សៀមរាប៖កាលពីថ្ងៃទី១០ ខែកក្កដា ឆ្នាំ២០២៥ កងរាជអាវុធហត្ថខេត្តសៀមរាប បានទទួលបណ្តឹងផ្ទាល់មាត់ពីជនរងគ្រោះតាមរយៈលេខទូរស័ព្ទបន្ទាន់ 1296 ដើម្បីសុំកិច្ចអន្តរាគមន៍លើករណីលួច ដែលបង្កឡើងដោយជនសង្ស័យមួយក្រុម បានធ្វើសកម្មភាពលួចយកម៉ូតូ នៅចំណុចភូមិពោធិបន្ទាយជ័យ សង្កាត់សៀមរាប ក្រុងសៀមរាប។ ភ្លាមៗនោះ បន្ទាប់ពីទទួលបណ្ដឹង កម្លាំងកងរាជអាវុធហត្ថខេត្តសៀមរាប បានចុះអន្តរាគមន៍ដល់កន្លែងកើតហេតុ ធ្វើការឃាត់ខ្លួនជាក់ស្តែងបានជនសង្ស័យចំនួន ០២នាក់ នាំយកមកស្តាប់ចម្លើយអំពីរឿងហេតុ និងចាត់ការតាមនីតិវិធី។ ជនសង្ស័យទាំង០២នាក់ មានឈ្មោះ ថា ផាត ភេទប្រុស អាយុ២៥ឆ្នាំ និងម្នាក់ទៀតឈ្មោះវេង ម៉េង ភេទប្រុស អាយុ២៣ឆ្នាំ ។
ក្រោមវិធានការជំនាញជនសង្ស័យទាំង០២នាក់ បានសារភាពឲ្យដឹងដូចៗគ្នាថា ពួកខ្លួនបានលួចម៉ូតូពិតប្រាកដមែន និងធ្លាប់ប្រើប្រាស់គ្រឿងញៀនផងដែរ។
ជនសង្ស័យទាំង០២នាក់ ត្រូវបានកម្លាំងជំនាញការិយាល័យប្រឆាំងបទល្មើសព្រហ្មទណ្ឌ នៃកងរាជអាវុធហត្ថខេត្តសៀមរាប កសាងសុំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់ ចំណែកម៉ូតូបានរកឃើញ និងប្រគល់ជូនម្ចាស់ដើមវិញផងដែរ៕
