ព្រះវិហារ៖ លោក ហុក សុផល ត្រូវបានប្រកាសឱ្យចូលកាន់មុខតំណែងជាផ្លូវការ ជាអភិបាលរងខេត្តព្រះវិហារ នៅព្រឹកថ្ងៃទី២៤ ខែមិថុនា ឆ្នាំ២០២៦ ជំនួសលោក មុត ភិសិទ្ធនា ដែលត្រូវបានថ្នាក់ដឹកនាំផ្ទេរភារកិច្ចទៅកាន់ មុខតំណែងជាអភិបាលរងខេត្តប៉ៃលិន។
ពិធីនេះធ្វើឡើងក្រោមវត្តមានលោក អ៊ុំ ម៉ារ៉ា រដ្ឋលេខាធិការក្រសួងមហាផ្ទៃ តំណាងអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយមានការចូលរួមពីមន្ត្រីជាន់ខ្ពស់ក្រសួងមហាផ្ទៃ និងលោក ប្រាក់ សុវណ្ណ ប្រធានក្រុមប្រឹក្សាខេត្ត លោក គីម រិទ្ធី អភិបាលខេត្តព្រះវិហារ ព្រមទាំងថ្នាក់ដឹកនាំខេត្ត មេបញ្ជាការកងកម្លាំងប្រដាប់អាវុធទាំង៣ ប្រធានមន្ទីរ អង្គភាពជុំវិញខេត្ត អាជ្ញាធរក្រុង ស្រុកទាំង៨ និងមន្ត្រីពាក់ព័ន្ធជាច្រើនរូបទៀត។
នៅក្នុងឱកាសនេះលោក អ៊ុំ ម៉ារ៉ា បានសម្តែងការកោតសរសើរ និងវាយតម្លៃខ្ពស់ចំពោះថ្នាក់ដឹកនាំ មន្ត្រីរាជការ និងកងកម្លាំងប្រដាប់អាវុធខេត្តព្រះវិហារទាំងអស់ ដែលបានរួមសហការគ្នាថែរក្សាសន្តិសុខ សណ្តាប់ធ្នាប់ និងជំរុញការអភិវឌ្ឍខេត្តឱ្យមានការរីកចម្រើនជាបន្តបន្ទាប់។
លោក អ៊ុំ ម៉ារ៉ា ក៏បានថ្លែងណែនាំថ្នាក់ដឹកនាំថ្មី ត្រូវយកចិត្តទុកដាក់ខ្ពស់លើការងារដឹកនាំ បង្កើនកិច្ចសហការជាមួយគ្រប់ភាគីពាក់ព័ន្ធ និងត្រូវចុះជួបដោះស្រាយបញ្ហាប្រឈមនានារបស់ប្រជាពលរដ្ឋនៅមូលដ្ឋាន ឱ្យបានទាន់ពេលវេលា ដើម្បីរួមចំណែកអនុវត្តឱ្យបានជោគជ័យនូវគោលនយោបាយរបស់រាជរដ្ឋាភិបាលកម្ពុជា»។
លោក គីម រិទ្ធី អភិបាលខេត្តព្រះវិហារ បានថ្លែងលើកឡើងថា ការផ្លាស់ប្តូរ និងតែងតាំងមុខតំណែងថ្មី គឺជាការបន្តនិរន្តរភាពនៃការងាររដ្ឋបាល និងការពង្រឹងប្រសិទ្ធភាពការងាររបស់រដ្ឋបាលខេត្ត។ លោកអភិបាលខេត្ត បានស្វាគមន៍លោក ហុក សុផល ដែលត្រូវបានប្រកាសចូលកាន់មុខតំណែងជាអភិបាលរងខេត្តព្រះវិហារ និងបានបង្ហាញជំនឿជាក់ថា លោកនឹងខិតខំបំពេញតួនាទី និងភារកិច្ចប្រកបដោយការទទួលខុសត្រូវខ្ពស់។
លោក គីម រិទ្ធី បានថ្លែងបញ្ជាក់ទៀតថា រដ្ឋបាលខេត្តព្រះវិហារ តែងតែប្រកាន់ខ្ជាប់នូវស្មារតីសាមគ្គីភាព ឯកភាពផ្ទៃក្នុង និងកិច្ចសហការល្អរវាងគ្រប់ស្ថាប័នពាក់ព័ន្ធ ដើម្បីបម្រើផលប្រយោជន៍ប្រជាពលរដ្ឋ និងជំរុញការអភិវឌ្ឍខេត្តឱ្យកាន់តែរីកចម្រើន។
អភិបាលខេត្ត ក៏បានអំពាវនាវដល់ថ្នាក់ដឹកនាំ មន្ត្រីរាជការ និងកងកម្លាំងប្រដាប់អាវុធទាំងអស់ បន្តរក្សាសាមគ្គីភាព ឯកភាពផ្ទៃក្នុង និងរួមគ្នាអនុវត្តការងារឱ្យកាន់តែមានប្រសិទ្ធភាព ដើម្បីឆ្លើយតបនឹងតម្រូវការ និងសេចក្តីរំពឹងទុករបស់ប្រជាពលរដ្ឋ ស្របតាមទិសដៅកំណែទម្រង់ និងការអភិវឌ្ឍរបស់រាជរដ្ឋាភិបាលកម្ពុជា៕
