ខេត្តព្រះវិហារ៖ នៅរសៀលថ្ងៃទី១៦ ខែកក្កដា ឆ្នាំ២០២៥នេះ នៅអាគាររដ្ឋបាលស្រុកត្បែងមានជ័យ នៃខេត្តព្រះវិហារ អ្នកនាំពាក្យនៃរដ្ឋបាលស្រុកត្បែងមានជ័យ លោក សុខ មុន្នីរិទ្ធ អភិបាលរងស្រុក តំណាងលោក នុត សោភ័ណ្ឌ អភិបាលនៃគណៈអភិបាលស្រុកត្បែងមានជ័យ បានធ្វើលិខិតអញ្ជើញបងប្អូនអ្នកសារព័ត៌មាន ជាច្រើនអង្គភាពប្រចាំខេត្តព្រះវិហារដើម្បីធ្វើសន្និសីទសារព័ត៌មាន បកស្រាយបំភ្លឺព័ត៌មានជុំវិញរឿងរ៉ាវ ករណីមានការចុះផ្សាយព័ត៌មានកាលពីថ្ងៃទី១៥ ខែកក្កដា ឆ្នាំ២០២៥នេះរបស់អង្គភាពសារព័ត៌មាន អនឡាញមួយ ដែលបានធ្វើការផ្សព្វផ្សាយព័ត៌មានចោទប្រកាន់ទៅលើលោក នុត សោភ័ណ្ឌ អភិបាលស្រុកត្បែងមានជ័យដោយមានខ្លឹមសារថា៖ លោកអភិបាលស្រុកបានប្រទូសកេរ្តិ៍ខ្មាស នឹងប៉ុនប៉ងរំលោភសេពសន្ថវៈទៅលើស្រ្តីម្នាក់ដែលបានបម្រើការងារ ជាមន្រ្តីនៅក្នុងរដ្ឋបាលស្រុកត្បែងមានជ័យ ។
ជុំវិញការចុះផ្សាយចោទប្រកាន់របស់អង្គភាពសារព័ត៌មានខាងលើ នៅរសៀលថ្ងៃពុធ ទី១៦ ខែកក្កដា ឆ្នាំ២០២៥នេះ អ្នកនាំពាក្យនៃរដ្ឋបាលស្រុកត្បែងមានជ័យ លោក សុខ មុន្នីរិទ្ធ អភិបាលរងស្រុក តំណាងលោក នុត សោភ័ណ្ឌ អភិបាលនៃគណះអភិបាលស្រុកត្បែងមានជ័យ បានបកស្រាយបំភ្លឺនៅចំពោះអ្នកសារព័ត៌មានជាច្រើនអង្គភាព ដោយបានលើកឡើងថា៖ការផ្សព្វផ្សាយរបស់អង្គភាពសារព័ត៌មានខាងលើនេះ បានធ្វើការចុះផ្សាយព័ត៌មាន ដោយគ្មានវិជ្ជាជីវៈជាអ្នកសារព័ត៍មាន យកព័ត៌មានទៅចុះផ្សាយមិនបានសម្ភាសន៍ជាមួយភាគីពាក់ព័ន្ធឲ្យបានគ្រប់ជ្រុងជ្រោយ ញុះញង់ឲ្យមានការរើសអើង នឹងប៉ះពាល់ធ្ងន់ធ្ងរដល់កិត្តិយស សេចក្ដីថ្លៃថ្នូររបស់លោកអភិបាលស្រុក ពាក់ព័ន្ធករណីនេះក្នុងនាមលោកជាអ្នកនាំពាក្យ នឹងមន្ត្រីរាជការនៃរដ្ឋបាលស្រុកត្បែងមានជ័យ បានច្រានចោលទាំងស្រុង ចំពោះការចុះផ្សាយនេះ ជាព័ត៌មានដែលបំភ្លៃការពិត គា្មនក្រមសីលធម៌ វិជ្ជាជីវៈ ដែលកន្លងទៅថ្មីៗ ឯកឧត្តម នេត្រ ភក្រ្តា រដ្ឋមន្ត្រីក្រសួងព័ត៌មាន រួមជាមួយរាជរដ្ឋាភិបាលកម្ពុជា បានបើកយុទ្ធនាការប្រយុទ្ធប្រឆាំងទៅនឹងព័ត៍មានក្លែងក្លាយ ។
អ្នកនាំពាក្យរដ្ឋបាលស្រុកត្បែងមានជ័យ លោក សុខ មុន្នីរិទ្ធ អភិបាលរងស្រុក បានបន្តរថា ពាក់ព័ន្ធករណីខាងលើ ក្រោយមានពាក្យបណ្តឹងពីភាគីជនរងគ្រោះ ខាងក្រុមការងារនៃអគ្គធិការដ្ឋានក្រសួងមហាផ្ទៃ កាលពីថ្ងៃទី០៧ ដល់ថ្ងៃទី០៩ កន្លងទៅថ្មីៗ បានចុះធ្វើការអង្កេតនឹងស្រាវជ្រាវសួរនាំភាគីដែលពាក់ព័ន្ធរួមទាំងមន្រ្តីៗនៃរដ្ឋបាលស្រុក នឹងក្រុមប្រឹក្សាស្រុកត្បែងមានជ័យ រួចមកហើយប៉ុន្តែរឿងរ៉ាវសម្រេចយ៉ាងណានោះគឺស្ថិតនៅលើសមត្ថកិច្ចរបស់ក្រសួង ជាពិសេសករណីខាងលើនេះកំពុងស្ថិតក្រោមការត្រួតពិនិត្យក្រោមនីតិវិធីរបស់តុលាការ ។
ជាចុងក្រោយលោក សុខ មុន្នីរិទ្ធ អ្នកនាំពាក្យរបស់រដ្ឋបាលស្រុកត្បែងមានជ័យ បានបញ្ជាក់ថា ចំពោះករណីអង្គភាពសារព័ត៌មាន ខាងលើដែលបានចុះផ្សាយបំភ្លៃការពិតនេះ រដ្ឋបាលស្រុកត្បែងមានជ័យ នឹងធ្វើការពិភាក្សាអំពីចំណាត់ការច្បាប់ ចំពោះបុគ្គលសារព័ត៌មានខាងលើ ដើម្បីផ្តល់យុត្តិធម៌នឹងកិត្តិយសសេចក្តីថ្លៃថ្នូរនឹងភាពស្អាតស្អំមកដល់លោក នុត សោភ័ណ្ឌ ដែលជាអភិបាលនៃគណៈអភិបាលស្រុកត្បែងមានជ័យ អំពីករណីនេះ មុននឹងអ្នកសារព័ត៌មាន លើកយកករណីនេះទៅផ្សព្វផ្សាយ គួរណាអ្នកសារព័ត៌មាននោះ ធ្វើបទសម្ភាសន៍ជាមួយភាគីពាក់ព័ន្ធទាំងសងខាងសិន មុននឹងផ្សព្វផ្សាយ ពីព្រោះអ្នកសារព័ត៌មានគឺជាកញ្ចក់ឆ្លុះបញ្ចាំងអំពីតម្លាភាពនៅក្នុងសង្គម ឈរនៅចំណុចកណ្តាលមិនលំអៀង មិនមានសិទ្ធិវិនិច្ឆ័យរឺកាត់សេចក្តីឲ្យទៅភាគីណាមួយខុសរឺត្រូវឡើយរង់ចាំមើលចំណាត់ការរបស់ថ្នាក់ដឹកនាំក្រសួងមហាផ្ទៃនឹងស្ថាប័នតុលាការជាអ្នកសម្រេចលើរឿងនេះ ៕ដោយ ខៀប ផល្លា ពីខេត្តព្រះវិហារ
