ក្នុងរយៈពេល៦ថ្ងៃមកនេះ ឃើញប្រជាពលរដ្ឋ ភ្ញៀវជាតិ អន្តរជាតិមកទស្សនា និងជួយទិញបន្លែផ្លែឈើក្នុងពិពណ៌ផ្លែឈើបាត់ដំបង យ៉ាងច្រើនកុះករ ប្រកបដោយទឹកមុខសប្បាយរីករាយ ខ្លះទិញផ្លែឈើញ៉ាំផ្ទាល់នៅទីនោះ ខ្លះទៀតច្រកថង់ ច្រកកេះ ខ្លះច្រកការ៉ុងដឹកយកទៅផ្ញើរសាច់ញាតិ បងប្អូនដើម្បីបានភ្លក់រស់ជាតិ ប្រកប ដោយភាពជឿជាក់លើគុណភាពថាជារបស់កសិករខ្មែរពិតៗ និងមានការត្រួតពិនិត្យពីមន្រ្តីជំនាញត្រឹមត្រូវ ។
គួរកត់សម្គាល់ថាក្នុងរយៈពេលបីថ្ងៃនេះព្រឹត្តិការណ៍ផ្លែឈើបាត់ដំបង២០២៥ម្ចាស់ចំការនានាបានបេះផ្លែទុរេន ដាក់លក់ស្ទើរមិនទាន់ ដោយលក់បានរហូតដល់ជាង២៧តោន នេះបង្ហាញឱ្យឃើញពីការគាំទ្រយ៉ាងខ្លាំងដល់កសិផលដែលដាំដុះដោយកសិករខ្មែរផ្ទាល់នៅខេត្តបាត់ដំបង នេះបើតាមរបាយការណ៍មន្ទីរកសិកម្មខេត្ត។
សូមជម្រាបថា រដ្ឋបាលខេត្តបាត់ដំបងរៀបចំ «ព្រឹត្តិការណ៍ផ្លែឈើបាត់ដំបង២០២៥» (Battambang Fruits Event 2025) រយៈពេល៧ថ្ងៃចាប់ពីថ្ងៃទី២៧ ខែមិថុនា ដល់ថ្ងៃទី៣ ខែកក្កដា ឆ្នាំ២០២៥ នៅបរិវេណទីធ្លាមុខសាលាខេត្តបាត់ដំបង។
ព្រឹត្តិការណ៍នេះក៏មានមានការតាំងលក់ផលិតផលភូមិ១ផលិតផល១ជាច្រើនស្តង់ បង្អែមផ្លែឈើចម្រុះដែលសុទ្ធសឹងជាស្នាដៃអ្នកបាត់ដំបងរួមជាមួយនឹងស្តង់លក់ទុរេន សាវម៉ាវ មង្ឃុត ផ្លែប័រ ដូងខ្ទិះ ក្រូចថ្លុង ក្រូចពោធិ៍សាត់ ម្នាស់ ម្រេច និងផលិតផលផ្លែឈើជាច្រើនប្រភេទដែលដាំដុះក្នុងខេត្ត។ ជាមួយគ្នានេះរដ្ឋបាលខេត្តបានរៀបចំឱ្យមានប៊ូហ្វេទុរេនបាត់ដំបងរយៈពេលបីដំបូងនៃពិពណ៌ផងដែរ បន្ថែមពីនោះក៏មានស្តង់លក់ផលិតផលនានា និងការប្រគុំតន្រ្តីកំសាន្តសប្បាយផងដែរ។
បើតាមរបាយការណ៍របស់មន្ទីរទេសចរណ៍ខេត្តបាត់ដំបង ក្នុងរយៈពេលបីថ្ងៃដំបូងនៃព្រឹត្តិការណ៍ផ្លែឈើបាត់ដំបង២០២៥ ចាប់ពីថ្ងៃទី២៧ដល់២៩មិថុនា មានប្រជាពលរដ្ឋ ភ្ញៀវជាតិ អន្តរជាតិមកទស្សនាកំសាន្តចំនួនជាង១០ម៉ឺននាក់ ក្នុងនោះ ភ្ញៀវជាតិជាង១០ម៉ឺនបីពាន់នាក់ និងភ្ញៀវអន្តរជាតិ ជាង៥០០នាក់ ៕ អត្ថបទ ៖ ភី សុខ វិទ្យុជាតិចំការចេកខេត្តបាត់ដំបង
