ប្រតិបត្តិតាមគោលការណ៍ណែនាំឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងការទទួលដឹកនាំបញ្ជា ពីឯកឧត្តមនាយឧត្តមសេនីយ៍ ស ថេត អគ្គស្នងការនគរបាលជាតិ នាព្រឹកថ្ងៃទី៩ ខែមិថុនា ឆ្នាំ២០២៥ នេះ ឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការ នៃស្នងការដ្ឋាននគរបាលខេត្តកំពត បានធ្វើដំណើរទៅកាន់ខេត្តព្រះវិហារ ដើម្បីប្រគល់ស្បៀងអាហារ ជូនទីបញ្ជាការនគរបាល ប្រចាំទិសភូមិភាគទី៤។
ក្នុងឱកាសនោះ លោកឧត្តមសេនីយ៍ទោ ម៉ៅ ច័ន្ទមធុរិទ្ធ បានជម្រាបជូនកម្លាំងនគរបាលការពារព្រំដែន នូវសេចក្ដីផ្ដាំផ្ញើសួរសុខទុក្ខ និងក្ដីនឹករលឹកប្រកបដោយមោទនភាព ពី ឯកឧត្តមអភិសន្តិបណ្ឌិត ឧបនាយករដ្ឋមន្ត្រី និងឯកឧត្តម នាយឧត្តមសេនីយ៍ អគ្គស្នងការ ចំពោះកម្លាំងនគរបាលការពារព្រំដែន ដែលបាននិងកំពុងឈរជើងប្រចាំការសហការគាំទ្រជាមួយកងយោធពលខេមរភូមិន្ទ ការពារដែនអធិបតេយ្យភាពជាតិ ប្រកបដោយភាពស្វាហាប់ និងម៉ឺងម៉ាត់បំផុត។
ជំនួយដែល លោកឧត្តមសេនីយ៍ស្នងការ រៀបចំវេចខ្ចប់ដឹកចេញពីស្នងការដ្ឋាននគរបាលខេត្តកំពត ឆ្ពោះទៅកាន់ទឹកដីខេត្តព្រះវិហារ ដើម្បីជូននគរបាលការពារព្រំដែន ប្រចាំទិសភូមិភាគទី៤ នាឱកាសនោះ រួមមាន ទឹកបរិសុទ្ធ៣០០កេស ភេសជ្ជៈចម្រុះ១០០កេស ទឹកត្រី២០០យួរ ទឹកស៊ីអុីវ២០០យួរ មីជាតិ២០០កេស ត្រីងៀត២០០គីឡូ សាច់ក្រក២០០គីឡូ ត្រីខ៣០កេសធំ និងអង្ករ៥តោន ស្មើនឹង១០០បាវ៕
ដោយ សេង បូលីន
មន្ត្រីព័ត៌មានក្រុមអ្នកនាំពាក្យក្រសួងមហាផ្ទៃ
