លោក សេង គន្ធ ប្រធានកិត្តិយស អនុសាខាកាកបាទក្រហមខណ្ឌ​មានជ័យ និងភរិយា អញ្ជើញនាំយកអំណោយដ៏ថ្លៃថ្លា របស់សម្ដេចបវរធិបតី និងលោកជំទាវបណ្ឌិត ប្រគល់ជូនបងប្អូនប្រជាពលរដ្ឋ ដែលរងផលប៉ះពាល់ដោយសារអគ្គិភ័យចំនួន១២គ្រួសារ ស្ថិតនៅ​ក្បែគល់ស្ពានមរតក សម្ដេចតេជោ សង្កាត់​ចក្រអង្រែ​លើ..!

នារសៀលថ្ងៃសៅរ៍ ទី១៥ ខែវិច្ឆិកា ឆ្នាំ​២០២៥ ដោយមានការចង្អុលបង្ហាញ​ពី​ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ និងជាប្រធានគណៈបញ្ជាការឯកភាពរាជធានីផងនោះ លោក សេង គន្ធ អភិបាលនៃគណៈអភិបាខណ្ឌ​មានជ័យ និងជាប្រធានគណៈបញ្ជាការឯកភាពខណ្ឌមានជ័យ និងប្រធានកិត្តិយស អនុសាខាកាកបាទក្រហមកម្ពុជាខណ្ឌមានជ័យ បានដឹកនាំមន្រ្តីរាជការ នៃរដ្ឋបាលខណ្ឌមានជ័យ និងលោក​ កែវ សាវឿន​ ចៅសង្កាត់ចាក់អង្រែលេី អញ្ជើញចុះសួរសុខទុក្ខ និងនាំយកអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ជូនដល់គ្រួសារដែលរងផលប៉ះពាល់ដោយសារអគ្គិភ័យឆាបឆេះចំនួន ១២ខ្នងផ្ទះ នាព្រឹកថ្ងៃដដែល ស្ថិតក្នុងភូមិ៧ សង្កាត់ចាក់អង្រែលើ ខណ្ឌមានជ័យ រាជធានីភ្នំពេញ។

អំណោយដែលបានយកទៅឧបត្ថម្ភក្នុង០១គ្រួសាររួមមាន៖ថវិកាចំនួន៨០.០០០០៛(ប៉ែតសិបម៉ឺនរៀល).អង្ករ ចំនួន២បេ ទម្ងន់៥០គីឡូក្រាម, មី ១កេស ទឹកស៊ីអៀវ ១យួរ, ទឹកត្រី ១យួរ, តង់ និងស័ង្កសីមួយចំនួន ។

នាឱកាសនោះដែរ​លោក សេង គន្ធ បានបញ្ជាក់ថា អំណោយ​ទាំងនេះគឺជាការយកចិត្តទុកដាក់ពីសំណាក់រាជរដ្ឋាភិបាល ដែលតែងតែរួមសុខរួមទុក្ខជាមួយបងប្អូនប្រជាពលរដ្ឋ ទោះបីអំណោយនេះតិចតួចស្ដួចស្ដើងក្ដីក៏អាចជួយសម្រាលទុក្ខលំបាករបស់បងប្អូនបានមួយផ្នែកផងដែរ។​

ឈ្លៀតក្នុងឱកាសនោះដែរ លោក សេង គន្ធ បានសំដែងនូវការសោកស្តាយ ជាពន់ពេក ចំពោះករណីដែលរងផលប៉ះពាល់ដោយសារអគ្គិភ័យនេះ ធ្វើអោយបងប្អូនខូចខាតផ្ទះសំបែង បាត់បង់ទ្រព្យសម្បត្តិជាដើម លោកអភិបាលបាន សំណូមពរដល់បងប្អូនប្រជាពលរដ្ឋ អោយមានការប្រុងប្រយត្ន័អោយបានខ្ពស់ ត្រូវទុកដាក់របស់ដែលអាចបង្កអោយមានអគ្គីភ័យ អោយល្អ ជៀសវាង កើតមានអគ្គីភ័យ ជាយថាហេតុ។

សូមបញ្ជាក់ថា ករណីអគ្គីភ័យឆាបឆេះផ្ទះបងប្អូនប្រជាពលរដ្ឋទាំង១២គ្រួសារនេះ កើតឡើងនៅព្រឹកថ្ងៃសៅរ៍ ទី១៤ ខែវិច្ឆិកា ឆ្នាំ​២០២៥​៕សូមអរគុណ!​