សិស្សប្រឡងជាប់និទ្ទេស A សញ្ញាបត្រមធ្យមសិក្សាទុតិយភូមិ ឆ្នាំ២០២៥ ចំនួន៨០នាក់ នៅក្រុងតាខ្មៅ ទទួលបានម៉ូតូម្នាក់មួយគ្រឿងពីរដ្ឋបាលខេត្តកណ្ដាល

ខេត្តកណ្ដាល៖ ម៉ូតូចំនួន ៨០ គ្រឿង ត្រូវបានផ្ដល់ជូនសិស្សប្រឡងជាប់និទ្ទេស A សញ្ញាប័ត្រមធ្យមសិក្សាទុតិយភូមិ សម័យប្រឡងថ្ងៃទី២៨ ខែសីហា ឆ្នាំ២០២៥ ដោយឯកឧត្តម នូ សាខន ប្រធានក្រុមប្រឹក្សាខេត្តកណ្ដាល និងឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល នាព្រឹកថ្ងៃទី១០ ខែតុលា ឆ្នាំ២០២៥នេះ។

មានប្រសាសន៍ក្នុងពិធីសំណេះសំណាល ឯកឧត្តម គួច ចំរើន អភិបាល នៃគណៈអភិបាលខេត្តកណ្ដាល អបអរសាទរចំពោះក្មួយៗទាំងអស់ ដែលបានខិតខំប្រឹងប្រែងសិក្សារៀនសូត្រ រហូតទទួលបាននូវសមិទ្ធផលដ៏ធំធេងក្នុងការប្រឡងជាប់សញ្ញាបត្រមធ្យមសិក្សាទុតិយភូមិ ជាមួយនឹងនិទ្ទេស A។ ភាពជោគជ័យនេះ គឺជាមោទនភាពមិនត្រឹមតែសម្រាប់តែក្មួយៗផ្ទាល់ខ្លួនប៉ុណ្ណោះទេ ប៉ុន្តែវាក៏ជាមោទនភាពសម្រាប់ លោកគ្រូ អ្នកគ្រូ សាលារៀន និងសង្គមជាតិយើងទាំងមូលផងដែរ។

ក្នុងឱកាសនោះដែរ ឯកឧត្ដមអភិបាលខេត្តកណ្ដាល បានផ្ដាំផ្ញើដល់ក្មួយៗទាំងអស់ ដែលទទួលបាននិទ្ទេសA សូមបន្តខិតខំប្រឹងប្រែងសិក្សានៅសាកលវិទ្យាល័យ និងការបំពេញការងារនាពេលអនាគត ដោយត្រូវចេះជ្រើសរើសជំនាញដែលក្មួយៗស្រឡាញ់ពិតប្រាកដ មិនមែនជ្រើសរើសតាមមិត្តភក្តិ ឬតាមការពេញនិយមក្នុងបណ្តាញសង្គមទេ។ ចេះរៀនដោយខ្លួនឯង តាមរយៈការសិក្សា ឈ្វេងយល់ វិភាគ ជាជាងការស្តាប់គ្រូតែមួយមុខ ដោយជំនាញនីមួយៗមានការវិវត្តន៍លឿន ជាពិសេសក្នុងបរិបទសង្គមបច្ចុប្បន្ន ក្នុងឧស្សាហកម្ម ៤.០ និងបរិវត្តកម្ម AI ។ ត្រូវចេះអភិវឌ្ឍជំនាញទំនាក់ទំនង ជំនាញត្រិះរិះពិចារណា ការធ្វើការជាក្រុម ការចូលរួមសកម្មភាពសង្គម និងការងារស្ម័គ្រចិត្តនានា។

លោក ឃឹម សំភា អភិបាលក្រុងតាខ្មៅ បានឱ្យដឹងថា៖ ឆ្នាំសិក្សា២០២៤-២០២៥​  ក្នុង​ក្រុងតាខ្មៅ មានវិទ្យាល័យ ០៨ ក្នុងនោះវិទ្យាល័យចំណេះទូទៅរដ្ឋ ០៤សាលា និងសាលាចំណេះទូទៅឯកជន​០៤សាលា ដែលមានសិស្សថ្នាក់ទី១២ ហើយបេក្ខជនចុះឈ្មោះប្រឡងមានចំនួន១.៩០០នាក់ បេក្ខជនមកប្រឡងមានចំនួន​ ១.៨៩៩នាក់។ លទ្ធផលប្រឡងជាប់ ១.៥៧៩នាក់ ស្មើនឹង៨៣,១៥% កើន ៤,៤១% ធៀបនឹងឆ្នាំ២០២៤
• និទ្ទេស A ៨០  នាក់     (ស្រី ៥៦នាក់)
• និទ្ទេស B ១៨០នាក់(ស្រី ១២០នាក់)
• និទ្ទេស ​C ៣៦៨ នាក់(ស្រី ២៣២នាក់)
• និទ្ទេស D ៥២៦នាក់  (ស្រី ៣០៦នាក់)
• និទ្ទេស E ៤២៥នាក់(ស្រី ២១៤នាក់)​ ៕