ភ្នំពេញ ថ្ងៃទី១៧ ខែឧសភា ឆ្នាំ២០២២
សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្ដីនៃព្រះរាជាណាចក្រកម្ពុជាបានគូសបញ្ជាក់ថា ទោះបីជាប្រទេសកម្ពុជាក្រមែន តែមិនបណ្តោយឱ្យប្រជាពលរដ្ឋខ្វះវ៉ាក់សាំងចាក់នោះទេ។ ការគូសបញ្ជាក់របស់សម្ដេចតេជោនាយករដ្ឋមន្រ្ដីនេះ ក្នុងពិធីជួបសំណេះសំណាល ជាមួយគ្រូពេទ្យស្ម័គ្រចិត្ដយុវជនសម្តេចតេជោ(TYDA) នាព្រឹកថ្ងៃទី១៧ ខែឧសភា ឆ្នាំ២០២២ នៅសាលពិព័រណ៍ជ្រោយចង្វារ រាជធានីភ្នំពេញ។
សម្ដេចតេជោ ហ៊ុន សែន បានថ្លែងថា វ៉ាក់សាំងដែលកម្ពុជាបានទទួលរួចហើយមានចំនួន ៥២ ៨៣៥ ៣៩១ ដូស និងបានយក ទៅប្រើប្រាស់អស់ចំនួន ៤២ ៨៧១ ៥៣៦ដូស ហើយនៅសល់ក្នុងឃ្លាំងមានចំនួន ៩ ៩៩៣ ៨៥៤ ដូស។ សម្ដេចតេជោបញ្ជាក់ថា អ្វីដែលជាមោទនភាពរបស់កម្ពុជាដែលបានទទួលវ៉ាក់សាំងទាំងមកពីមុន និងក្រោយនោះ គឺកម្ពុជាបានចំណាយថវិកាទិញវ៉ាក់សាំងចំនួនជាង២៨លានដូស។ ទន្ទឹមនេះ កម្ពុជាមានសមត្ថភាពចាក់វ៉ាក់សាំងជូនប្រជាពលរដ្ឋ ដែលវ៉ាក់សាំងដែលទិញដោយថវិកាផ្ទាល់ខ្លួនគឺមានចំនួនច្រើនជាងការផ្តល់ជំនួយពីបណ្តាប្រទេសជាមិត្ត។ សម្តេចតេជោបានថ្លែងបញ្ជាក់ថា “ប្រទេសនេះក្រ ក៏ប៉ុន្តែមិនបណ្តោយឱ្យប្រជាពលរដ្ឋខ្វះថ្នាំចាក់នោះទេ ហើយអាចទិញ រកបានហើយខ្ញុំបានប្រាប់ឯកឧត្តម វង្ស៊ី វិសុទ្ធ ថាឱ្យតែចិនឆ្លើយតបថាលក់គឺទិញភ្លាមបញ្ជូនលុយទៅភ្លាម ទាំងលុយថ្លៃវ៉ាក់សាំង និងថ្លៃដឹកជញ្ជូន”។
សម្តេចតេជោនាយករដ្ឋមន្រ្ដីបន្តថា វ៉ាក់សាំងចំនួនជាង២៨លានដូស ដែលកម្ពុជាយើងទិញខ្លួនឯង ហើយមានប្រទេសខ្លះមានលុយហើយមិនអាចទិញវ៉ាក់សាំងបានផង។ សម្តេចតេជោបានបន្ដទៀតថា វ៉ាក់សាំងដែលមិនទាន់ដឹកមកដល់ប្រទេសកម្ពុជាមានជាង២០លាន ៥សែន៥ម៉ឺនដូស ក្នុងនោះមានពីចិន៥លានដូស អាម៉េរិក ៧លាន៥សែន (បានដឹកមកដល់២លានដូស) និងប្រទេសមួយចំនួនទៀត។
សម្តេចតេជោនាយករដ្ឋមន្រ្ដីបានលើកឡើងបន្ថែមថា វ៉ាក់សាំងរបស់កម្ពុជានៅសល់ក្នុងស្តុកមានចំនួនជាង៩លានដូសទៀត ប៉ុន្តែធ្វើយ៉ាងណាចាក់វ៉ាក់សាំងនេះឱ្យអស់៕
