សម្តេចតេជោហ៊ុនសែននាយករដ្ឋមន្រ្តីនៃព្រះរាជាណា ចក្រកម្ពុជាបានអះអាងថា ទោះបីជាមានការចាក់វ៉ាក់ សាំងដល់ដូសទី១០ឬទី២០ ក៏ដោយ ក៏រដ្ឋមិនយកលុយពីប្រជាពលរដ្ឋនោះឡើយ ព្រោះការចាក់នេះ គឺដើម្បីជួយដល់ប្រជាពលរដ្ឋគ្រប់រូប ពីការឆ្លងនិងស្លាប់ដោយសារជំងឺកូវីដ- ១៩។
ថ្លែងក្នុងឱកាសអញ្ជើញជួបសំណេះសំណាល ជាមួយក្រុមគ្រូពេទ្យសម្តេចតេជោ ប្រឆាំងកូវីដ-១៩ នៅសាលពិព័រណ៍ជ្រោយចង្វា រាជធានីភ្នំពេញ នាថ្ងៃទី១៧ខែមេសាឆ្នាំ២០២២នេះ សម្តេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា ក្នុងដំណាក់កាលពេលកើតជំងឺកូវីដ-១៩ ទោះបីជាមានការចាក់វ៉ាក់សាំង ដល់ដូសទី១០ ឬទី២០ក៏ដោយ ក៏រដ្ឋមិនយកលុយពីប្រជាពលរដ្ឋនោះឡើយ ព្រោះពេលនេះមិនមែនជាពេលយកលុយពីពួកគាត់នោះទេ ពោលគឺជាពេលវេលាដែលត្រូវជួយប្រជាជន ឱ្យរួចផុតពីជម្ងឺដ៏កាចសាហាវមួយនេះ។
ជាមួយគ្នានោះ សម្តេចបានខិតខំរិះរកមធ្យោបាយក្នុងការរកវ៉ាក់សាំងមកចាក់ជូនប្រជាពលរដ្ឋនៅកម្ពុជា ហើយការចាក់វ៉ាក់សាំងនេះដែរ គឺមិនមានការបែងចែកនិន្នាការនយោបាយ ពណ៌សម្បុរ ជាតិ សាសន៍ និងសាសនានោះឡើយ ពោលគឺផ្គត់ផ្គង់វ៉ាក់ សាំងដល់គ្រប់មនុស្សគ្នាទាំងអស់ ដែលនៅក្នុងទឹកដីកម្ពុជា ទទួលបានវ៉ាក់សាំងដោយឥតគិតថ្លៃ ដែលធ្វើឱ្យភាពស៉ាំជំងឺកូវីដ-១៩ នៅកម្ពុជាកាន់តែរឹងមាំខ្លាំងឡើងថែមទៀត។
បងប្អូនខ្លះគាត់ឱ្យយោបល់ខ្ញុំថា ឥឡូវចាក់ដូស ទី១ដូស២មិនយកថ្លៃ ឥឡូវចាក់ដូសទី៣គួរតែយកថ្លៃ ខ្ញុំបានប្រាប់ទៅវិញ ខ្ញុំថាអត់ទេ យកមកក៏មិនក្លាយទៅជាអ្នកមានបានដែរ ទៅថវិការបស់យើងក្ដីជំនួយក្ដី ចាក់ជូនដោយឥតគិតថ្លៃ ហើយក៏គ្មានការរើសអើងណាមួយដែរ ទាំងបញ្ហានយោបាយ ទាំងជាតិ សាសន៍ ទាំងសាសនា ទាំងតំបន់ ទីក្រុង តំបន់ជនបទ ទទួលបានដូចៗគ្នា ចំណុចនេះហើយដែលជាជោគជ័យ បង្កើតភាពសុំាសហគមន៍ពីទីក្រុងដល់ជនបទ ហើយវាបង្កើតបាននូវជំនឿទុកចិត្តដល់អ្នកផ្តល់ជំនួយឥឡូវសាក ល្បងចាក់យកលុយមើល បើមិនបង្កើតអំពើពុករលួយពេញទឹកពេញដី គឺចាក់មិនចេញទេ ជួនកាលថាត្រូវយក១ដូស ១០ដុល្លារ ឬ១៥ដុល្លារ គាត់យកទៅចាក់២០ដុល្លារ ឬ៣០ ដុល្លារអត់ទេ សម្រាប់ខ្ញុំគឺច្បាស់អាកន្លែងហ្នឹងមួយ ត្រូវតែធានាបើទោះបីដូសទី ១០ឬដូសទី២០ ក៏នៅតែមិនយកលុយ បើយកពីប្រជាពល រដ្ឋមកគាត់កំពុងតែលំបាកហើយ គាត់អត់មានលុយមកចាក់មិចកើត ទៅខ្ចីលុយគេដើម្បីយកមកចាក់ ឬយកលុយសម្រាប់ទិញសៀវភៅឱ្យកូនរៀន ទិញកង់ឱ្យកូនជិះយកមកចាក់វ៉ាក់សាំងគឺអត់ទេ ពេលនេះមិនមែនជាពេល វេលាត្រូវយកលុយពីប្រជាជនទេ គឺជាពេលវេលាដែលត្រូវជួយប្រជាជន៕
