ស្រុកកណ្ដាលស្ទឹង៖ប្រភពពីប្រជាពលរដ្ឋបានផ្តល់ដំណឹងមកថា៖នៅក្នុងទឹកដី ភូមិទែន ឃុំដើមឫស ស្រុកកណ្ដាលស្ទឹង ខេត្តកណ្ដាល មានការសាងសង់សំណង់រឹងមាំ នៅលើដីចំណីស្ទឹងព្រែត្នោត ដែលជាសម្បត្តិរបស់រដ្ឋ និងកំពង់សាងសង់បន្តបន្ទាប់ជារៀងរាល់ថ្ងៃ ដោយមិនឃើញមានអាជ្ញាធរក្នុងមូលដ្ឋានចុះធ្វើកាទប់ស្កាត់ ឬហាមឃាត់នោះឡើយ។
ប្រជាពលរដ្ឋបានដាក់ការសង្សៃថា បើមិនមានការឃុបឃិតគ្នាជាប្រព័ន្ធនោះទេ ក៏មិនអាចសាងសង់បានដោយរលូនបែបនេះបានដែរ។ពលរដ្ឋបន្តថា៖បញ្ហានៃការរំលោភយកដីចំណីស្ទឹងមកធ្វើជាកម្មសិទ្ធិផ្ទាល់ខ្លួន កំពុងក្លាយជាប្រធានបទដ៏ក្តៅគគុក ក្រោយពីគេសង្កេតឃើញមានការសាងសង់សំណង់រឹងមាំជាបន្តបន្ទាប់ នៅតាមបណ្តោយដងស្ទឹង ក្នុងភូមិសាស្ត្រ ភូមិទែន ឃុំដើមឫស ស្រុកកណ្ដាលស្ទឹង ខេត្តកណ្ដាល។
តាមការចុះពិនិត្យជាក់ស្តែងនៅតាមដងស្ទឹងក្នុងតំបន់នោះ គេឃើញមានសំណង់រឹងមាំតូចធំ កំពុងលេចរូបរាងឡើងយ៉ាងព្រោងព្រាត ដែលរូបភាពនេះត្រូវបានគេលើកឡើងថា ជាការ “រំលោភតាមបែបអ្នកតូចធ្វើតាមតូច អ្នកធំធ្វើតាមធំ” និងការសាងសង់សំណង់រឹងមាំដែលមើលទៅហាក់បីដូចជាមានលក្ខណៈជាកម្មសិទ្ធិឯកជនយូរអង្វែង។
ករណីនេះ បានបង្កឱ្យមានការងឿងឆ្ងល់ និងមន្ទិលសង្ស័យយ៉ាងខ្លាំងពីសំណាក់ប្រជាពលរដ្ឋ ក៏ដូចជាមជ្ឈដ្ឋានជុំវិញថា តើសំណង់រឹងមាំដែលកំពុងសាងសង់លើដីចំណីសេទាំងនោះ មានច្បាប់អនុញ្ញាតត្រឹមត្រូវពីក្រសួង ឬស្ថាប័នជំនាញពាក់ព័ន្ធដែរឬទេ? ព្រោះតាមផ្លូវច្បាប់ ដីចំណីស្ទឹងគឺជាទ្រព្យសម្បត្តិសាធារណៈរបស់រដ្ឋ ដែលត្រូវបានការពារ និងមិនអនុញ្ញាតឱ្យមានការសាងសង់សំណង់រឹងមាំ ឬរំលោភយកធ្វើជាកម្មសិទ្ធិបុគ្គលឡើយ។
ប្រជាពលរដ្ឋបានលើកឡើងថា ប្រសិនបើគ្មានការត្រួតពិនិត្យ និងមានវិធានការទប់ស្កាត់ឱ្យបានតឹងរ៉ឹងពីសំណាក់អាជ្ញាធរមូលដ្ឋាន ក៏ដូចជាមន្ត្រីជំនាញទេនោះ ដីចំណីស្ទឹងព្រែកត្នោង នឹងត្រូវរងការរំលោភបំពានកាន់តែធ្ងន់ធ្ងរ ដែលអាចប៉ះពាល់ដល់សោភ័ណភាព និងបរិស្ថានសេទាំងមូល។
ជុំវិញបញ្ហានេះ សាធារណជនសង្ឃឹមថា អាជ្ញាធរ ភូមិទែន ឃុំដើមឫស ស្រុកកណ្ដាលស្ទឹង ខេត្តកណ្ដាល នឹងចុះត្រួតពិនិត្យស្រាវជ្រាវឱ្យបានច្បាស់លាស់ ដើម្បីឆ្លើយតបទៅនឹងការមន្ទិលសង្ស័យរបស់ពលរដ្ឋ ក៏ដូចជាដើម្បីពង្រឹងការអនុវត្តច្បាប់ស្តីពីការគ្រប់គ្រងទ្រព្យសម្បត្តិរដ្ឋឱ្យមានប្រសិទ្ធភាព និងតម្លាភាព។
ជុំវិញករណីខាងលើ អង្គភាព សារព័ត៌មានយើងបាន ទំនាក់ទំនង សុំការបំភ្លឺពីលោកមេភូមិទែនតាមរយៈតេឡេក្រាម លោក បានចូលមើលតែមិនមានការឆ្លើយតប។ចំណែកលោក មេឃុំដើមឫស នឹងលោក អភិបាលស្រុក កណ្ដាល ស្ទឹងមិនចូលមើល ការសុំសេចក្តីបំភ្លឺតាមរយៈតេឡេក្រាមឡើយ។
ជុំវិញការចុះផ្សាយខាងលើ អង្គភាពយើងខ្ញុំសង្ឃឹមថា នឹងបានដឹងដល់ ថ្នាក់ដឹកនាំ ស្រុក ខេត្ត និងមន្ត្រីពាក់ព័ន្ធ ដើម្បីចាត់វិធានការទប់ស្កាត់ ជាពុំខាន៕
