មន្រ្តីជាន់ខ្ពស់ក្រសួងសុខាភិបាល បានអំពាវនាវដល់ប្រជាពលរដ្ឋត្រូវបង្កើនការប្រុងប្រយ័ត្នខ្ពស់ និងចូលរួម បន្តអនុវត្តវិធានការការពារទុកជាមុននូវការចម្លងជំងឺអុតស្វានេះ ទៅតាមការណែនាំរបស់ក្រសួងសុខាភិបាល ខណៈដែលជំងឺនេះ បានរកឃើញនៅតាមបណ្តាប្រទេសមួយចំនួននៅលើសកលលោក ។
ថ្លែងក្នុងកិច្ចសម្ភាសន៍ជាមួយអ្នកសារព័ត៌មាន លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការនិងជាអ្នក នាំពាក្យក្រសួង សុខាភិបាលបានឱ្យដឹងថា ក្រោយពីមានការផ្ទុះចេញនូវជំងឺអុតស្វាក្នុងពេលថ្មីៗនេះ បណ្តាប្រទេសចំនួន ២៣ នៅលើសកលលោក ដែលមិនមែនជាប្រទេសអង់ដេមីនៃជំងឺនេះ បានរាយការណ៍ជូនទៅអង្គការសុខភាពពិភពលោកអំពីករណី ជំងឺអុតស្វា (Monkeypox) មានចំនួនសរុប ករណីឈឺ ២៥៧នាក់ និងករណីសង្ស័យ ១២០នាក់ គិតត្រឹមថ្ងៃទី២៦ ខែឧសភា ឆ្នាំ២០២២ និងមិនទាន់មានករណីស្លាប់នៅឡើយ។ លោកជំទាវបញ្ជាក់ថា ជំងឺអុតស្វា (Monkeypox) គឺជាជំងឺដែលឆ្លងដោយវីរុស ចម្លងពីសត្វទៅមនុស្ស នៅតំបន់ត្រូពិក ដែលមានភ្លៀងនៃអាហ្វ្រិកកណ្តាល និងអាហ្វ្រិកខាងលិច ជួនកាល បាននបញ្ជូនការ ចម្លងជំងឺនេះ ទៅកាន់តំបន់ផ្សេងៗទៀត។ លោកជំទាវបន្ថែមថា ជំងឺអុតស្វានេះមានការកើតចេញពងទឹកនៅលើស្បែកធំៗ ដោយនៅលើដងខ្លួន មុខ បាតដៃ និងជើង ដែលខុសពីជំងឺអុតធំ ជំងឺអុតស្វាយ ឬជំងឺកញ្ជ្រិល។
លោកជំទាវបញ្ជាក់ថា បច្ចុប្បន្ននេះ ប្រទេសកម្ពុជា មិនទាន់មានករណីសង្ស័យ ឬ ករណីវិជ្ជមានជំងឺនេះនៅឡើយទេ ប៉ុន្តែទោះជា យ៉ាង លោកជំទាវអំពាវនាវដល់ប្រជាជន ដែលរស់នៅក្នុងព្រះរាជាណាចក្រកម្ពុជា ត្រូវមានការប្រុងប្រយ័ត្នខ្ពស់ជាប់ជានិច្ច ដោយបុគ្គល គ្រួសារ និងសហគមន៍ ត្រូវបន្តអនុវត្តវិធានការ បង្ការជំងឺផ្ទាល់ខ្លួន ដែលក្រសួងសុខាភិបាលតែងតែបានណែនាំ និងដូចដែលបានបង្ហាញនៅខាងក្រោមជាបន្តបន្ទាប់ទៀត។
«បច្ចុប្បន្នយើងរស់នៅគឺមានមេរោគច្រើនប្រភេទមានន័យថា យើងរស់នៅជាមួយនឹងវត្តមាន នៃពពួកបាក់តេរី ពពួកវីរុសដែលនៅតាមបរិស្ថានជាច្រើន ហើយជាពិសេសសត្វក៏វាឈឺនិងមានជំងឺរបស់វាដែរ។ ហើយភាគច្រើនដែលយើង សង្កេតឃើញថា ការឈឺរបស់មនុស្សមួយចំនួនធំ គឺឆ្លងមកពីសត្វដែរ។ ដូច្នេះយើងត្រូវតែបន្តនូវការប្រុងប្រយ័ត្នរបស់យើង ដើម្បីការពារសុខភាពរបស់យើងស្របទៅតាមអភិក្រមដែលយើងតែងនិយាយថាការពារប្រសើរជាងព្យាបាល។»
លោកជំទាវវេជ្ជបណ្ឌិតបញ្ជាក់ទៀតថា ក្នុងករណីសង្ស័យមានរោគសញ្ញា ចេញកន្ទួលរមាស់បែបពងទឹកនៅលើដងខ្លួន បាតដៃ បាតជើង និងផ្ទៃមុខ អមដោយរោគសញ្ញាក្ដៅខ្លួនលើសពី ៣៨,៥ អង្សាសេ និងមានឈឺក្បាលហើមកូនកណ្តុរ ឈឺសាច់ដុំ និងខ្លួនប្រាណ ឈឺចង្កេះ អស់កម្លាំងខ្លាំង រួមជាមួយនឹងប្រវត្តិធ្វើដំណើរទៅកន្លែងដែលមានកើតជំងឺអុតស្វា ត្រូវដាក់ខ្លួនឱ្យនៅ ដាច់ដោយឡែក ដើម្បីធ្វើការពិនិត្យសុខភាពដោយក្រុមគ្រូពេទ្យជាចាំបាច់ភ្លាមៗ នឹងត្រូវធ្វើតេស្តវិភាគនៅមន្ទីរពិសោធន៍ ដោយយកវត្ថុសំណាកដំបៅនៅលើដងខ្លួនអ្នកសង្ស័យ ឬអ្នកឈឺតាមលក្ខណៈបច្ចេកទេសត្រឹមត្រូវ ហើយបញ្ចូនទៅធ្វើវិភាគ នៅមន្ទីរពិសោធន៍ប៉ាស្ទ័រកម្ពុជា ដើម្បីចៀសវាងនូវការចម្លងជំងឺនេះទៅកាន់អ្នកផ្សេងទៀត៕
