ភ្នំពេញ៖នាព្រឹកថ្ងៃពុធ ៩កើត ខែជេស្ឋ ឆ្នាំម្សាញ់សប្តស័ក ពុទ្ធសករាជ ២៥៦៩ ត្រូវនឹងថ្ងៃទី ០៤ ខែ មិថុនា ឆ្នាំ២០២៥ ដោយមានគិតគូរពីសុខទុក្ខរបស់បងប្អូនប្រជាពលរដ្ឋ ដែលរស់នៅក្នុងរាជធានីភ្នំពេញប្រមាណជាង៣លាននាក់ ដែលកំពុងមានការព្រួយបារម្មណ៍ អំពីជំនន់ទឹកភ្លៀង នារដូវវស្សានេះ ។
វត្តមានឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញ លោកមិនបាននៅស្ងៀម ព្រងើយកន្ដើយឡើយ លោកបានដឹកនាំ ក្រុមការងារមន្ត្រីជំនាញ រួមទាំងលោក-លោកស្រី អភិបាលនៃគណៈអភិបាលខណ្ឌ ដង្កោ ខណ្ឌចំការមន និង ខណ្ឌមានជ័យ តែងតែយកចិត្ដទុកដាក់ ចុះត្រួតពិនិត្យផ្ទាល់ នៅតាមការដ្ឋានសាងសង់ស្ថានីយ៍បូមទឹក ដែលជាប្រពន្ធ័រំដោះទឹកដ៏សំខាន់ ក្នុងភូមិសាស្ត្រ រាជធានីភ្នំពេញ ព្រមទាំងអញ្ជើញចុះទៅត្រួតពិនិត្យការដ្ឋានសាងសង់ស្ពានបេតុងអាម៉េ ទី ២ នៃគម្រោងស្ថាបនាមហាវិថី ឈុន គង់ បែកខាងកើតនៃតំបន់អភិវឌ្ឍន៍ជើងឯក ។
ក្នុងនោះផងដែរ ឯកឧត្តម អភិបាលរាជធានីភ្នំពេញ ក៏បានណែនាំទៅដល់ លោក-លោកស្រី ដែលជាអភិបាលខណ្ឌ សូមយកចិត្តទុកដាក់អោយបានខ្ពស់ ចំពោះបញ្ហា នានាដែលបង្កឡើងដោយកត្តាធម្មជាតិ ពិសេសគឺបញ្ហាជំនន់ជន់លិច ផ្លូវនិងផ្ទះប្រជាពលរដ្ឋ ដែលបង្កឡើងដោយទឹកភ្លៀង និង កង្កឡើងដោយកង្វះការយល់ដឹងពីំសំណាក់ប្រជាពលរដ្ឋ មួយចំនួនតូច ទៅលើការទុកដាក់វិចខ្ចប់សំរាម មិនបានត្រឹមត្រូវតាមការណែនាំ របស់អាជ្ញាធរ ដែលបណ្តាលអោយហូរធ្លាក់ចូលលូ កកស្ទះចរន្តផ្លូវទឹក និង ត្រូវបន្តណែនាំប្រជាពលរដ្ឋក្នុងមូលដ្ឋាន អោយចូលរួមថែរក្សារបរិស្ថាន ទុកដាក់វិចខ្ចប់សំរាម អោយបានត្រឹមត្រូវ ចូលរួមទាំងអស់គ្នា ភូមិឋានស្អាតបរិស្ថានល្អ គ្មានសំរាមគ្មានថង់ផ្លាស្ទីក ហូរធ្លាក់ចូលលូ ។
ឯកឧត្តម ឃួង ស្រេង អភិបាលរាជធានីភ្នំពេញ ក៏បានមានប្រសាសន៍បញ្ជាក់បន្ថែម ទៅកាន់ក្រុមហ៊ុន ទទួលសិទ្ធិម៉ៅការសាងសង់ស្ថានីយ៍បូមទឹក សូមធ្វើយ៉ាងណាពន្លឿនការសាងសង់ អោយបានលឿននិងប្រកបដោយគុណភាព សោភណ្ឌ័ភាព អោយបានរួចរាល់ក្នុងពេលឆាប់ខាងមុខ ព្រោះរដូវស្សាចូលមកដល់ហើយ ។
ជាចុងក្រោយក្នុងនាមឯកឧត្តម ជាអភិបាលនៃគណៈអភិបាល រាជធានីភ្នំពេញ និងជាតំណាងដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា លោកតែងតែគិតគូរ ពីសុខទុក្ខរបស់បងប្អូនប្រជាពលរដ្ឋ មិនដែលភ្លេចឡើយ និង សូមជូនពរដល់បងប្អូនប្រជាពលរដ្ឋ ទាំងអស់ សូមជួបប្រទះតែសេចក្តីសុខ សុវត្ថិភាព និង សុភមង្គល គ្រប់ៗគ្រួសារ៕
