជា។
បើតាមប្រសាសន៍របស់ឯកឧត្តម អ៊ុំ រាត្រី អភិបាលខេត្តបន្ទាយមានជ័យ ដែលបានថ្លែងប្រាប់ក្រុមអ្នកសារព័ត៌មានជាតិ និងអន្តរជាតិ មកពីស្ថាប័នផ្សេងៗគ្នា ក្នុងអំឡុងចុះពិនិត្យមើលទីតាំងជាក់ស្ដែង នៅថ្ងៃទី១៥ ខែសីហានេះ បានឲ្យដឹងថា កម្លាំងយោធាថៃ ព្យាយាមបន្លាលួសរំលោភលើទឹកដីកម្ពុជា ខណៈមានភស្តុតាងជាច្រើនបង្ហាញថា ជាទឹកដីជាតិរបស់កម្ពុជា ដោយសារមានភស្តុតាងដូចជា បង្គោលឡាក់ដែលបោះសម្គាល់ព្រំប្រទល់តាំងពីសម័យបារាំង , លេណដ្ឋានទ័ពដែលសាងសង់តាំងពីឆ្នាំ១៩៨៥ ដោយកងទ័ពវៀតណាមដែលមកជួយកម្ពុជា ក្នុងសង្គ្រាមរវាងរដ្ឋកម្ពុជា និងទ័ពខ្មែរក្រហម។
ឯកឧត្តម បានបញ្ជាក់ថា កងទ័ពឈ្លានពានថៃ មានបំណងរាយបន្លាលួសព័ទ្ធយកដីកម្ពុជា នៅច្រកទ្វារបឹងត្រកួន ប្រមាណ២០០ម៉ែត្រ ពីបន្ទាត់ព្រំដែន និងបានទាមទារឲ្យខាងកម្ពុជាយើងវាយកម្ទេចទីស្នាក់ការគយនៅទីនោះ ខណៈកំពុងស្ថិតនៅលើទឹកដីកម្ពុជា។
សូមបញ្ជាក់ថា កាលពីថ្ងៃទី១៤ ខែសីហា ឆ្នាំ២០២៥ ក្រុមអ្នកសង្កេតការណ៍អន្តរកាល (IOT) ដឹកនាំដោយលោកវរសេនីយ៍ឯក NAZLEE BIN ABDUL RAHIM អនុព័ន្ធយោធាម៉ាឡេស៊ីប្រចាំកម្ពុជា ដែលមាននិវេសនដ្ឋានក្នុង និងក្រៅប្រទេសកម្ពុជា រួមមាន៖ ប្រ៊ុយណេ ឥណ្ឌូនេស៊ី ឡាវ មីយ៉ាន់ម៉ា ហ្វីលីពីន និងវៀតណាម ក៏បានចុះទៅមើលដល់ទីតាំងផ្ទាល់ច្រកទ្វារព្រំដែនអន្តរជាតិប៉ោយប៉ែត ច្រកទ្វារព្រំដែនអូរបីជាន់(ភូមិជោគជ័យ) និងច្រកទ្វារព្រំដែនបឹងត្រកួន ក្នុងខេត្តបន្ទាយមានជ័យ, តំបន់យោធភូមិភាគទី៥ខេត្តបាត់ដំបង, និងច្រកទ្វារព្រំដែនអានសេះខេត្តព្រះវិហារ បន្ទាប់ពីកម្លាំងយោធាថៃ បាននិងកំពុងរាយលួសបន្លា ព្រមទាំងបន្ថែមកម្លាំងទ័ព ក្រោយបទឈប់បាញ់ និងសេចក្តីថ្លែងការណ៍រួម នៃកិច្ចប្រជុំវិសាមញ្ញ គណៈកម្មាធិការព្រំដែនទូទៅ កម្ពុជា-ថៃ កាលពីថ្ងៃទី៧ ខែសីហា ឆ្នាំ២០២៥ នៅប្រទេសម៉ាឡេស៊ី៕
