ខេត្តរតនគិរី៖ កាលពីថ្ងៃទី២១ ខែមករា ឆ្នាំ២០២៥ វេលាម៉ោង ៥និង៣០ នាទីល្ងាច កម្លាំងនគរបាលប្រឆាំងបទល្មើសសេដ្ឋកិច្ច របស់ស្នងការ នៃស្នងការដ្ឋាន នគរបាលខេត្តរតនគិរី បានចុះចាប់ បង្ក្រាបបទល្មើសឈើខុសច្បាប់ ១ទីតាំង ដែលស្ថិតនៅភូមិ៤ សង្កាត់ការចាញ ក្រុងបានលុង ខេត្តរតនគិរី ត្រង់ចំណុច ខាងក្រោយផ្សារតាយសេង។
ក្នុងកិច្ចប្រតិបត្តិការនោះ សមត្ថកិច្ចយើង បានចាប់ដកហូត ឈើប្រភេទសុក្រម និងឈើត្រសេក ប្រមាណជាង២០ ដុំ/សន្លឹក របស់មេឈ្មួញ ដុះស្លែម្នាក់ ឈ្មោះ ណានស៊ីថា ភេទប្រុស អាយុ ៤១ ឆ្នាំ ជនជាតិខ្មែរ ។
បើយោងតាមសេចក្តីរាយការណ៍
ពីប្រជាពលរដ្ឋ សុំលាក់អត្តសញ្ញាណ និងសុំមិនបញ្ចេញឈ្មោះ បានឲ្យដឹងថា ឈ្មោះ ណាន ស៊ីថា ម្នាក់នេះគឺជាមេឈ្មួញ រកស៊ីបទល្មើសព្រៃឈើ ដុះស្លែ យូរឆ្នាំមកហើយ ថ្មីៗនេះ តាមប្រភពច្បាស់ការ បានឱ្យដឹងថា ឈ្មួញឈើឈ្មោះ ណាន ស៊ីថា បានប្រមូលទិញ ឈើខុសច្បាប់ ចេញពីចំណុច ភូមិចាអ៊ុង ស្រុកអូរជុំ និងភូមិតឺន ស្ថិតនៅក្នុងស្រុកកូនមុំ ដោយដឹកជញ្ជូន តាមគោយន្តកន្ត្រៃ ម៉ូតូ ឬ ម៉ូតូសណ្ដោងរុឺម៉ក យកមកស្តុកទុកតាមគោលដៅ ដែលគេបានរៀបចំទុក ជាមុន ដូចជាក់ស្ដែងក្នុងចំណុចគោលដៅខាងលើ នៅពេលយប់ លុះពេលព្រឹកឡើង មេឈ្មួញដុះស្លែ ឈ្មោះណាន សុីថា ម្នាក់នេះ រៀបចំដឹកជញ្ជូនចេញ ដោយ ម៉ូតូ រុឺម៉កដើម្បីយកទៅលក់ចែកចាយបន្ត។
អញ្ចឹងតើបានជាឈ្មួញឈើម្នាក់នេះខ្លាំងសម្បើម ដៃ អីយ៉ាងនេះ
សូម្បីតែនៅចំពោះសមត្ថកិច្ច នគរបាលដែលកំពុងតែអនុវត្តច្បាប់ ក៏មេឈ្មួញឈើ ម្នាក់នេះមិនព្រឺរោម ធ្វើចរិតក្រអឺតក្រទម មិនញញើត និងច្បាប់អ្វីទាល់តែសោះ។
លោកវរ:សេនីយ៍ទោ ស៊ូហុង នាយរងការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តរតនគិរី បានឲ្យដឹងថា ឈើសន្លឹកទាំងអស់នេះ ជាប្រភេទឈើសុក្រម ត្រសេក មានមុខកាត់តូចធំចម្រុះ ត្រូវបានរិបអូសយកទៅរក្សាទុកនៅខណ្ឌរដ្ឋបាលព្រៃឈើខេត្ត។
លោកបានបញ្ជាក់ទៀតថា ចំពោះម្ចាស់ឈើ ជាឈ្មួញដុះស្លែ ឈ្មោះណាន ស៊ីថា ភេទប្រុស អាយុ៤១ ឆ្នាំ ជនជាតិខ្មែរ មានទីលំនៅផ្ទះជួល ចល័ត
ខាងលោក ពុំមានធ្វើការឃាត់ខ្លួនគេនោះទេ ដោយសារជាឆន្ទានុសិទ្ធិរបស់តុលាការ។
ទោះបីជាយ៉ាងនេះក្តី ប្រជាពលរដ្ឋ ដែលស្រឡាញ់ធនធានធម្មជាតិ សំណូមពរ ទៅកងកម្លាំងពាក់ព័ន្ធ ជំនាញរដ្ឋបាលព្រៃឈើខេត្ត ជាពិសេសឯកយ្យការ អមសាលាដំបូងខេត្តរតនគិរី មេត្តាចាត់វិធានការឲ្យបានតឹងរឹង និងដាក់ទោសទណ្ឌ ឱ្យបានធ្ងន់ធ្ងរចំពោះជនប្រព្រឹត្តបទល្មើសសេដ្ឋកិច្ចបំផ្លាញធនធានធម្មជាតិទាំងអស់នេះ៕
