ឯកឧត្ដម នេត្រ ភក្ត្រា រដ្ឋមន្រ្តី​ក្រសួងព័ត៌មាន បានបង្ហោះ នៅក្នុងគណនេយ្យ របស់​ឯកឧត្ដម​ដោយមានខ្លឹមសារថា៖

នៅថ្ងៃទី២៧ ខែសីហា ឆ្នាំ២០២៦ ក្រុមអ្នកសង្កេតការណ៍អាស៊ានប្រចាំកម្ពុជា (AOT-KH) បានចុះសង្កេតការណ៍ និងផ្ទៀងផ្ទាត់ស្ថានភាពនៅតំបន់អូរខ្លាឃ្មុំ សង្កាត់អូរស្មាច់ ខេត្តឧត្តរមានជ័យ រួមទាំងការដាក់ទូកុងតឺន័រ រាយលួសបន្លា ជីកប្រឡាយ ធ្វើលេណដ្ឋាន និងផ្លូវ ដែលកម្ពុជាចាត់ទុកថាជាសកម្មភាពរបស់យោធាថៃនៅលើទឹកដីកម្ពុជា។ ស្ថានភាពនេះបានរារាំងប្រជាពលរដ្ឋកម្ពុជា ៣៦៦នាក់ ស្មើនឹង៩៨គ្រួសារ ក្នុងនោះមានកុមារ១០១នាក់ មិនឱ្យវិលត្រឡប់ទៅលំនៅឋានរបស់ខ្លួន។

ការផ្ទៀងផ្ទាត់នេះបញ្ជាក់ពីភាពចាំបាច់ឱ្យ JBC កម្ពុជា-ថៃ ចាប់ផ្តើមការវាស់វែង និងខណ្ឌសីមាឱ្យបានឆាប់បំផុត ស្របតាមកិច្ចព្រមព្រៀងដែលមានស្រាប់ និងសេចក្តីប្រកាសរួម GBC ថ្ងៃទី២៧ ខែធ្នូ ឆ្នាំ២០២៥ ដើម្បីធានាឱ្យប្រជាពលរដ្ឋអាចវិលត្រឡប់ទៅផ្ទះវិញ ដោយគ្មានការរារាំង ដោយសុវត្ថិភាព និងដោយកិត្តិយស។

កម្ពុជាបញ្ជាក់ជាថ្មីថា ខ្សែព្រំដែនមិនអាចកែប្រែដោយកម្លាំង ដោយការកាន់កាប់ជាក់ស្តែង ឬដោយការបង្កើត fait accompli បានឡើយ។ ការដោះស្រាយព្រំដែនត្រូវធ្វើតាមច្បាប់អន្តរជាតិ សន្ធិសញ្ញា ផែនទី ឯកសារខណ្ឌសីមា MOU ឆ្នាំ២០០០ និងយន្តការ JBC ដែលភាគីទាំងពីរបានឯកភាពគ្នា៕