ភ្នំពេញ៖ថ្ងៃសៅរ៍ ៩កើត ខែស្រាពណ៍ ឆ្នាំមមី អដ្ឋស័ក ពុទ្ធសករាជ ២៥៧០ ត្រូវនឹងថ្ងៃទី២២ ខែសីហា ឆ្នាំ២០២៦ ដើម្បីពង្រឹងប្រសិទ្ធភាពការងារ និងឆ្លើយតបឱ្យបានទាន់ពេលវេលាចំពោះតម្រូវការរបស់ប្រជាពលរដ្ឋនៅមូលដ្ឋាន ក្រុមការងារគណបក្សចុះមូលដ្ឋានខណ្ឌមានជ័យ រួមជាមួយគណៈកម្មាធិការគណបក្សខណ្ឌ បានរៀបចំកិច្ចប្រជុំបូកសរុបលទ្ធផលការងារប្រចាំខែកក្កដា និងសីហា ព្រមទាំងពិភាក្សាលើទិសដៅការងារបន្តសម្រាប់ឆ្នាំ២០២៦ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម ស៊ុន ចាន់ថុល អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាប្រធានក្រុមការងារគណបក្សចុះមូលដ្ឋានខណ្ឌមានជ័យ។
ក្នុងឱកាសនោះ ឯកឧត្តម ស៊ុន ចាន់ថុល បានវាយតម្លៃខ្ពស់ចំពោះខិតខំប្រឹងប្រែងរបស់សមាជិក សមាជិការ ក្រុមការងារទាំងអស់ ដែលបានលះបង់កម្លាំងកាយចិត្តក្នុងការបម្រើប្រជាពលរដ្ឋ និងចុះជាប់ផ្ទាល់នៅតាមមូលដ្ឋាននាពេលកន្លងមក។ ជាមួយគ្នានេះ កិច្ចប្រជុំបានផ្តោតសំខាន់លើចំណុចយុទ្ធសាស្ត្រជាច្រើន រួមមាន៖
*ការពិនិត្យសមិទ្ធផលការងារ៖ វាយតម្លៃលើលទ្ធផលនៃការដោះស្រាយបញ្ហាប្រឈម និងសំណូមពរផ្សេងៗរបស់ប្រជាពលរដ្ឋក្នុងខែកក្កដា និងសីហា កន្លងទៅ ដោយធានាបាននូវសន្តិសុខ សណ្តាប់ធ្នាប់ និងការអភិវឌ្ឍក្នុងមូលដ្ឋាន។
*ការអនុវត្តគោលនយោបាយមូលដ្ឋាន៖ ពង្រឹងការផ្តល់សេវាសាធារណៈឱ្យកាន់តែមានភាពឆាប់រហ័ស តម្លាភាព និងខិតជិតប្រជាពលរដ្ឋបន្ថែមទៀត។
*ទិសដៅការងារបន្តឆ្នាំ២០២៦៖ ការដាក់ចេញនូវផែនការសកម្មភាពច្បាស់លាស់សម្រាប់ខែបន្តបន្ទាប់ ដោយផ្តោតលើការចុះពង្រឹងសាមគ្គីភាព ការលើកកម្ពស់ជីវភាពរស់នៅរបស់ប្រជាពលរដ្ឋ និងការរៀបចំយុទ្ធសាស្ត្រគន្លឹះៗដើម្បីឆ្លើយតបទៅនឹងការរីកចម្រើនក្នុងតំបន់។
ឯកឧត្តមប្រធានក្រុមការងារក៏បានផ្តាំផ្ញើ និងជំរុញឱ្យថ្នាក់ដឹកនាំ និងសមាជិកក្រុមការងារគ្រប់លំដាប់ថ្នាក់ បន្តរួបរួមគ្នាក្នុងស្មារតីទទួលខុសត្រូវខ្ពស់ ចុះស្តាប់ទុក្ខធុរៈ និងដោះស្រាយការលំបាកជូនប្រជាពលរដ្ឋឱ្យបានទាន់ពេលវេលា ដើម្បីបន្តរក្សានូវជំនឿទុកចិត្ត និងភាពស្និទ្ធស្នាលរវាងគណបក្ស និងប្រជាជននៅខណ្ឌមានជ័យឱ្យកាន់តែរឹងមាំថែមទៀត៕
