ខេត្តតាកែវ៖មានបងប្អូនប្រជាពលរដ្ឋជាច្រើន បានរអ៊ូរទាំប្រាប់មកក្រុមការងារអង្គភាពសារព័ត៌មានយើងខ្ញុំថា ស្ពានដែកស្ថិតនៅក្នុងភូមិឬស្សី១គុម ឃុំអូរស្រាយ ស្រុកត្រាំកក់ ខេត្តតាកែវ ចាស់ទ្រុឌទ្រោម របើករបាញ ពិបាកក្នុងការធ្វើដំណើរ។
ពេលបានឮដំណឹងនេះហើយក្រុមការងារ របស់អង្គភាពយើងខ្ញុំបានចុះទៅដល់ទីតាំងក៏បានឃើញទិដ្ឋភាព ដូចដែលបងប្អូនប្រពលរដ្ឋបានប្រាប់ពិតមែន និងបានថតផ្ដិតយករូបភាព ដើម្បីធ្វើការចុះផ្សាយជួនអាជ្ញាធរក្នុងមូលដ្ឋាន ក៏ដូចជាថ្នាក់ដឹកនាំលោកបានជ្រាប។
បើតាមកិច្ចសម្ភាសន៍ជាមួយបងប្អូនប្រជាពលរដ្ឋ លោកបានអោយដឹងថា កន្លងមកអ្នកធ្វើដំណើរឆ្លងកាត់ស្ពាន តែងតែបុកបន្ទះដែកដែលរបើកដាច់នោះដួល គ្រោះថ្នាក់បាក់ដៃ បាក់ជើង ហើយថ្មីៗនេះផងដែរ មានបុរសម្នាក់ធ្វើដំណើរ ឆ្លងកាត់បានបុក និងបន្ទះដែកដែលរបើកនោះ ដួលបោកក្បាល នឹងបង្កាន់ដៃស្ពានបណ្ដាលឱ្យបាត់បង់ជីវិត។
ប្រជាពលរដ្ឋដែលរស់នៅតំបន់ស្ពាន និយាយថានៅពេលមានម៉ូតូឡានឆ្លងកាត់ម្តងៗលាន់ឮខ្លាំងៗធ្វើឱ្យពួកគាត់សំរាន្តមិនបានទាំងថ្ងៃទាំងយប់ ពលរដ្ឋបន្តថា បើនៅតែបណ្តោយមិនមានកាជួសជុល ឬក៏សាងថ្មីនោះទេ ច្បាស់ជាពលរដ្ឋធ្វើដំណើរឆ្លងកាត់រងគ្រោះថ្នាក់កាន់តែច្រើនថែមទៀតមិនខាន។
ប្រជាជាពលរដ្ឋស្នើសុំដល់លោក កេត ម៉ៅ អភិបាលនៃគណៈអភិបាលស្រុកត្រាំកក់ ជាពិសេស ឯកឧត្ដម វ៉ី សំណាង អភិបាលនៃគណៈអភិបាលខេត្តតាកែវ មេត្តាចុះត្រួតពិនិត្យ ស្ពានដែកដែលមានសភាពទ្រុឌទ្រោមនេះផងទាន បើមិនដូចនេះទេ នឹងមានហានិភ័យកើតឡើងដល់ប្រជាពលរដ្ឋឆ្លងកាត់បន្តទៀតមិនខាន៕
