រាជធានីភ្នំពេញ៖ នារសៀលថ្ងៃទី២៤ ខែសីហា ឆ្នាំ២០២៦ លោក សេង គន្ធ អភិបាលនៃគណៈអភិបាលខណ្ឌមានជ័យ បានអញ្ជើញជាអធិបតីក្នុងពិធីចុះសួរសុខទុក្ខ និងប្រគល់ថវិកាបេឡាមរណសង្គ្រោះ ជូនដល់គ្រួសារអតីតយុទ្ធជន និងនិវត្តជនចំនួន ៣ គ្រួសារ។
សកម្មភាពប្រកបដោយស្មារតីមនុស្សធម៌នេះ រៀបចំឡើងក្រោមការចង្អុលបង្ហាញ និងការយកចិត្តទុកដាក់ខ្ពស់ពី ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ ដើម្បីចូលរួមរំលែកទុក្ខយ៉ាងក្រៀមក្រំ និងជួយសម្រាលជីវភាពគ្រួសារសព។
លោកអភិបាលខណ្ឌបានពាំនាំនូវការសួរសុខទុក្ខយ៉ាងកក់ក្តៅ និងបង្ហាញពីការយកចិត្តទុកដាក់ខ្ពស់ចំពោះសុខទុក្ខ ក៏ដូចជាជីវភាពរស់នៅរបស់គ្រួសារអតីតយុទ្ធជន និងនិវត្តជន ដែលធ្លាប់បានលះបង់ កម្លាំងកាយចិត្ត និងចូលរួមចំណែកយ៉ាងធំធេងក្នុងបេសកកម្មបម្រើជាតិមាតុភូមិកន្លងមក។ដើម្បីជួយសម្រួលបន្ទុកក្នុងគ្រួសារ លោកអភិបាលខណ្ឌបានប្រគល់ថវិកាបេឡាមរណសង្គ្រោះជូនដល់គ្រួសារទាំង ០៣ ដោយក្នុង មួយគ្រួសារទទួលបានថវិកាចំនួន ៤,០០០,០០០ រៀល (សរុបថវិកាទាំងអស់ចំនួន ១២,OOOO,OOOO រៀល សម្រាប់ ៣ គ្រួសារ)។
នាពេលនេះដែរ គ្រួសារនៃសពបានសម្តែងនូវកតញ្ញូតាធម៌ និងក្តីរំភើបយ៉ាងជ្រាលជ្រៅចំពោះថ្នាក់ដឹកនាំរាជធានីភ្នំពេញ ក៏ដូចជាអាជ្ញាធរខណ្ឌ ដែលតែងតែនៅក្បែរ និងមិនបោះបង់ពួកគេចោលក្នុងគ្រាលំបាកឡើយ។
ពិធីប្រគល់នេះបានបញ្ចប់ទៅក្រោមបរិយាកាសស្និទ្ធស្នាល ពេញដោយកាយវិការអាណិតស្រឡាញ់ និងការគោរពផ្តល់កិត្តិយសយ៉ាងខ្ពង់ខ្ពស់៕
