រាជធានីភ្នំពេញ៖ នាព្រឹកថ្ងៃអាទិត្យ ៨រោច ខែភទ្របទ ឆ្នាំមមី អដ្ឋស័ក ព.ស. ២៥៧០ ត្រូវនឹងថ្ងៃទី៤ ខែតុលា ឆ្នាំ២០២៦ ក្នុងឱកាសពិធីបុណ្យភ្ជុំបិណ្ឌ ប្រពៃណីជាតិខ្មែរ លោក សេង គន្ធ អភិបាលនៃគណៈអភិបាលខណ្ឌមានជ័យ និងជាប្រធានគណៈមេបញ្ជាការឯកភាពខណ្ឌមានជ័យ បានអញ្ជើញជាអធិបតីក្នុងពិធីចែកអំណោយលើកទឹកចិត្តជូនដល់កងកម្លាំងសណ្តាប់ធ្នាប់ខណ្ឌមានជ័យ ដែលបានខិតខំប្រឹងប្រែងបំពេញការងារយ៉ាងសកម្មនាពេលកន្លងមក។
ក្នុងឱកាសនោះ លោកអភិបាលខណ្ឌបានសម្តែងនូវការកោតសរសើរ និងវាយតម្លៃខ្ពស់ចំពោះស្មារតីទទួលខុសត្រូវខ្ពស់ និងការលះបង់របស់កងកម្លាំងសណ្តាប់ធ្នាប់ទាំងអស់ ក្នុងការថែរក្សាសន្តិសុខ សុវត្ថិភាព និងរៀបចំរបៀបរៀបរយសាធារណៈជូនបងប្អូនប្រជាពលរដ្ឋក្នុងមូលដ្ឋានយ៉ាងល្អប្រសើរ។
ដើម្បីជួយសម្រាលជីវភាព និងបង្កើនស្មារតីសាមគ្គីភាពក្នុងឱកាសបុណ្យភ្ជុំបិណ្ឌនេះ កងកម្លាំងសណ្តាប់ធ្នាប់ម្នាក់ៗទទួលបាន៖
អង្ករ មី និងថវិកាមួយចំនួនផងដែរ។
សកម្មភាពនេះបញ្ជាក់យ៉ាងច្បាស់ពីការយកចិត្តទុកដាក់ខ្ពស់ពីសំណាក់ថ្នាក់ដឹកនាំខណ្ឌ ចំពោះសុខទុក្ខ និងជីវភាពរស់នៅរបស់មន្ត្រីក្រោមឱវាទ ដែលកំពុងបម្រើជាតិ និងប្រជាជនដោយស្មោះត្រង់៕
