ប្រជាពលរដ្ឋរស់នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បាននាំគ្នាមកបោះតង់ស្នាក់នៅជាប់បន្លាលួស ដែលទាហានថៃបានរាយព័ទ្ធចូលមកខាងទឹកដីកម្ពុជា និងបានព័ទ្ធចូលដល់ផ្ទះប្រជាពលរដ្ឋជំនួន ៦ខ្នងនៅទីនោះ។ ប្រជាពលរដ្ឋទាំងនោះ បានលើកដៃសំពះសុំឱ្យរាជរដ្ឋាភិបាល និងសហគមន៍អន្តរជាតិ ជួយដល់ពួកគាត់ បន្ទាប់ពីត្រូវបានយោធាឈ្លានពានថៃរាយបន្លាលួសរំលោភយកដី និងផ្ទះសម្បែងរបស់ពួកគាត់។
អ្នកស្រីទូច រិទ្ធ ប្រជាពលរដ្ឋរស់នៅភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ បានថ្លែងថា ពួកគាត់បានមករស់នៅតំបន់នេះជាយូរណាស់មកហើយ ហើយវាស្ថិតក្នុងទឹកដីនៃប្រទេសកម្ពុជា។ លោកស្រី បញ្ជាក់ថាយោធាថៃ បានចូលមកកាន់កាប់ទឹកដីកម្ពុជាដោយខុសច្បាប់ ដោយការរាយបន្លាលួសធ្វើជាព្រំដែន ក្នុងចម្ងាយប្រមាណ២០០ម៉ែត្រពីព្រំដែន។ លោកស្រី បានទាមទារឲ្យសហគមន៍អន្តរជាតិជួយរកយុត្តិធម៌អំពីការរំលោភនេះ។
បើតាមប្រសាសន៍របស់ឯកឧត្តម អ៊ុំ រាត្រី អភិបាលខេត្តបន្ទាយមានជ័យ ដែលបានថ្លែងប្រាប់ក្រុមអ្នកសារព័ត៌មានជាតិ និងអន្តរជាតិ មកពីស្ថាប័នផ្សេងៗគ្នា ក្នុងអំឡុងចុះពិនិត្យមើលទីតាំងជាក់ស្ដែង នៅថ្ងៃទី១៥ ខែសីហានេះ បានឲ្យដឹងថា ផ្ទះប្រជាពលរដ្ឋចំនួន៦ខ្នងនៅតំបន់នេះ ត្រូវបានយោធាថៃហ៊ុមព័ទ្ធចូលយក ដោយបំពាន។កម្លាំងយោធាថៃ ព្យាយាមរាយបន្លាលួសរំលោភទឹកដីកម្ពុជា ខណៈមានភស្តុតាងជាច្រើន។ ឯកឧត្តម បានបញ្ជាក់ថា កងទ័ពថៃ មានបំណងរាយបន្លាលួសព័ទ្ធយកដីកម្ពុជានៅតំបន់នេះប្រមាណ២០០ម៉ែត្រ ពីបន្ទាត់ព្រំដែន។ ឯកឧត្តមបន្តថា បន្លាលួស និងកង់ឡានទាំងនេះនឹងមិនត្រូវបានភាគីកម្ពុជារើចេញនោះទេ ដោយរង់ចាំទុកបង្ហាញដល់សហគមន៍អន្តរជាតិឲ្យបានឃើញពីមហិច្ឆតារណលោភរបស់កម្លាំងយោធាថៃមកលើបូរណភាពទឹកដីកម្ពជា ក៏ដូចជាបង្ហាញពីការរំលោភកិច្ចព្រមព្រៀងនានារបស់ភាគីថៃទៅកាន់សហគមន៍អន្តរជាតិ។
សូមបញ្ជាក់ថា កាលពីថ្ងៃទី១៤ ខែសីហា ឆ្នាំ២០២៥ ក្រុមអ្នកសង្កេតការណ៍អន្តរកាល (IOT) ដឹកនាំដោយលោកវរសេនីយ៍ឯក NAZLEE BIN ABDUL RAHIM អនុព័ន្ធយោធាម៉ាឡេស៊ីប្រចាំកម្ពុជា ដែលមាននិវេសនដ្ឋានក្នុង និងក្រៅប្រទេសកម្ពុជា រួមមាន៖ ប្រ៊ុយណេ ឥណ្ឌូនេស៊ី ឡាវ មីយ៉ាន់ម៉ា ហ្វីលីពីន និងវៀតណាម ក៏បានចុះទៅមើលដល់ទីតាំងផ្ទាល់ច្រកទ្វារព្រំដែនអន្តរជាតិប៉ោយប៉ែត ច្រកទ្វារព្រំដែនអូរបីជាន់(ភូមិជោគជ័យ) និងច្រកទ្វារព្រំដែនបឹងត្រកួន ក្នុងខេត្តបន្ទាយមានជ័យ, តំបន់យោធភូមិភាគទី៥ខេត្តបាត់ដំបង, និងច្រកទ្វារព្រំដែនអានសេះខេត្តព្រះវិហារ បន្ទាប់ពីកម្លាំងយោធាថៃ បាននិងកំពុងរាយលួសបន្លា ព្រមទាំងបន្ថែមកម្លាំងទ័ព ក្រោយបទឈប់បាញ់ និងសេចក្តីថ្លែងការណ៍រួម នៃកិច្ចប្រជុំវិសាមញ្ញ គណៈកម្មាធិការព្រំដែនទូទៅ កម្ពុជា-ថៃ កាលពីថ្ងៃទី៧ ខែសីហា ឆ្នាំ២០២៥ នៅប្រទេសម៉ាឡេស៊ី៕
