ភ្នំពេញ៖ ប្រជាពលរដ្ឋ និងអ្នកធ្វើដំណើរឆ្លងកាត់តាមផ្លូវជាតិលេខ៤ ម្តុំស្ពានអាកាស ផ្សារជម្ពូវ័ន ដោយសារតែទង្វើររបស់លោក ប្រធានផ្សារជម្ពូវ័នយកផ្លូវសាធារណៈធ្វើអាជីវកម្ម ពួកគាត់ធ្វើការសំណូមពរដល់លោក សក់ ច័ន្ទកញ្ញារិទ្ធ អភិបាលខណ្ឌពោធិ៍សែនជ័យ ជួយពិនិត្យមើលផង។
បើតាមការលើកឡើងរបស់អ្នកធ្វើដំណើរ ក៏ដូចជាប្រជាពលរដ្ឋថា ការយកផ្លូវសាធារណៈ(ផ្លូវជាតិលេខ៤) ធ្វើអាជីវកម្មលក់ដូរនេះកើតមានជាយូរខែណាស់មកហើយ បើទោះបីជាមានការរាយណ៍ការទៅថ្នាក់លើក៏ដោយ ក៏គ្មានវិធានការទប់ស្កាត់ឬក៏ផ្អាកសកម្មភាពមិនឱ្យលក់ដូរ និងចតម៉ូតូ រថយន្ត បានដែរ។
ប្រជាពលរដ្ឋបានបន្តទៀតថា បានជាអ្នកលក់ដូរ ខាងមុខផ្សារជម្ពូវ័នបានសង្ស័យលោកប្រធានផ្សារ យកផ្លូវសាធារណៈនេះ ជួលទៅអ្នកផ្សេង យកទៅ ធ្វើជាកន្លែងផ្ញើ កង់ ម៉ូតូ និងឲ្យអាជីវករដាក់លក់ដូរយ៉ាងអាណាធិបតេយ្យបណ្ដាលឲ្យមានការកកស្ទះពិបាកធ្វើការធ្វើដំណើរខ្លាំងណាស់។
ប្រជាពលរដ្ឋបានបន្ថែមទៀតថា ជារៀងរាល់យប់ថ្ងៃ មហាជនអ្នកធ្វើដំណើរឆ្លងកាត់តាមបណ្ដោយផ្លូវជាតិលេខ៤ ត្រង់ចំណុចផ្សារជម្ពូវ័ន ស្ថិតនៅសង្កាត់ចោមចៅ ២ ខណ្ឌពោធិ៍សែនជ័យរាជ ធានីភ្នំពេញ បានរិះគន់ចំៗថា អាជ្ញាធរខណ្ឌពោធិ៍សែនជ័យ មិនគួរណាបណ្ដែតបណ្ដោយឲ្យលោកប្រធានផ្សារជម្ពូវ័ន យកផ្លូវសាធារណៈធ្វើជាកន្លែងអាជីវកម្មផ្ញើ កង់ ម៉ូតូ រថយន្ត ហ្នឹងឱ្យអាជីវករដាក់លក់ដូរធ្វើឱ្យប៉ះពាល់ដល់ការធ្វើដំណើររបស់មហាជនក៏ដូចជាបងប្អូនប្រជាពលរដ្ឋដោយហេតុថា ធ្វើឱ្យចរាចរណ៍មានការកកស្ទះតាមដងផ្លូវសារធារណៈ ខណៈដែលអាជ្ញាធរមានសមត្ថកិច្ចក្នុងមូលដ្ឋានមិនអាចកែសម្រួលឲ្យមានរបៀបរៀបរយនឹងសណ្ដាប់ធ្នាប់នោះទេ។មិនថាពេលយប់ឬពេលថ្ងៃ កកស្ទះរាប់ម៉ោង ផ្លូវជាតិលេខ៤នេះ ជាផ្លូវសម្រាប់ទេសចរណ៍បរទេសឆ្លងកាត់ និងថ្នាក់ដឹកនាំឆ្លងកាត់ ទៅកាន់ព្រលានយន្តហោះ និងធ្វើដំណើរទៅទេសចរណ៍នៅខេត្តព្រះសីហនុ កោះកុងឬខេត្ត ដែលមានតំបន់ទេសចរណ៍។
ជាចុងក្រោយប្រជាពលរដ្ឋ និងអ្នកធ្វើដំណើរឆ្លងកាត់ផ្សារជម្ពូវ័ននេះ ធ្វើការសំណូមពរដល់លោកអភិបាលខណ្ឌពោធិ៍សែនជ័យ និងជាពិសេសឯកឧត្តម ឃួង ស្រេង អភិបាលរាជធានីភ្នំពេញ មេត្តាជួយពិនិត្យមើលទង្វើររបស់លោកប្រធានផ្សារជម្ពូវ័នផងទាន.!បើបណ្តែតបណ្តោយតទៅទៀតច្បាស់ជាកកស្ទះចរាចរណ៍រាល់ថ្ងៃជាក់ជាមិនខានឡើយ៕
