ខណ្ឌចំការមន៖ដោយយោងតាមសេចក្តីជូនដំណឹងរបស់ រដ្ឋបាលខណ្ឌចំការមន លេខ ៦៧/២៥ ស ជ ណ ចុះថ្ងៃអង្គារ ៦កើត ខែផល្គុនឆ្នាំរោង ព ស ២៥៦៨ ធ្វើនៅរាជធានីភ្នំពេញ ថ្ងៃទី៦ ខែមីនា ឆ្នាំ២០២៥
រដ្ឋបាលខណ្ឌចំការមន មានកិត្តិយស សូមជម្រាបជូនដំណឹងដល់ប្រជាពលរដ្ឋចំនួន ១៣គ្រួសារ (ជំហានទី១) ដែលកំពុងរស់នៅតាមបណ្តោយមាត់ប្រឡាយបឹងត្របែក ស្ថិតក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ មេត្តាជ្រាបថា៖ រដ្ឋបាលរាជធានីភ្នំពេញ បានកំពុងអនុវត្តគម្រោងផែនការវិនិយោគហេដ្ឋរចនាសម្ព័ន្ធ ប្រព័ន្ធលូ និងប្រព័ន្ធរំដោះទឹក សម្រាប់បញ្ចៀសការជន់លិចដោយទឹកភ្លៀង ក្នុងភូមិសាស្ត្ររាជធានីភ្នំពេញ។ ក្នុងនោះ គម្រោងសាងសង់ចម្រឹងទប់សំរាមបំពាក់ដោយម៉ាស៊ីនកាយប្រមូលសំរាមស្វ័យប្រវត្តិ និងគម្រោងសាងសង់ជញ្ជាំង បេតុងស៊ុតផាយ សងខាងប្រឡាយ បឹងត្របែក ស្ថិតនៅក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញ ចាប់ផ្តើមដំណើរការពីថ្ងៃទី០៧ ខែកក្កដា ឆ្នាំ២០២៤ គ្រោងនឹងបញ្ចប់នៅថ្ងៃទី៣១ ខែកក្កដា ឆ្នាំ២០២៥ ប៉ុន្តែ ដោយសារមានផលប៉ះពាល់ផ្ទះប្រជាពលរដ្ឋចំនួន ១៣គ្រួសារ នៅទីតាំងខាងលើ មិនទាន់ទទួលយកនូវសំណង ដែលក្រុមការងារអន្តរក្រសួងបានផ្តល់ជូន ជាហេតុនាំឱ្យការអនុវត្តគម្រោង មិនអាចដំណើរការទាន់ទៅតាមផែនការ ដែលបានគ្រោងទុក។
រដ្ឋបាលខណ្ឌចំការមន ស្នើសុំដល់បងប្អូនទាំង ១៣គ្រួសារ (ជំហានទី១) សូមមេត្តាជ្រាប និង យោគយល់ដោយទទួលយកសំណងដែលអន្តរក្រសួង ពិសេសក្រសួងសេដ្ឋកិច្ច និងហិរញ្ញវត្ថុ ព្រមទាំងអាជ្ញាធរ ពាក់ព័ន្ធទាំងអស់ បានសម្រេចផ្តល់ជូនតាមរយៈការចុះវាយតម្លៃច្បាស់លាស់ត្រឹមត្រូវជាក់ស្តែង និងសុក្រឹតបំផុត ។
ទទួលបាននូវសេចក្តី ជូនដំណឹងនេះ សូម បងប្អូនទាំង ១៣គ្រួសារ (ជំហានទី១) មេត្តារៀបចំរុះរើ ដោយខ្លួនឯងឱ្យបានមុន ថ្ងៃទី១៨ ខែមីនា ឆ្នាំ២០២៥ ក្នុងករណី បងប្អូន ពុំយល់ព្រមរុះរើទៅតាមការកំណត់នោះទេ រដ្ឋបាលខណ្ឌចំការមន នឹងអនុវត្តវិធានការរដ្ឋបាលចុះរុះរើ ដោយពុំទទួលខុសត្រូវចំពោះការខូចខាត ឬបាត់បង់ សម្ភារៈរបស់បងប្អូនប្រជាពលរដ្ឋឡើយ។
រដ្ឋបាលខណ្ឌចំការមន សង្ឃឹមជឿជាក់យ៉ាងមុតមាំថា បងប្អូនទាំងអស់ និងមានការយោគយល់ និងចូលរួមអនុវត្តខ្លឹមសារ នៃសេចក្តីជូនដំណឹងនេះ ឱ្យទទួលបាននូវជោគជ័យជាក់ជាមិនខាន។
ហត្ថលេខា នឹងត្រា រដ្ឋបាលខណ្ឌចំការមន កៀង លក្ស័៕
