នាព្រឹកថ្ងៃទី១៥ ខែមិថុនា ឆ្នាំ២០២២នេះ ឯកឧត្តម ហ៊ាង ស៊ីណេ អនុរដ្ឋលេខាធិការក្រសួងអប់រំ យុវជន និងកីឡា និងឯកឧត្តម ពាង ណារិទ្ធ អភិបាលរងខេត្តត្បូងឃ្មុំ អញ្ជើញជាអធិបតី បើកសន្និបាតបូកសរុបការងារអប់រំ យុវជន និងកីឡាខេត្តត្បូងឃ្មុំ ឆ្នាំ២០២០-២០២១ និងទិសដៅការងារឆ្នាំសិក្សា២០២១-២០២២ នៅសាលប្រជុំសាលាខេត្តត្បូងឃ្មុំ ។
បើតាមរបាយការណ៍របស់លោក អ៉ិន ពៅសម្បត្តិ ប្រធានមន្ទីរអប់រំ យុវជន និងកីឡាខេត្តត្បូងឃ្មុំ បានឲ្យដឹងថា ៖ ក្នុងឆ្នាំ២០២២នេះ មន្ទីរក៏នឹងត្រៀមអនុវត្តការដាក់ចេញរបស់ក្រសួងនូវវិធានការកែទម្រង់វិស័យអប់រំដំណាក់កាលទី៣ គឺការកសាងប្រព័ន្ធ និងការអភិវឌ្ឍសមត្ថភាព ដោយដាក់ឲ្យអនុវត្តអភិក្រមស្ដីពីការគ្រប់គ្រងផ្ដោតលើលទ្ធផល ឆ្ពោះទៅរកការដោះស្រាយបញ្ហាជាលក្ខណៈប្រព័ន្ធ និងតាមបែបអនុវិស័យ ការពង្រឹងប្រព័ន្ធគ្រប់គ្រងអប់រំ ដោយត្រូវរួមបញ្ចូលគ្នានូវការពិនិត្យឡើងវិញមុខងារ និងភារកិច្ច ការរៀបចំផែនការប្រចាំឆ្នាំ ការអនុវត្តកន្លងអាជីព ការអភិវឌ្ឍន៍សមត្ថភាព និងការពិនិត្យតាមដាននិងវាយតម្លៃ។
លោក បន្តថា៖ បើគិតត្រឹមឆ្នាំសិក្សា២០២១ -២០២២នេះ ខេត្តត្បូងឃ្មុំ សាលាត្តេយ្យសិក្សា និងគ្រឹះស្ថានសិក្សាចំណេះទូទៅទាំងសាធារណៈ និងឯកជនមានចំនួន៥៥៣ ក្នុងនោះ មត្តេយ្យសិក្សាសហគមន៍៨៥កន្លែង គ្រឹះស្ថានសិក្សាចំណេះទូទៅសាធារណៈ៤៨៦ គ្រឹះស្ថានសិក្សាឯកជន ៧០ សិស្សសរុបចំនួន១៧០,៧៥០នាក់ ស្រី៨៥.៦៩០នាក់។
ថ្លែងនាឱកាសនោះឯកឧត្តម ហ៊ាង ស៊ីណេ អនុរដ្ឋលេខាធិការក្រសួងអប់រំ យុវជន និងកីឡា បានមានប្រសាសន៍ថា៖ ប្រទេសមួយមានការសិក្សាអប់រំ កាន់តែល្អប្រសើរនិងកាន់តែខ្ពស់ ប្រទេសជាតិនោះនឹងកាន់តែមានការអភិវឌ្ឍរីកចម្រើនយ៉ាងឆាប់រហ័ស ពោលគឺមានធនធានមនុស្ស វាជាគ្រឹះរឹងមាំនៃ ការអភិវឌ្ឍប្រទេសជាតិ។ សង្គមមួយមានការ អភិវឌ្ឍរីកចម្រើនខ្លាំងក្លា និងឆាប់រហ័ស វាអាស្រ័យលើប្រជាពលរដ្ឋនៃប្រទេសនោះ មានចំណេះដឹងខ្ពង់ខ្ពស់ និងសម្បូរអ្នកចេះដឹង។ ដូច្នេះវាទាមទារឱ្យមានការសិក្សាអប់រំកាន់ តែខ្ពស់ផងដែរ ទើបអាចសម្រេចបាននូវភាពរីកចម្រើន និងការអភិវឌ្ឍនេះ។
ឯកឧត្តម បានបន្តថា ក្រសួងអប់រំបានដាក់ចេញនិងធ្វើកំណែទម្រង់ប្រព័ន្ធអប់រំ ដោយផ្តោតជាសំខាន់លើគុណភាពអប់រំ។ ដោយធ្វើយ៉ាងណាឱ្យធនធានមនុស្សនៅកម្ពុជា ក្លាយជាធនធានមនុស្សដែលពោរពេញទៅដោយសមត្ថភាព ចំណេះដឹងជ្រៅជ្រះ និងមានបទពិសោធន៍ខ្ពស់ នូវជំនាញពិតប្រាកដ។ ដើម្បីសម្រេចបានការធ្វើកំណែទម្រង់ប្រព័ន្ធ អប់រំ លុះត្រាបុគ្គលិកអប់រំទាំងអស់ ពិសេសលោកគ្រូ អ្នកគ្រូ និងនាយកសាលា នានា ត្រូវពង្រឹងនូវការគ្រប់គ្រងសាលារៀនឱ្យមានវិន័យល្អពិសេសលើគ្រូបង្រៀនតែម្តង។
ជាមួយគ្នានោះ យើងជាអ្នកបង្រៀន និងជាអ្នកអប់រំសិស្សានុសិស្សឱ្យក្លាយជាអ្នកចេះដឹង យើងត្រូវតែគោរព និង ឱ្យតម្លៃទៅលើខ្លួនឯងជាមុនសិន។ ពិសេសគឺគោរពវិន័យឱ្យបានខ្ជាប់ខ្ជួន ព្រោះយើងជាគំរូសម្រាប់ឱ្យសិស្សគ្រប់គ្នាយកគំរូ និងរៀនសូត្រអនុវត្តន៍តាម ទើបធនធានមនុស្សរបស់យើងមានគុណធម៌ សីលធម៌ល្អ។ មិនតែប៉ុណ្ណោះចំណេះដឹងដែលពួកគាត់ទទួល បានមកនឹងចូលរួមធ្វើការអភិវឌ្ឍសង្គមជាតិរបស់យើង ឱ្យមានការរីកចម្រើនទៅថ្ងៃអនាគតផងដែរ៕
