ខេត្តបាត់ដំបង៖ថ្នាក់ដឹកនាំខេត្តបាត់ដំបងសហការជាមួយថ្នាក់ដឹកនាំសហភាពសហព័ន្ធយុវជនកម្ពុជា អញ្ជើញចុះត្រួតពិនិត្យការងារនៅទីតាំងសង្ក្រាន្តបាត់ដំបង នៅព្រឹកថ្ងៃទី០៦ ខែមេសា ឆ្នាំ២០២៥ ដើម្បីពន្លឿនការងារឲ្យទាន់ពេលវេលាសម្រាប់ថ្ងៃសង្រ្កាន្តក្នុងឱកាសចូលឆ្នាំប្រពៃណីជាតិខ្មែរខាងមុខនេះ។
ឯកឧត្តម សុខ លូ អភិបាលនៃគណៈអភិបាល មានប្រសាសន៍ថា ដោយគិតត្រឹមថ្ងៃទី០៦ ខែមេសា ឆ្នាំ២០២៥ នៅទីតាំងសង្រ្កាន្តក្រុងបាត់ដំបង គឺបានរៀបចំការងាររួចរាល់៨០ភាគរយហើយតំបន់ខ្លះនៃតំបន់ទាំង១១ នៅក្នុងទីតាំងសង្រ្កាន្តបាត់ដំបង ដូចជាតំបន់ពាងទឹកគឺបានរួចរាល់១០០ភាគរយ និង បានដំណើរការសាកល្បងផងដែរ។
ដើម្បីត្រៀមក្នុងឱកាសបុណ្យចូលឆ្នាំប្រពៃណីជាតិខ្មែរ នាថ្ងៃសង្ក្រាន្តខាងមុខ ឲ្យប្រជាពលរដ្ឋទៅលេងកម្សាន្តកាន់តែមានភាពសប្បាយរីករាយ ដោយកម្មវិធីសង្ក្រាន្តបាត់ដំបងឆ្នាំនេះរៀបចំសហការដោយ សហភាពសហព័ន្ធយុវជនកម្ពុជា និង រដ្ឋបាលខេត្តបាត់ដំបង ចាប់ពីថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៥។
គួរបញ្ជាក់ផងថា ទីតាំងសង្រ្កាន្តបាត់ដំបងឆ្នាំ២០២៥នេះ មានចំនួន១១តំបន់សំខាន់ៗរួមមាន តំបន់វេទិការបើកព្រឹត្តិការណ៍ តំបន់ត្រជាក់ចិត្ត តំបន់ពាងទឹក តំបន់ភូមិយើង (ដែលមានការតាំងពិព័រណ៍ក្រុង-ស្រុក) ពិព័រណ៍ភូមិ១ ផលិតផល១ ទីតាំងល្បែងប្រជាប្រិយខ្មែរ តំបន់តន្រ្តីស្រុកស្រែ តំបន់សាសនាតំបន់ផលិតផលយក្ស តំបន់ភូមិបង្អែមខ្មែរ តំបន់ពិព័ណ៌ទូទៅ
និង តំបន់តន្រ្តីសម័យ៕
