ពោធិ៍សាត់៖ នារសៀលថ្ងៃទី២៧ ខែមិថុនា ឆ្នាំ២០២៦ នៅពហុកីឡដ្ឋានសម្តេចតេជោក្រគរ, លោក កែវ រតនៈ រដ្ឋមន្ត្រីក្រសួងរ៉ែ និងថាមពល និងជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តពោធិ៍សាត់ បានអញ្ជើញជួបសំណេះសំណាល និងបញ្ជ្រាបផ្សព្វផ្សាយអំពីការអភិវឌ្ឍន៍ និងចក្ខុវិស័យខេត្តពោធិ៍សាត់ក្នុងថ្ងៃខាងមុខ ក្រោមម្លប់សន្តិភាព ជាមួយបងប្អូនអាជីវករមកពីបណ្តាផ្សារនានា ទូទាំងក្រុង-ស្រុកក្នុងខេត្ត (លើកលែងស្រុកវាលវែង) សរុបប្រមាណ ២,៣៥០នាក់។
ក្នុងពិធីដ៏មានអត្ថន័យនេះ មានការចូលរួមពី លោក ខូយ រីដា អភិបាលខេត្តពោធិ៍សាត់ និងជាប្រធានគណៈកម្មាធិការគណបក្សខេត្ត, លោកបណ្ឌិត ទី នរិន្ទ រដ្ឋលេខាធិការប្រចាំការ ក្រសួងរ៉ែ និងថាមពល, លោក យឹម វិសិដ្ឋ ប្រធានអាជ្ញាធរអគ្គិសនីកម្ពុជា ព្រមទាំងលោក លោកស្រី ជាក្រុមការងារចុះជួយតាមបណ្តាស្រុកក្រុង-ឃុំសង្កាត់ និងថ្នាក់ដឹកនាំមន្ទីរអង្គភាពជុំវិញខេត្ត។
មុននឹងចូលរួមពិធីសំណេះសំណាល បងប្អូនអាជីវករបានចុះទស្សនកិច្ចជាក់ស្តែង នៅតំបន់សេដ្ឋកិច្ចពិសេសពោធិ៍សាត់ ដោយបានឃើញផ្ទាល់នូវខ្សែច្រវ៉ាក់ផលិតកម្ម នៃរោងចក្រដំឡើងរថយន្ត Ford របស់សហរដ្ឋអាមេរិក, រោងចក្រផលិតត្រង់ស្វូរ (Topic និង Emax), រោងចក្រគ្រឿងបង្គុំអេឡិចត្រូនិច Minebea និងស្ថានីយ៍ផលិតថាមពលអគ្គិសនីដើរដោយពន្លឺព្រះអាទិត្យ (Solar Farm) ដ៏ទំនើប។
លោក កែវ រតនៈ បានថ្លែងដោយក្តីមោទនភាពថា ការអញ្ជើញបងប្អូនអាជីវករមកកាន់ពហុកីឡដ្ឋានសម្តេចតេជោក្រគរនាពេលនេះ គឺដើម្បីរួមគ្នា «បើកឆាក» ទីតាំងដ៏មានសក្តានុពលនេះ ដែលទើបនឹងសាងសង់រួច។
លោកបានលើកឡើងថា៖ «បងប្អូនអាជីវករទាំងអស់ គឺជាកម្លាំងចលករដ៏សំខាន់ ក្នុងការជំរុញសេដ្ឋកិច្ចខេត្ត។ រាល់សមិទ្ធផលដែលកើតឡើងនាពេលនេះ មិនមែនកើតឡើងដោយចៃដន្យឡើយ ប៉ុន្តែវាជាផ្លែផ្កានៃសន្តិភាព និងការខិតខំប្រឹងប្រែងរបស់រាជរដ្ឋាភិបាល។ ដូច្នេះការរួបរួមគ្នាជាកម្លាំងមហាសាមគ្គី ដើម្បីគាំទ្រការអភិវឌ្ឍ និងគាំទ្រគណបក្សប្រជាជនកម្ពុជា គឺស្មើនឹងការបោះឆ្នោតដើម្បីការពារសមិទ្ធិផល និងអនាគតរបស់ខ្លួនឯងផងដែរ»។
ក្នុងឱកាសនោះ លោកបានផ្តាំផ្ញើដល់អាជីវករឱ្យចូលរួមថែរក្សាអនាម័យក្នុងផ្សារ ការទុកដាក់សំរាមឱ្យបានត្រឹមត្រូវ និងចលនាដាំដើមឈើឱ្យបានយ៉ាងតិចម្នាក់មួយដើមក្នុងមួយឆ្នាំ ដើម្បីសម្រេចបំណងប្រាថ្នាក្នុងការដាំដើមឈើឱ្យបានគ្រប់ក្រុង-ស្រុក ជាពិសេសតាមដងផ្លូវជាតិលេខ៥។ លោកក៏បានគាំទ្រគោលការណ៍មិនអនុញ្ញាតឱ្យបើកផ្សារថ្មីបន្ថែមពីលើផ្សារដែលមានស្រាប់ ដែលអាចប៉ះពាល់ដល់អាជីវកម្មបងប្អូន ប៉ុន្តែនឹងផ្តោតលើការបំពេញបន្ថែមនូវអ្វីដែលបងប្អូននៅខ្វះខាត។
លោកបានរំលឹកពីប្រវត្តិទីតាំងវាលយន្តហោះសម្តេចយស ដែលពីមុនបម្រើការងារយោធា និងដឹកជញ្ជូនស្បៀង មកជាទីតាំងទាក់ទាញវិនិយោគិននាពេលបច្ចុប្បន្ន។ ទីតាំងនេះនឹងក្លាយជាកន្លែងដែលមានភាពទំនើប រួមមាន ស្ថានីយ៍សាករថយន្តអគ្គិសនីល្បឿនលឿន និងផ្សារទំនើបដែលស្ថិតនៅក្បែរតំបន់សេដ្ឋកិច្ចពិសេស។
លោក កែវ រតនៈ បានគូសបញ្ជាក់យ៉ាងមុតមាំថា បច្ចុប្បន្ន ខេត្តពោធិ៍សាត់ បានក្លាយជាទីតាំងផលិតថាមពលស្អាតធំបំផុតក្នុងតំបន់អាស៊ី ហើយនៅឆ្នាំ២០២៧ខាងមុខនេះ យើងនឹងសម្រេចឱ្យបាននូវសមត្ថភាពផលិតថាមពលស្អាត កើនឡើងដល់១,១០០មេហ្កាវ៉ាត់ ដែលនេះជាមោទនភាពដ៏ធំធេងរបស់ប្រជាពលរដ្ឋយើងទាំងអស់គ្នាផងដែរ៕
